ଜୁଲାଇ ୩ ତାରିଖରେ OTT ପ୍ଲାଟଫର୍ମ ZEE5 ରେ ମୁକ୍ତିଲାଭ କରିଥିବା ଏହି ଫିଲ୍ମକୁ ମାତ୍ର ଦୁଇ ଦିନ ପରେ ଭାରତରେ ଉପଲବ୍ଧ ତାଲିକାରୁ ହଟାଇ ଦିଆଯାଇଛି। ବର୍ତ୍ତମାନ ଭାରତର ଦର୍ଶକମାନେ ଏହି ଫିଲ୍ମକୁ ଦେଖିପାରୁ ନାହାନ୍ତି ।
ଦିଲଜିତ ଦୋସାଞ୍ଜ ଅଭିନୀତ ବହୁଚର୍ଚ୍ଚିତ ଫିଲ୍ମ ‘ସତଲୁଜ’(ଯାହାର ପୁର୍ବ ନାମ ପଞ୍ଜାବ 95) ପୁଣିଥରେ ବିବାଦରେ ରହିଛି । ଜୁଲାଇ ୩ ତାରିଖରେ OTT ପ୍ଲାଟଫର୍ମ ZEE5 ରେ ମୁକ୍ତିଲାଭ କରିଥିବା ଏହି ଫିଲ୍ମକୁ ମାତ୍ର ଦୁଇ ଦିନ ପରେ ଭାରତରେ ଉପଲବ୍ଧ ତାଲିକାରୁ ହଟାଇ ଦିଆଯାଇଛି। ବର୍ତ୍ତମାନ ଭାରତର ଦର୍ଶକମାନେ ଏହି ଫିଲ୍ମକୁ ଦେଖିପାରୁ ନାହାନ୍ତି । ତେବେ ବିଦେଶର କେତେକ ଅଞ୍ଚଳରେ ଫିଲ୍ମଟି ଦେଖିବାକୁ ମିଳୁଛି। ଏହି ଫିଲ୍ମଟି ପଞ୍ଜାବର ପ୍ରସିଦ୍ଧ କର୍ମୀ ଜସୱନ୍ତ ସିଂହ ଖାଲରାଙ୍କ ଜୀବନ ଉପରେ ଆଧାରିତ। ସେ ୧୯୯୦ ଦଶକରେ ପଞ୍ଜାବରେ ହୋଇଥିବା କଥିତ ବେଆଇନ ହତ୍ୟା ଓ ଗୁପ୍ତ ଦାହ ସମ୍ପର୍କିତ ମାମଲାକୁ ସାମ୍ନାକୁ ଆଣିଥିଲେ। ତାଙ୍କ ଜୀବନ ଓ ସଂଘର୍ଷକୁ ଆଧାର କରି ନିର୍ଦ୍ଦେଶକ ହନି ତ୍ରେହାନ ଏହି ସିନେମା ନିର୍ମାଣ କରିଛନ୍ତି। ଫିଲ୍ମରେ ଦିଲଜିତ ଦୋସାଞ୍ଜ ମୁଖ୍ୟ ଭୂମିକାରେ ଅଭିନୟ କରିଛନ୍ତି ।
ଏହି ଫିଲ୍ମ ୨୦୨୨ରେ ପ୍ରସ୍ତୁତ ହୋଇଥିଲେ ମଧ୍ୟ ଏହାର ମୁକ୍ତି ଲଗାତାର ବିଳମ୍ବ ହୋଇଆସୁଥିଲା। କେନ୍ଦ୍ରୀୟ ଫିଲ୍ମ ପ୍ରମାଣପତ୍ର ବୋର୍ଡ (CBFC) ଫିଲ୍ମରେ ପ୍ରାୟ ୧୨୦ରୁ ଅଧିକ ପରିବର୍ତ୍ତନ ଓ କଟ୍ କରିବାକୁ ନିର୍ଦ୍ଦେଶ ଦେଇଥିଲା। ଏହାକୁ ନେଇ ନିର୍ମାତା ଓ ସେନ୍ସର ବୋର୍ଡ ମଧ୍ୟରେ ମତଭେଦ ଦେଖାଦେଇଥିଲା। ପରେ ଫିଲ୍ମର ନାମ ‘ପଞ୍ଜାବ 95’ରୁ ବଦଳାଇ ‘ସତଲୁଜ’ ରଖାଯାଇଥିଲା ଏବଂ ଥିଏଟର ପରିବର୍ତ୍ତେ OTTରେ ମୁକ୍ତି ପାଇଥିଲା । କିନ୍ତୁ OTTରେ ରିଲିଜ୍ ହେବାର ମାତ୍ର ଦୁଇ ଦିନ ମଧ୍ୟରେ ଫିଲ୍ମକୁ ଭାରତରେ ହଟାଇ ଦିଆଯିବା ପରେ ଏହାକୁ ନେଇ ପୁଣି ବିବାଦ ଆରମ୍ଭ ହୋଇଛି। ZEE5 ପକ୍ଷରୁ କୁହାଯାଇଛି ଯେ, କିଛି ଆଇନଗତ ଓ ନିୟାମକ କାରଣରୁ ଫିଲ୍ମଟି ବର୍ତ୍ତମାନ ଭାରତରେ ଉପଲବ୍ଧ ନାହିଁ। କମ୍ପାନୀ ଏହାକୁ ପୁଣିଥରେ ଦର୍ଶକଙ୍କ ପାଇଁ ଉପଲବ୍ଧ କରାଇବାକୁ ଆଇନଗତ ବିକଳ୍ପ ଉପରେ କାମ କରୁଥିବା ମଧ୍ୟ ସୂଚନା ଦେଇଛି ।
ଏପଟେ ଦିଲଜିତ ଦୋସାଞ୍ଜ ସୋସିଆଲ ମିଡିଆରେ ପରୋକ୍ଷ ଭାବେ ନିଜ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, ସତ୍ୟ ଓ ନ୍ୟାୟ ପାଇଁ ସଂଘର୍ଷ କେବେ ବନ୍ଦ ହୁଏ ନାହିଁ। ଫିଲ୍ମର ନିର୍ଦ୍ଦେଶକ ହନି ତ୍ରେହାନ ମଧ୍ୟ ଆଶା ପ୍ରକାଶ କରିଛନ୍ତି ଯେ ଦିନେ ନା ଦିନେ ଭାରତୀୟ ଦର୍ଶକ ଏହି ଫିଲ୍ମକୁ ଦେଖିବାର ସୁଯୋଗ ପାଇବେ । ‘ସତଲୁଜ’କୁ ନେଇ ହୋଇଥିବା ଏହି ବିବାଦ ପୁଣିଥରେ ସେନ୍ସରସିପ୍, ଅଭିବ୍ୟକ୍ତିର ସ୍ୱାଧୀନତା ଓ ସମ୍ବେଦନଶୀଳ ବିଷୟ ଉପରେ ନିର୍ମିତ ଫିଲ୍ମଗୁଡ଼ିକର ମୁକ୍ତିକୁ ନେଇ ଦେଶବ୍ୟାପୀ ଆଲୋଚନାକୁ ଜୋରଦାର କରିଛି ।
