ଦିଲ୍ଲୀ ପୁଲିସ ଅକ୍ଟୋବର ୧୩ ତାରିଖରେ ଉଭୟଙ୍କୁ ହେପାଜତକୁ ନେଇଥିଲା। ଏହାପରେ ଅକ୍ଟୋବର ୧୪ରେ ସେମାନଙ୍କୁ ସ୍ପେଶାଲ ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ଙ୍କ ସମ୍ମୁଖରେ ହାଜର କରାଯାଇଥିଲା।
ଦିଲ୍ଲୀର ଜନ୍ତରମନ୍ତରରେ ବିନା ଅନୁମତିରେ ପ୍ରବେଶ ଓ ବିରୋଧ ପ୍ରଦର୍ଶନ ଉଦ୍ୟମ ମାମଲାରେ କକରୋଚ୍ ଜନତା ପାର୍ଟିର ଦୁଇ ନେତା ଆଶୁତୋଷ ରାଙ୍କା ଓ ସୌରଭ ଦାସଙ୍କ ଅଡୁଆ ବଢ଼ିଛି। ଉଭୟଙ୍କ ନ୍ୟାୟିକ ହେପାଜତ ଅବଧିକୁ ଆଉ ଦୁଇ ଦିନ ବଢ଼ାଇ ଦିଆଯାଇଛି। ଏହି ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୨୧ ତାରିଖରେ ହେବ।
ସୂଚନା ଅନୁସାରେ, ଦିଲ୍ଲୀ ପୁଲିସ ଅକ୍ଟୋବର ୧୩ ତାରିଖରେ ଉଭୟଙ୍କୁ ହେପାଜତକୁ ନେଇଥିଲା। ଏହାପରେ ଅକ୍ଟୋବର ୧୪ରେ ସେମାନଙ୍କୁ ସ୍ପେଶାଲ ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ଙ୍କ ସମ୍ମୁଖରେ ହାଜର କରାଯାଇଥିଲା। କୋର୍ଟ ଉଭୟଙ୍କୁ ପାଞ୍ଚ ଦିନ ପାଇଁ ନ୍ୟାୟିକ ହେପାଜତରେ ତିହାର ଜେଲ୍କୁ ପଠାଇଥିଲେ। ଏବେ ପୁଣି ଦୁଇ ଦିନ ହେପାଜତ ଅବଧି ବଢ଼ିଥିବାରୁ ସେମାନଙ୍କୁ ବୁଧବାର ପୁଣି ହାଜର କରାଯିବ।
ଉଭୟଙ୍କ ଗିରଫଦାରୀର ମୁଖ୍ୟ କାରଣ ଭାବେ ଜାମିନଦାରଙ୍କ ଅନୁପସ୍ଥିତିକୁ ଦର୍ଶାଯାଇଛି। CJPର ଆଇନଜୀବୀ ଟିମ୍ ଆବଶ୍ୟକ ଜାମିନ କାଗଜପତ୍ର ସହ ଜାମିନଦାରଙ୍କୁ ଉପସ୍ଥାପନ କରି ଉଭୟଙ୍କ ମୁକ୍ତି ଦାବି କରିଥିଲେ। ତଥାପି ହେପାଜତ ଅବଧି ବୃଦ୍ଧି ପାଇଛି।
ଅନ୍ୟପଟେ, CJPର ଦାବି ହେଉଛି ଯେ ଆଶୁତୋଷ ଓ ସୌରଭ କେବଳ ଜାତୀୟ ପତାକା ଉତ୍ତୋଳନ ଏବଂ ସ୍ଲୋଗାନ ଦେବା ପାଇଁ ଜନ୍ତରମନ୍ତର ଯାଇଥିଲେ। ଦଳର ନେତା ଅଭିଜିତ ଦୀପକେ ପ୍ରଶାସନ ଜାଣିଶୁଣି ଶୁଣାଣିରେ ବିଳମ୍ବ କରି ନେତାଙ୍କ ମୁକ୍ତି ଅଟକାଉଥିବା ଅଭିଯୋଗ କରିଛନ୍ତି। ଦଳର ଆଇନ ବିଭାଗ ମୁଖ୍ୟ ରତ୍ନା ସିଂହ ମଧ୍ୟ ଶୁଣାଣିକୁ ଜାଣିଶୁଣି ବିଳମ୍ବ କରାଯାଇଥିବା ଅଭିଯୋଗ ଆଣିଛନ୍ତି।
ଏହି ସମୟରେ ଦଳର ପ୍ରତିଷ୍ଠାତା ଅଭିଜିତ ଦୀପକେ ସୋସିଆଲ ମିଡିଆରେ ଉଭୟଙ୍କ ପାଇଁ ଭାବପ୍ରବଣ ବାର୍ତ୍ତା ଲେଖିଛନ୍ତି। ଜେଲ୍ରେ ସେମାନଙ୍କର ଷଷ୍ଠ ଦିନ ଚାଲିଥିବା କହିବା ସହ ତାଙ୍କୁ ବହୁତ ମନେ ପକାଉଥିବା ଲେଖିଛନ୍ତି। ଏହି ଘଟଣାକୁ ନେଇ CJP ଓ ପ୍ରଶାସନ ମଧ୍ୟରେ ବିବାଦ ଆହୁରି ତୀବ୍ର ହୋଇଛି।
