ଜେଲ୍ ପ୍ରଶାସନ ଅନୁସାରେ, ମୁସ୍କାନ ଓ ସାହିଲ ପୂର୍ବ ଅପେକ୍ଷା କମ୍ ଖାଦ୍ୟ ଖାଉଛନ୍ତି। ଅନ୍ୟ କଏଦୀଙ୍କ ସହ କଥାବାର୍ତ୍ତା ମଧ୍ୟ କମାଇ ଦେଇଛନ୍ତି। ଉଭୟ ଏକୁଟିଆ ରହିବାକୁ ଅଧିକ ପସନ୍ଦ କରୁଛନ୍ତି।
ଉତ୍ତରପ୍ରଦେଶର ମେରଠର ବହୁଚର୍ଚ୍ଚିତ ନୀଳ ଡ୍ରମ୍ ହତ୍ୟାକାଣ୍ଡ ମାମଲାରେ ଏବେ ସମସ୍ତଙ୍କ ନଜର ଅଦାଲତଙ୍କ ରାୟ ଉପରେ। ମର୍ଚ୍ଚାଣ୍ଟ ନେଭି ଅଧିକାରୀ ସୌରଭ ରାଜପୁତଙ୍କ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ମୁସ୍କାନ ରସ୍ତୋଗୀ ଓ ସାହିଲ ଶୁକ୍ଳାଙ୍କ ଦଣ୍ଡ ଉପରେ ଅକ୍ଟୋବର ୧୪ ତାରିଖରେ ନିଷ୍ପତ୍ତି ହେବ। ରାୟ ଘୋଷଣା ପୂର୍ବରୁ ମେରଠ ଜେଲ୍ରେ ଉଭୟଙ୍କ ବ୍ୟବହାରରେ ପରିବର୍ତ୍ତନ ଦେଖାଦେଇଥିବା ଜଣାପଡ଼ିଛି।
ଜେଲ୍ ପ୍ରଶାସନ ଅନୁସାରେ, ମୁସ୍କାନ ଓ ସାହିଲ ପୂର୍ବ ଅପେକ୍ଷା କମ୍ ଖାଦ୍ୟ ଖାଉଛନ୍ତି। ଅନ୍ୟ କଏଦୀଙ୍କ ସହ କଥାବାର୍ତ୍ତା ମଧ୍ୟ କମାଇ ଦେଇଛନ୍ତି। ଉଭୟ ଏକୁଟିଆ ରହିବାକୁ ଅଧିକ ପସନ୍ଦ କରୁଛନ୍ତି। ତେବେ ଜେଲ୍ର ବରିଷ୍ଠ ଅଧୀକ୍ଷକ ଡାକ୍ତର ବୀରେଶ ରାଜ ଶର୍ମାଙ୍କ କହିବା ଅନୁସାରେ, ଉଭୟଙ୍କ ସ୍ୱାସ୍ଥ୍ୟାବସ୍ଥା ଏବେ ସ୍ୱାଭାବିକ ରହିଛି। ଡାକ୍ତରମାନେ ନିୟମିତ ସେମାନଙ୍କ ସ୍ୱାସ୍ଥ୍ୟ ଯାଞ୍ଚ କରୁଛନ୍ତି।
ଏହି ମାମଲାରେ ମୁସ୍କାନଙ୍କ ସବୁଠାରୁ ବଡ଼ ଚିନ୍ତା ହେଉଛି ନିଜ ବଡ଼ ଝିଅକୁ ଭେଟିବା। ସେ ବାରମ୍ବାର ଜେଲ୍ ଅଧିକାରୀଙ୍କୁ ଝିଅ ସହ ଦେଖା କରାଇବାକୁ ଅନୁରୋଧ କରୁଛନ୍ତି। କିନ୍ତୁ ଜେଲ୍ ପ୍ରଶାସନ ପାଖରେ ଝିଅର ଠିକଣା କିମ୍ବା ଯୋଗାଯୋଗ ନମ୍ବର ନଥିବାରୁ ସାକ୍ଷାତ କରାଇବା ସମ୍ଭବ ହେଉନାହିଁ। ଏହାପରେ ମୁସ୍କାନଙ୍କୁ ଜେଲ୍ ନିୟମ ଅନୁସାରେ ପରିବାରକୁ ଚିଠି ଲେଖିବାର ସୁବିଧା ଦିଆଯାଇଛି। ଏବେ ସେ ନିଜ ପରିବାରକୁ ଚିଠି ଲେଖି ଝିଅ ସହ ଭେଟ କରାଇବାକୁ ଅନୁରୋଧ କରିପାରିବେ। ତେବେ ଏହି ସାକ୍ଷାତ କେବେ ହେବ, ତାହା ସ୍ପଷ୍ଟ ହୋଇନାହିଁ।
ଅନ୍ୟପଟେ ସାହିଲ ଶୁକ୍ଳା ମଧ୍ୟ ନିଜର ଚାଷବାସ ସମ୍ପର୍କିତ କାମ ବନ୍ଦ କରିଦେଇଛି। ଦଣ୍ଡ ଘୋଷଣା ପରେ ହିଁ ଆଗକୁ କ’ଣ କରିବ, ସେ ନିଷ୍ପତ୍ତି ନେବ ବୋଲି ଜେଲ୍ ଅଧିକାରୀଙ୍କୁ କହିଥିବା ସୂଚନା ମିଳିଛି। ମୁସ୍କାନ ମଧ୍ୟ ପୂର୍ବପରି ପୂଜାପାଠ କରୁନାହାନ୍ତି ଏବଂ କମ୍ କଥା ହେଉଛନ୍ତି।
ସୂଚନାଯୋଗ୍ୟ, ୨୦୨୫ ମାର୍ଚ୍ଚରେ ସୌରଭ ରାଜପୁତଙ୍କ ହତ୍ୟା ହୋଇଥିଲା। ହତ୍ୟା ପରେ ତାଙ୍କ ମୃତଦେହକୁ ଖଣ୍ଡଖଣ୍ଡ କରି ସିମେଣ୍ଟ ଭର୍ତ୍ତି ନୀଳ ଡ୍ରମ୍ରେ ଲୁଚାଯାଇଥିବା ଅଭିଯୋଗ ହୋଇଥିଲା। ସେପ୍ଟେମ୍ବର ୩୦, ୨୦୨୬ରେ ଅଦାଲତ ମୁସ୍କାନ ଓ ସାହିଲଙ୍କୁ ଦୋଷୀ ସାବ୍ୟସ୍ତ କରିଥିଲେ। ଏବେ ଅକ୍ଟୋବର ୧୪ରେ ଉଭୟଙ୍କୁ କେଉଁ ଦଣ୍ଡ ମିଳିବ, ତାହା ଉପରେ ସମସ୍ତଙ୍କ ନଜର ରହିଛି।
