ରାହାଣେଙ୍କ କ୍ୟାରିୟରକୁ ଦେଖିଲେ ତାଙ୍କର ସଂଯମତା ଓ ଶୃଙ୍ଖଳା ସବୁବେଳେ ଉଦାହରଣ ହୋଇ ରହିବ। ୮୫ଟି ଟେଷ୍ଟ ଏବଂ ୯୦ଟି ଦିନିକିଆରେ ଭାରତର ପ୍ରତିନିଧିତ୍ୱ କରିଥିବା ରାହାଣେଙ୍କ ନାମରେ ୮ ହଜାରରୁ ଅଧିକ ରନ୍ ରହିଛି।
ଭାରତୀୟ କ୍ରିକେଟର ଅନ୍ୟତମ ଶାନ୍ତ, ସଂଯମୀ ଏବଂ ଭରସାଯୋଗ୍ୟ ବ୍ୟାଟର ହେଉଛନ୍ତି ଅଜିଙ୍କ୍ୟ ରାହାଣେ। ଯେତେବେଳେ ଦଳ ସଙ୍କଟରେ ପଡ଼େ, ସେତେବେଳେ ତାଙ୍କ ବ୍ୟାଟ୍ରୁ ବାହାରୁଥିବା ପ୍ରତିଟି ସଟ୍ ପ୍ରଶଂସକଙ୍କୁ ଆଶ୍ୱସ୍ତି ଦିଏ। ଏବେ ୩୮ ବର୍ଷୀୟ ଏହି ଅଭିଜ୍ଞ ବ୍ୟାଟର ଭାରତୀୟ ଘରୋଇ ତଥା ଅନ୍ତର୍ଜାତୀୟ କ୍ରିକେଟରୁ ଅବସର ନେଇ ସାରିଥିଲେ ମଧ୍ୟ ତାଙ୍କ କ୍ରିକେଟ୍ ଯାତ୍ରାରେ ପୂର୍ଣ୍ଣଛେଦ ପଡ଼ିନାହିଁ। ବରଂ ୟୁରୋପର ପଡ଼ିଆରେ ଏକ ରୋମାଞ୍ଚକର ‘ଦ୍ୱିତୀୟ ଇନିଂସ’ ଆରମ୍ଭ କରିବାକୁ ସେ ସମ୍ପୂର୍ଣ୍ଣ ପ୍ରସ୍ତୁତ।
ଜୁଲାଇ ୩୦ରେ ଭାରତୀୟ କ୍ରିକେଟର ସମସ୍ତ ଫର୍ମାଟରୁ ବିଦାୟ ନେଇଥିବା ରାହାଣେ ଏବେ ପ୍ରଥମ ଥର ପାଇଁ ଆୟୋଜିତ ହେଉଥିବା ‘ୟୁରୋପୀୟ ଟି-୨୦ ପ୍ରିମିୟର ଲିଗ୍’ରେ ନିଜର ଜଲୱା ଦେଖାଇବେ। ବିସିସିଆଇ ନିୟମ ଅନୁଯାୟୀ ଅବସର ପରେ ଜଣେ ଖେଳାଳି ବିଦେଶୀ ଲିଗ୍ରେ ଖେଳିପାରିବେ, ଆଉ ରାହାଣେ ଏହି ସୁଯୋଗକୁ ହାତଛଡ଼ା କରିନାହାନ୍ତି। ଏହି ଟୁର୍ଣ୍ଣାମେଣ୍ଟରେ ‘ଆମଷ୍ଟରଡାମ ଫ୍ଲେମ୍ସ’ ତାଙ୍କୁ ନିଜର ‘ମାର୍କି ପ୍ଲେୟାର’ ଭାବେ ଚୟନ କରିଛି । ଅଷ୍ଟ୍ରେଲିଆର ତାରକା ଅଲରାଉଣ୍ଡର ମିଚେଲ ମାର୍ଶଙ୍କ ଅଧିନାୟକତ୍ୱରେ ରାହାଣେ ପଡ଼ିଆକୁ ଓହ୍ଲାଇବେ।
