ଅନେକ ସମୟରେ ରୁଟି ତିଆରି କରିବାର କିଛି ସମୟ ମଧ୍ୟରେ ଏହା ଟାଣ ହୋଇଯାଏ | ଏହି ସମସ୍ୟାକୁ ନେଇ ଗୃହିଣୀମାନେ ଅଧିକ ଅସୁବିଧାର ସାମ୍ନା କରନ୍ତି | ଅଫିସ୍ କିମ୍ବା ସ୍କୁଲ୍ ପାଇଁ ଲଞ୍ଚବକ୍ସରେ ରୁଟି ପ୍ୟାକ୍ କରିବା ପରେ ତାହା ଶୁଖି ଟାଣ ହୋଇଯିବା ଏକ ସାଧାରଣ ସମସ୍ୟା
ଅନେକ ସମୟରେ ରୁଟି ତିଆରି କରିବାର କିଛି ସମୟ ମଧ୍ୟରେ ଏହା ଟାଣ ହୋଇଯାଏ | ଏହି ସମସ୍ୟାକୁ ନେଇ ଗୃହିଣୀମାନେ ଅଧିକ ଅସୁବିଧାର ସାମ୍ନା କରନ୍ତି | ଅଫିସ୍ କିମ୍ବା ସ୍କୁଲ୍ ପାଇଁ ଲଞ୍ଚବକ୍ସରେ ରୁଟି ପ୍ୟାକ୍ କରିବା ପରେ ତାହା ଶୁଖି ଟାଣ ହୋଇଯିବା ଏକ ସାଧାରଣ ସମସ୍ୟା । ତେବେ କିଛି ସହଜ ଏବଂ ଘରୋଇ ଉପାୟ ଆପଣାଇ ଆପଣ ୬ ଘଣ୍ଟା ପର୍ଯ୍ୟନ୍ତ ରୁଟିକୁ ନରମ ରଖିପାରିବେ ।
୧. ଅଟା ଚକଟିବାରେ ଧ୍ୟାନ ଦିଅନ୍ତୁ
ରୁଟିକୁ ଦୀର୍ଘ ସମୟ ପର୍ଯ୍ୟନ୍ତ ନରମ ରଖିବାର ପ୍ରକ୍ରିୟା ଅଟା ଚକଟିବାରୁ ହିଁ ଆରମ୍ଭ ହୋଇଥାଏ। ଅଟା ଚକଟିବା ପାଇଁ ଉଷୁମ ପାଣି କିମ୍ବା ଅଳ୍ପ ଖୀର ବ୍ୟବହାର କରନ୍ତୁ। ଅଟାରେ ୧-୨ ଚାମଚ ଘିଅ କିମ୍ବା ତେଲ ମିଶାଇ ଭଲଭାବେ ଦଳିବା ପରେ ୨୦ ରୁ ୩୦ ମିନିଟ୍ ପର୍ଯ୍ୟନ୍ତ ଢାଙ୍କି ରଖନ୍ତୁ। ଏହାଦ୍ୱାରା ରୁଟି ବହୁତ କୋମଳ ହୋଇଥାଏ।
୨. ତାୱାରୁ ଓହ୍ଲାଇ ସଙ୍ଗେ ସଙ୍ଗେ ପ୍ୟାକ୍ କରନ୍ତୁ ନାହିଁ
ତାୱାରୁ ରୁଟି ଓହ୍ଲାଇବା କ୍ଷଣି ତାହାକୁ ସିଧାସଳଖ ଡବାରେ ରଖିଲେ ସେଥିରୁ ନିର୍ଗତ ହେଉଥିବା ବାଷ୍ପ ଡବା ଭିତରେ ଜମି ପାଣି ହୋଇଯାଏ, ଯାହା ରୁଟିକୁ ଓଦା ଓ ରବର ଭଳି କରିଦିଏ। ରୁଟି ସେକିବା ପରେ ତାହାକୁ ୩୦ ରୁ ୬୦ ସେକେଣ୍ଡ ପାଇଁ କୌଣସି ଖୋଲା ପ୍ଲେଟ୍ କିମ୍ବା ସଫା କପଡ଼ା ଉପରେ ରଖି ଅତିରିକ୍ତ ବାଷ୍ପ ବାହାରିଯିବାକୁ ଦିଅନ୍ତୁ। ତେବେ ଅଧିକ ସମୟ ଖୋଲା ଛାଡ଼ନ୍ତୁ ନାହିଁ, ନଚେତ୍ ରୁଟି ଶୁଖିଯିବ।
୩. ରୁଟି ଭଲଭାବେ ଫୁଲିବା ଜରୁରୀ
ରୁଟି ଭଲଭାବେ ଫୁଲିଲେ ତା’ ଭିତରେ ବାଷ୍ପର ଏକ ସୂକ୍ଷ୍ମ ସ୍ତର ତିଆରି ହୁଏ, ଯାହା ଭିତରର ଆର୍ଦ୍ରତା (Moisture) କୁ ବଜାୟ ରଖେ। ଯଦି ରୁଟି ଠିକ୍ ଭାବେ ନଫୁଲେ କିମ୍ବା ଅଧିକ ସେକି ହୋଇଯାଏ, ତେବେ ତାହା ଶୀଘ୍ର ଶକ୍ତ ହୋଇଯାଏ।
ରୁଟିକୁ ଟିଫିନ୍ରେ ସିଧାସଳଖ ନରଖି ଏକ ସଫା, ଶୁଖିଲା ସୁତା କପଡ଼ାରେ ଗୁଡ଼ାଇ ରଖନ୍ତୁ। ସୁତା କପଡ଼ା ଅତିରିକ୍ତ ଆର୍ଦ୍ରତାକୁ ଶୋଷିନିଏ ଏବଂ ରୁଟିର ନରମପଣକୁ ବଜାୟ ରଖେ। ଟିଫିନର ତଳ ଭାଗରେ ଏକ ଶୁଖିଲା କପଡ଼ା କିମ୍ବା ଫୁଡ୍-ଗ୍ରେଡ୍ ପେପର୍ ରଖିବା ଦ୍ୱାରା ସବୁଠୁ ତଳେ ଥିବା ରୁଟି ଓଦା ହେବାରୁ ରକ୍ଷା ପାଇଥାଏ।
ତରକାରୀ ସହ ଏକାଠି ରଖନ୍ତୁ ନାହିଁ
ରୁଟି ଏବଂ ତରକାରୀକୁ ଗୋଟିଏ ଡବାରେ ରଖିବା ଦ୍ୱାରା ତରକାରୀର ବାଷ୍ପ ରୁଟିକୁ ଓଦା କରିଦିଏ। ତେଣୁ ରୁଟି ଏବଂ ତରକାରୀ ପାଇଁ ଅଲଗା ଅଲଗା କଣ୍ଟେନର୍ ବ୍ୟବହାର କରନ୍ତୁ।
