ବ୍ୟାଟେରୀ ଖରାପ ହେବା, ଭିତରେ ସର୍ଟ ସର୍କିଟ୍ ହେବା କିମ୍ବା ଅତ୍ୟଧିକ ଗରମ ହେବା ଯୋଗୁଁ ନିଆଁ ଲାଗିପାରେ। ଖରାପ ଚାର୍ଜର, ନଷ୍ଟ ହୋଇଥିବା କେବୁଲ୍ ଓ ବିଦ୍ୟୁତ୍ ଯୋଗାଣରେ ତ୍ରୁଟି ମଧ୍ୟ ବିପଦ ବଢ଼ାଇପାରେ।
ଟ୍ରେନ୍ରେ ଯାତ୍ରା କରୁଥିବା ସମୟରେ ମୋବାଇଲ୍ର ବ୍ୟାଟେରୀ ସରିବାକୁ ଲାଗିଲେ ଆମେ ଚାର୍ଜିଂ ପଏଣ୍ଟ ଖୋଜିବା ଆରମ୍ଭ କରିଦେଉ। କିନ୍ତୁ ଆପଣ ଜାଣନ୍ତି କି, ରାତି ୧୧ଟାରୁ ସକାଳ ୫ଟା ପର୍ଯ୍ୟନ୍ତ ଟ୍ରେନ୍ରେ ଚାର୍ଜିଂ ପଏଣ୍ଟ ବନ୍ଦ ରଖିବାର ନିୟମ ରହିଛି? ଏହା ପଛରେ କାରଣ କ’ଣ? ଟ୍ରେନ୍ରେ ମୋବାଇଲ୍ ଚାର୍ଜ କଲେ ଫୋନ୍ କିମ୍ବା ପାୱାର ବ୍ୟାଙ୍କ୍ ଫାଟିବାର ଆଶଙ୍କା ରହିଛି କି? ଆସନ୍ତୁ ଜାଣିବା ଏହା ପଛର ପ୍ରକୃତ କାରଣ।
ଟ୍ରେନ୍ରେ ଅଗ୍ନିକାଣ୍ଡ ଭଳି ଦୁର୍ଘଟଣାର ଆଶଙ୍କା କମାଇବା ପାଇଁ ରାତିରେ ଚାର୍ଜିଂ ପଏଣ୍ଟ ବନ୍ଦ ରଖିବାର ବ୍ୟବସ୍ଥା କରାଯାଇଛି। ଅକ୍ଟୋବର ୨୪ ତାରିଖରେ ମୁମ୍ବାଇ-ହାୱଡ଼ା ମେଲ୍ରେ ଚାର୍ଜିଂ ସମୟରେ ଜଣେ ଯାତ୍ରୀଙ୍କ ପାୱାର ବ୍ୟାଙ୍କ୍ ଫାଟିବା ସହ ଧୂଆଁ ବାହାରିବା ଘଟଣା ସାମ୍ନାକୁ ଆସିଥିଲା।
ଏହାପରେ ଅକ୍ଟୋବର ୨୬ ତାରିଖରେ ରେଳ ବୋର୍ଡ ସମସ୍ତ ଜୋନାଲ୍ ରେଳବାଇକୁ ରାତି ୧୧ଟାରୁ ସକାଳ ୫ଟା ଯାଏଁ ଚାର୍ଜିଂ ପଏଣ୍ଟ ବନ୍ଦ ରଖିବା ସମ୍ପର୍କିତ ପୂର୍ବ ନିର୍ଦ୍ଦେଶକୁ କଡ଼ାକଡ଼ି ପାଳନ କରିବାକୁ କହିଛି। ଘରେ ସାଧାରଣତଃ AC ଅର୍ଥାତ୍ ଅଲଟରନେଟିଂ କରେଣ୍ଟ୍ରେ ବିଦ୍ୟୁତ୍ ଯୋଗାଣ ହୋଇଥାଏ। କିନ୍ତୁ ମୋବାଇଲ୍ ବ୍ୟାଟେରୀକୁ DC ଅର୍ଥାତ୍ ଡାଇରେକ୍ଟ କରେଣ୍ଟ୍ରେ ଚାର୍ଜ କରାଯାଏ। ଚାର୍ଜର AC ବିଦ୍ୟୁତ୍କୁ DCରେ ପରିବର୍ତ୍ତନ କରିଥାଏ। ପରେ ଫୋନ୍ର ଚାର୍ଜିଂ ସର୍କିଟ୍ ବ୍ୟାଟେରୀକୁ ଯାଉଥିବା ବିଦ୍ୟୁତ୍କୁ ନିୟନ୍ତ୍ରଣ କରେ।
ବ୍ୟାଟେରୀ ଖରାପ ହେବା, ଭିତରେ ସର୍ଟ ସର୍କିଟ୍ ହେବା କିମ୍ବା ଅତ୍ୟଧିକ ଗରମ ହେବା ଯୋଗୁଁ ନିଆଁ ଲାଗିପାରେ। ଖରାପ ଚାର୍ଜର, ନଷ୍ଟ ହୋଇଥିବା କେବୁଲ୍ ଓ ବିଦ୍ୟୁତ୍ ଯୋଗାଣରେ ତ୍ରୁଟି ମଧ୍ୟ ବିପଦ ବଢ଼ାଇପାରେ। ତେବେ ଟ୍ରେନ୍ରେ ବ୍ୟବହୃତ ବିଦ୍ୟୁତ୍ ବ୍ୟବସ୍ଥା ଓ ଘରର ବିଦ୍ୟୁତ୍ ବ୍ୟବସ୍ଥା ଅଲଗା ହୋଇଥିଲେ ମଧ୍ୟ କେବଳ ଏହି କାରଣରୁ ଫୋନ୍ ଫାଟିଯିବ ବୋଲି କହିବା ଠିକ୍ ନୁହେଁ। ଘରେ ମଧ୍ୟ ଖରାପ ବ୍ୟାଟେରୀ କିମ୍ବା ଚାର୍ଜରରୁ ଅଗ୍ନିକାଣ୍ଡ ଘଟିପାରେ। ତେଣୁ ଟ୍ରେନ୍ ହେଉ କି ଘର, ସବୁବେଳେ ଭଲ ଗୁଣବତ୍ତାର ଚାର୍ଜର ବ୍ୟବହାର କରନ୍ତୁ। ଫୋନ୍ କିମ୍ବା ପାୱାର ବ୍ୟାଙ୍କ୍ ଅଧିକ ଗରମ ହେଲେ, ଫୁଲିଗଲେ କିମ୍ବା ଧୂଆଁ ବାହାରିଲେ ତୁରନ୍ତ ଚାର୍ଜିଂ ବନ୍ଦ କରନ୍ତୁ। ଯାତ୍ରା ପୂର୍ବରୁ ଫୋନ୍ ଚାର୍ଜ କରି ରଖିବା ହିଁ ସବୁଠାରୁ ଭଲ।
