ପୁଲିସ ମୁଖ୍ୟାଳୟ ପକ୍ଷରୁ ଜାରି ବିବୃତି ଅନୁସାରେ, ସୋମବାର ରାତିରେ ପ୍ରିନ୍ସ ମହମ୍ମଦ ଖାନ ଅହମଦଜାଇ ଖୁଜଦାରରୁ କଲାତ ଯାଉଥିଲେ। ଏହି ସମୟରେ ରାଜପଥ ଉପରେ କିଛି ସଶସ୍ତ୍ର ବ୍ୟକ୍ତି ତାଙ୍କ ଗାଡ଼ିକୁ ଅଟକାଇଥିଲେ।
ପାକିସ୍ତାନର ଅଶାନ୍ତ ବଲୁଚିସ୍ତାନ ପ୍ରଦେଶରେ ଏକ ବଡ଼ ଅପହରଣ ଘଟଣା ସାମ୍ନାକୁ ଆସିଛି। ବର୍ତ୍ତମାନର କଲାତର ଖାନ ସୁଲେମାନ ଖାନ ଦାଉଦଙ୍କ ପୁଅ ପ୍ରିନ୍ସ ମହମ୍ମଦ ଖାନ ଅହମଦଜାଇଙ୍କୁ ସଶସ୍ତ୍ର ଦୁର୍ବୃତ୍ତମାନେ ଅପହରଣ କରି ନେଇଛନ୍ତି। କେବଳ ରାଜକୁମାର ନୁହନ୍ତି, ତାଙ୍କ ସହ ଥିବା ତିନି ଜଣ ଅଙ୍ଗରକ୍ଷୀ ମଧ୍ୟ ଅପହରଣର ଶିକାର ହୋଇଛନ୍ତି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଚିନ୍ତା ବଢ଼ିଥିବା ବେଳେ ପୁଲିସ ଓ ସୁରକ୍ଷା ଏଜେନ୍ସିଗୁଡ଼ିକ ତଦନ୍ତ ଆରମ୍ଭ କରିଛନ୍ତି।
ପୁଲିସ ମୁଖ୍ୟାଳୟ ପକ୍ଷରୁ ଜାରି ବିବୃତି ଅନୁସାରେ, ସୋମବାର ରାତିରେ ପ୍ରିନ୍ସ ମହମ୍ମଦ ଖାନ ଅହମଦଜାଇ ଖୁଜଦାରରୁ କଲାତ ଯାଉଥିଲେ। ଏହି ସମୟରେ ରାଜପଥ ଉପରେ କିଛି ସଶସ୍ତ୍ର ବ୍ୟକ୍ତି ତାଙ୍କ ଗାଡ଼ିକୁ ଅଟକାଇଥିଲେ। ପରେ ସେମାନେ ରାଜକୁମାର ଓ ତାଙ୍କ ତିନି ଅଙ୍ଗରକ୍ଷୀଙ୍କୁ ଜୋରଜବରଦସ୍ତ ନିଜ ସହ ନେଇଯାଇଥିବା ଜଣାପଡ଼ିଛି।
ଘଟଣା ପରେ ପୁଲିସ ଓ ସୁରକ୍ଷା ଏଜେନ୍ସିଗୁଡ଼ିକ ଅପହୃତଙ୍କୁ ଉଦ୍ଧାର କରିବା ପାଇଁ ତଲାସୀ ଅଭିଯାନ ଆରମ୍ଭ କରିଛନ୍ତି। ତେବେ ଅପହରଣକାରୀମାନେ କିଏ, ସେମାନଙ୍କ ଉଦ୍ଦେଶ୍ୟ କ’ଣ ଏବଂ ଅପହୃତମାନଙ୍କୁ କେଉଁଠାରେ ରଖାଯାଇଛି, ସେନେଇ ଏଯାଏଁ କୌଣସି ସ୍ପଷ୍ଟ ସୂଚନା ମିଳିନାହିଁ। ଘଟଣାର ପ୍ରକୃତ କାରଣ ଜାଣିବାକୁ ତଦନ୍ତ ଜାରି ରହିଛି।
ଉଲ୍ଲେଖଯୋଗ୍ୟ, ‘କଲାତର ଖାନ’ ହେଉଛି ପୂର୍ବତନ କଲାତ ରାଜ୍ୟର ଶାସକ ପରିବାର ସହ ଜଡ଼ିତ ଏକ ଐତିହାସିକ ଉପାଧି। ପାକିସ୍ତାନର ବଲୁଚିସ୍ତାନ ପ୍ରଦେଶରେ ଅବସ୍ଥିତ କଲାତ ଅଞ୍ଚଳରେ ପୂର୍ବେ ବ୍ରାହୁଇ ସମ୍ପ୍ରଦାୟର ଏକ ରାଜତନ୍ତ୍ର ରହିଥିଲା। ବର୍ତ୍ତମାନର କଲାତ ଖାନ ସୁଲେମାନ ଖାନ ଦାଉଦ ଯୁକ୍ତରାଜ୍ୟ ଓ ୱେଲ୍ସରେ ବାସ କରୁଛନ୍ତି।
ବଲୁଚିସ୍ତାନରେ କଲାତର ଖାନ ପରିବାରକୁ ଐତିହାସିକ ଓ ସାଂସ୍କୃତିକ ଦୃଷ୍ଟିରୁ ବିଶେଷ ସମ୍ମାନ ଦିଆଯାଏ। ଏହି ପରିବାର ବଲୁଚ୍ ଲୋକଙ୍କ ମଧ୍ୟରେ ରାଜନୈତିକ ଏକତା, ସ୍ୱତନ୍ତ୍ର ପରିଚୟ ଓ ସାଂସ୍କୃତିକ ଚେତନାକୁ ମଜବୁତ କରିବାରେ ଐତିହାସିକ ଭୂମିକା ନିଭାଇଛି। ଏପରି ଏକ ସମ୍ମାନିତ ପରିବାରର ସଦସ୍ୟଙ୍କ ଅପହରଣ ଘଟଣା ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି। ତେବେ ରାଜକୁମାର ଓ ତାଙ୍କ ଅଙ୍ଗରକ୍ଷୀଙ୍କ ସୁରକ୍ଷିତ ଫେରିବା ଏବେ ସବୁଠାରୁ ବଡ଼ ଚିନ୍ତାର ବିଷୟ ହୋଇଛି।