ଏହି ଲିଗ୍ କେବଳ ଏକ ସାଧାରଣ ଟୁର୍ଣ୍ଣାମେଣ୍ଟ ନୁହେଁ, ବରଂ ବିଶ୍ୱ କ୍ରିକେଟର ଦିଗଜ୍ଜମାନଙ୍କର ଏକ ମହାମିଳନ । ଆୟରଲ୍ୟାଣ୍ଡ, ସ୍କଟଲ୍ୟାଣ୍ଡ ଏବଂ ନେଦରଲ୍ୟାଣ୍ଡ କ୍ରିକେଟ ବୋର୍ଡର ମିଳିତ ପ୍ରୟାସରେ ଆୟୋଜିତ ଏହି ଲିଗ୍ ଅଗଷ୍ଟ ୨୬ରୁ ସେପ୍ଟେମ୍ବର ୨୦ ଯାଏଁ ଚାଲିବ। ଏଥିରେ କେବଳ ରାହାଣେ ନୁହଁନ୍ତି, ବରଂ ଭାରତର ପୂର୍ବତନ କୋଚ୍ ରାହୁଲ ଦ୍ରାବିଡ ‘ଡବଲିନ ଗାର୍ଡିଆନ୍ସ’ର ସହ-ମାଲିକ ଭାବେ ଯୋଡ଼ି ହୋଇଥିବା ବେଳେ ରବିଚନ୍ଦ୍ରନ ଅଶ୍ୱିନ ସେହି ଦଳରେ ସାମିଲ ଅଛନ୍ତି । ଏହା ସହିତ କ୍ରିସ୍ ଗେଲ୍, ଷ୍ଟିଭ୍ ୱା, ମାଥ୍ୟୁ ହେଡେନ୍ ଏବଂ ଗ୍ଲେନ୍ ମ୍ୟାକ୍ସୱେଲଙ୍କ ଭଳି ବଡ଼ ବଡ଼ ନାଁ ଏହି ଲିଗ୍ର ଚମକକୁ ଦ୍ୱିଗୁଣିତ କରୁଛନ୍ତି।
ରାହାଣେଙ୍କ କ୍ୟାରିୟରକୁ ଦେଖିଲେ ତାଙ୍କର ସଂଯମତା ଓ ଶୃଙ୍ଖଳା ସବୁବେଳେ ଉଦାହରଣ ହୋଇ ରହିବ। ୮୫ଟି ଟେଷ୍ଟ ଏବଂ ୯୦ଟି ଦିନିକିଆରେ ଭାରତର ପ୍ରତିନିଧିତ୍ୱ କରିଥିବା ରାହାଣେଙ୍କ ନାମରେ ୮ ହଜାରରୁ ଅଧିକ ରନ୍ ରହିଛି। ତେବେ ୨୦୨୦-୨୧ର ଐତିହାସିକ ବର୍ଡର-ଗାଭାସ୍କର ଟ୍ରଫି ବିଜୟରେ ତାଙ୍କର ନେତୃତ୍ୱ ଓ ଶତକୀୟ ପାଳି ଭାରତୀୟ କ୍ରିକେଟ ଇତିହାସରେ ସ୍ୱର୍ଣ୍ଣ ଅକ୍ଷରରେ ଲିପିବଦ୍ଧ ହୋଇ ରହିବ। ଆଇପିଏଲରେ ମଧ୍ୟ ସେ ନିଜର ଦକ୍ଷତା ପ୍ରମାଣିତ କରିଛନ୍ତି। ବିଶେଷ କରି ୨୦୨୬ ଆଇପିଏଲରେ କୋଲକାତା ନାଇଟ୍ ରାଇଡର୍ସର ଅଧିନାୟକ ଭାବେ ତାଙ୍କର ପ୍ରଦର୍ଶନ ବେଶ୍ ପ୍ରଭାବଶାଳୀ ଥିଲା।
୩୮ ବର୍ଷ ବୟସରେ ଯେତେବେଳେ ଅନେକ ଖେଳାଳି କୋଚିଂ କିମ୍ବା କମେଣ୍ଟ୍ରିକୁ ବାଛନ୍ତି, ସେତେବେଳେ ରାହାଣେଙ୍କ ପଡ଼ିଆକୁ ଓହ୍ଲାଇବା ଜଣାଇ ଦେଉଛି ଯେ ତାଙ୍କ ଭିତରେ ଥିବା କ୍ରିକେଟ୍ ପାଇଁ ଭୋକ ଏବେ ବି ବାକି ଅଛି। ୟୁରୋପର ଶୀତଳ ପରିବେଶରେ ରାହାଣେଙ୍କ ବ୍ୟାଟ୍ର ଗରମ ଦେଖିବା ପାଇଁ ପ୍ରଶଂସକମାନେ ଏବେ ଚାହିଁ ରହିଛନ୍ତି । ଏହି ନୂଆ ଇନିଂସ କେବଳ ତାଙ୍କ ପାଇଁ ନୁହେଁ, ବରଂ ୟୁରୋପୀୟ କ୍ରିକେଟର ପ୍ରସାର ପାଇଁ ମଧ୍ୟ ଏକ ଶୁଭ ସଙ୍କେତ।
