ବନ୍ୟା ବିଭୀଷିକା ମଧ୍ୟରେ ପୁଣି ଏକ ଦୁଃଖଦ ଖବର । ନଦୀରେ ଗାଧୋଇବା ବେଳେ ପ୍ରଖର ସ୍ରୋତରେ ଭାସିଯାଇ ଜଣେ ଛାତ୍ରୀଙ୍କ ମୃତ୍ୟୁ ଘଟିଛି । ଏଭଳି ମର୍ମନ୍ତୁଦ ଘଟଣା ଭଦ୍ରକ ଜିଲ୍ଲା ଦହୀପୁର ପଞ୍ଚାୟତର ନାରାୟଣପୁର ନାଥସାହି ଅଞ୍ଚଳରୁ ସାମ୍ନାକୁ ଆସିଛି ।
ବନ୍ୟା ବିଭୀଷିକା ମଧ୍ୟରେ ପୁଣି ଏକ ଦୁଃଖଦ ଖବର । ନଦୀରେ ଗାଧୋଇବା ବେଳେ ପ୍ରଖର ସ୍ରୋତରେ ଭାସିଯାଇ ଜଣେ ଛାତ୍ରୀଙ୍କ ମୃତ୍ୟୁ ଘଟିଛି । ଏଭଳି ମର୍ମନ୍ତୁଦ ଘଟଣା ଭଦ୍ରକ ଜିଲ୍ଲା ଦହୀପୁର ପଞ୍ଚାୟତର ନାରାୟଣପୁର ନାଥସାହି ଅଞ୍ଚଳରୁ ସାମ୍ନାକୁ ଆସିଛି । ସୂଚନା ଅନୁସାରେ, ଭାଲୁକୁଣି ଓଷା ପାଇଁ ଆଜି ସକାଳେ ନାଥସାହିର ରେବ ନଦୀକୁ ଗାଧୋଇବା ପାଇଁ ଚାରିଜଣ ଯୁବତୀ ଯାଇଥିଲେ । ଗାଧୋଇବା ସମୟରେ ହଠାତ୍ ଜଣଙ୍କର ଗୋଡ଼ ଖସିଯାଇଥିଲା । ଏହାପରେ ନଦୀର ପ୍ରଖର ସ୍ରୋତରେ ଚାରିଜଣ ଯୁବତୀ ଭାସିଯାଇଥିଲେ । ତେବେ ତିନିଜଣ ଯୁବତୀ କିଛି ଦୂର ଭାସିଯାଇ ଆହତ ଅବସ୍ଥାରେ କୂଳରେ ଲାଗିଥିଲେ । ଗ୍ରାମବାସୀ ତୁରନ୍ତ ସେମାନଙ୍କୁ ଉଦ୍ଧାର କରିଥିଲେ । କିନ୍ତୁ ସାଙ୍ଗରେ ଥିବା ଆଉ ଜଣେ ଛାତ୍ରୀଙ୍କ କୌଣସି ପତ୍ତା ମିଳିନଥିଲା ।ନିଖୋଜ ଛାତ୍ରୀଙ୍କ ସନ୍ଧାନରେ ଗ୍ରାମବାସୀ ନଦୀରେ ଖୋଜାଖୋଜି ଆରମ୍ଭ କରିଥିଲେ । ଦୀର୍ଘ ସମୟର ତଲାସ ପରେ ନାଥସାହିର ଚକ୍ରଧର ନାଥଙ୍କ ଝିଅ ଇପ୍ସିତା ନାଥଙ୍କୁ ନଦୀ ପାଣିରୁ ଉଦ୍ଧାର କରାଯାଇଥିଲା ।
ପରେ ତାଙ୍କୁ ତୁରନ୍ତ ଭଦ୍ରକ ମେଡିକାଲକୁ ନିଆଯାଇଥିଲା । କିନ୍ତୁ ଡାକ୍ତର ପରୀକ୍ଷା କରି ଇପ୍ସିତାଙ୍କୁ ମୃତ ଘୋଷଣା କରିଥିଲେ । ଏହି ଖବର ପ୍ରଚାର ହେବା ପରେ ଇପ୍ସିତାଙ୍କ ପରିବାର ଓ ପରିଚିତଙ୍କ ମଧ୍ୟରେ ଶୋକର ଛାୟା ଖେଳିଯାଇଛି । ଏପଟେ ଘଟଣା ପରେ ଭଦ୍ରକ ମେଡିକାଲ ପରିସରରେ ମଧ୍ୟ ଶୋକାକୁଳ ପରିବେଶ ସୃଷ୍ଟି ହୋଇଛି । ବନ୍ୟା ସ୍ଥିତି ଯୋଗୁଁ ନଦୀ ଓ ଜଳାଶୟରେ ପାଣିର ସ୍ରୋତ ବଢ଼ିଥିବାରୁ ଏଭଳି ଅଘଟଣର ଆଶଙ୍କା ବଢ଼ିଛି । ଏହି ଘଟଣା ପୁଣିଥରେ ବନ୍ୟା ସମୟରେ ନଦୀ, ନାଳ ଓ ଜଳାଶୟ ନିକଟକୁ ଯିବା ବେଳେ ଅତ୍ୟଧିକ ସତର୍କତାର ଆବଶ୍ୟକତାକୁ ସାମ୍ନାକୁ ଆଣିଛି । ବିଶେଷକରି ପ୍ରଖର ସ୍ରୋତ ଥିବା ସମୟରେ ଗାଧୋଇବା କିମ୍ବା ନଦୀରେ ପ୍ରବେଶ କରିବା ଅତ୍ୟନ୍ତ ବିପଜ୍ଜନକ ହୋଇପାରେ । ଇପ୍ସିତାଙ୍କ ଅକାଳ ମୃତ୍ୟୁରେ ସ୍ଥାନୀୟ ଅଞ୍ଚଳରେ ମଧ୍ୟ ଦୁଃଖର ପରିବେଶ । ପର୍ବ ପାଇଁ ଖୁସିରେ ବାହାରିଥିବା ଚାରିଜଣଙ୍କ ମଧ୍ୟରୁ ଜଣଙ୍କ ଜୀବନ ଏଭଳି ଅଚାନକ ଚାଲିଯିବା ଘଟଣା ସମସ୍ତଙ୍କୁ ମର୍ମାହତ କରିଛି ।
