ବିଶ୍ୱସ୍ତରୀୟ ନିଷ୍ପତ୍ତି ଗ୍ରହଣ ପ୍ରକ୍ରିୟାରେ ଭାରତ ଓ ଆଫ୍ରିକାର ଭୂମିକାକୁ ଅଣଦେଖା କରାଯାଇପାରିବ ନାହିଁ ବୋଲି ସେ କହିଛନ୍ତି । ଅନ୍ୟପଟେ, ଜାତିସଂଘରେ ପାକିସ୍ତାନର ପରମାଣୁ ଅସ୍ତ୍ର ସମ୍ପର୍କିତ ବୟାନ ଏବଂ ଜମ୍ମୁ-କାଶ୍ମୀରକୁ ନେଇ ମିଥ୍ୟା ପ୍ରଚାରକୁ ଭାରତ କଡ଼ା ସମାଲୋଚନା କରିଛି ।
ଜାତିସଂଘରେ ସୁଧାର ଏବଂ ସୁରକ୍ଷା ପରିଷଦରେ ଭାରତର ଅଧିକ ପ୍ରତିନିଧିତ୍ୱ ପ୍ରସଙ୍ଗକୁ ପୁଣି ଜୋରଦାର ଭାବେ ଉଠାଇଛନ୍ତି ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର । ବିଶ୍ୱସ୍ତରୀୟ ନିଷ୍ପତ୍ତି ଗ୍ରହଣ ପ୍ରକ୍ରିୟାରେ ଭାରତ ଓ ଆଫ୍ରିକାର ଭୂମିକାକୁ ଅଣଦେଖା କରାଯାଇପାରିବ ନାହିଁ ବୋଲି ସେ କହିଛନ୍ତି । ଅନ୍ୟପଟେ, ଜାତିସଂଘରେ ପାକିସ୍ତାନର ପରମାଣୁ ଅସ୍ତ୍ର ସମ୍ପର୍କିତ ବୟାନ ଏବଂ ଜମ୍ମୁ-କାଶ୍ମୀରକୁ ନେଇ ମିଥ୍ୟା ପ୍ରଚାରକୁ ଭାରତ କଡ଼ା ସମାଲୋଚନା କରିଛି ।
ଆଫ୍ରିକାର ଆଦିସ୍ ଆବାବାରେ ଏକ କାର୍ଯ୍ୟକ୍ରମରେ ଯୋଗଦେଇ ଜୟଶଙ୍କର ଜାତିସଂଘ ସୁରକ୍ଷା ପରିଷଦ (UNSC)ରେ ସୁଧାର ଆଣିବା ଉପରେ ଗୁରୁତ୍ୱ ଦେଇଛନ୍ତି । ବର୍ତ୍ତମାନର ବିଶ୍ୱ ବ୍ୟବସ୍ଥାକୁ ଅଧିକ ଗଣତାନ୍ତ୍ରିକ ଓ ସମାବେଶୀ କରିବା ପାଇଁ ସୁରକ୍ଷା ପରିଷଦର ଢାଞ୍ଚାରେ ପରିବର୍ତ୍ତନ ଜରୁରୀ ବୋଲି ସେ ମତ ଦେଇଛନ୍ତି ।
ଜାତିସଂଘରେ ଭାରତ ପାକିସ୍ତାନକୁ ଟାର୍ଗେଟ୍ କରି କହିଛି ଯେ, ପରମାଣୁ ଅସ୍ତ୍ରକୁ ସାଧାରଣ ରାଜନୈତିକ ଚାପ ସୃଷ୍ଟି କରିବାର ମାଧ୍ୟମ ଭାବେ ଦେଖିବା ଉଚିତ ନୁହେଁ । ପରମାଣୁ ଧମକ ଆଗରେ ଭାରତ ମୁଣ୍ଡ ନୁଆଁଇବ ନାହିଁ ବୋଲି ଭାରତ ପକ୍ଷରୁ ସ୍ପଷ୍ଟ କରାଯାଇଛି । ଏହା ସହ ଜମ୍ମୁ-କାଶ୍ମୀର ସମ୍ପର୍କରେ ମିଥ୍ୟା ଓ ଭ୍ରମାତ୍ମକ ତଥ୍ୟ ପ୍ରଚାର କରି ପାକିସ୍ତାନ ଜାତିସଂଘର ମଞ୍ଚର ଅପବ୍ୟବହାର କରୁଥିବା ଭାରତ ଅଭିଯୋଗ କରିଛି ।
କାହିଁକି ଜରୁରୀ ସୁରକ୍ଷା ପରିଷଦରେ ସୁଧାର?
ଜାତିସଂଘ ସୁରକ୍ଷା ପରିଷଦ ଅନ୍ତର୍ଜାତୀୟ ଶାନ୍ତି ଓ ସୁରକ୍ଷା ରକ୍ଷା କରିବାର ମୁଖ୍ୟ ସଂସ୍ଥା। ଏଥିରେ ମୋଟ ୧୫ଟି ସଦସ୍ୟ ଦେଶ ରହିଛନ୍ତି । ସେଥିମଧ୍ୟରୁ ୫ଟି ସ୍ଥାୟୀ ସଦସ୍ୟ ଦେଶ ହେଉଛନ୍ତି ଆମେରିକା, ରୁଷିଆ, ଚୀନ୍, ବ୍ରିଟେନ୍ ଓ ଫ୍ରାନ୍ସ । ଏହି ଦେଶଗୁଡ଼ିକ ପାଖରେ ଭିଟୋ କ୍ଷମତା ରହିଛି । ଏହି କ୍ଷମତା ବଳରେ ଯେକୌଣସି ଗୋଟିଏ ସ୍ଥାୟୀ ସଦସ୍ୟ ଦେଶ ନିର୍ଦ୍ଦିଷ୍ଟ ପ୍ରସ୍ତାବକୁ ଅଟକାଇପାରେ ।
ବିଶ୍ୱରେ ଚାଲିଥିବା ବିଭିନ୍ନ ଯୁଦ୍ଧ ଓ ସଂଘର୍ଷର ସମାଧାନ କରିବାରେ ଜାତିସଂଘର ସୀମିତ ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠୁଛି । ଏଭଳି ସ୍ଥିତିରେ ଭାରତ ସମେତ ଅନ୍ୟ ଉଦୀୟମାନ ଦେଶଗୁଡ଼ିକୁ ଅଧିକ ପ୍ରତିନିଧିତ୍ୱ ଦେବା ପାଇଁ ସୁରକ୍ଷା ପରିଷଦରେ ସୁଧାର ଆଣିବାକୁ ଦାବି ଜୋରଦାର ହେଉଛି ।
