ନୂଆଦିଲ୍ଲୀ ନ ଆସି ଭାରତ ଗସ୍ତ ଶେଷ କରିଥିବା ଆମେରିକାର ଜଣେ ଶୀର୍ଷ ମନ୍ତ୍ରୀ ଭାବେ ରୁବିଓଙ୍କ ଏହି ଯାତ୍ରାକୁ ଦେଖାଯାଉଛି ।ଜାମନଗରରେ ଥିବା ରିଲାଏନ୍ସର ତୈଳ ବିଶୋଧନାଗାର ପରିଦର୍ଶନ କରିବାକୁ ରୁବିଓ ଯାଇଥିଲେ ।
ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଗୁଜରାଟର ଜାମନଗରରୁ ସିଧା ଆମେରିକା ଫେରିଛନ୍ତି । ଏହି ଗସ୍ତକୁ ନେଇ ଚର୍ଚ୍ଚା ବଢ଼ିଛି । ରିପୋର୍ଟ ଅନୁସାରେ, ନୂଆଦିଲ୍ଲୀ ନ ଆସି ଭାରତ ଗସ୍ତ ଶେଷ କରିଥିବା ଆମେରିକାର ଜଣେ ଶୀର୍ଷ ମନ୍ତ୍ରୀ ଭାବେ ରୁବିଓଙ୍କ ଏହି ଯାତ୍ରାକୁ ଦେଖାଯାଉଛି ।ଜାମନଗରରେ ଥିବା ରିଲାଏନ୍ସର ତୈଳ ବିଶୋଧନାଗାର ପରିଦର୍ଶନ କରିବାକୁ ରୁବିଓ ଯାଇଥିଲେ । ଏହି ଗସ୍ତ ସମୟରେ ସେ କେବଳ ରିଲାଏନ୍ସ ଗ୍ରୁପ୍ର ମୁଖ୍ୟ ମୁକେଶ ଅମ୍ବାନୀଙ୍କୁ ନୁହେଁ, ଭାରତର ଆଉ ଦୁଇ ପ୍ରମୁଖ ଶିଳ୍ପପତିଙ୍କୁ ମଧ୍ୟ ଭେଟିଥିଲେ ।
ଜାମନଗର ଯିବା ପୂର୍ବରୁ ଆମେରିକାର ବୈଦେଶିକ ମନ୍ତ୍ରୀ ଅଦାନୀ ଗ୍ରୁପ୍ର ଅଧ୍ୟକ୍ଷ ଗୌତମ ଅଦାନୀଙ୍କ ସହ ସାକ୍ଷାତ କରିଥିଲେ । ଏହା ସହ ଟାଟା ସନ୍ସର ଅଧ୍ୟକ୍ଷ ଏନ୍. ଚନ୍ଦ୍ରଶେଖରନଙ୍କୁ ମଧ୍ୟ ଭେଟିଥିଲେ। ଏହି ସାକ୍ଷାତକାରଗୁଡ଼ିକ ଭାରତ ଓ ଆମେରିକା ମଧ୍ୟରେ ବାଣିଜ୍ୟ, ଶିଳ୍ପ ଓ ପ୍ରଯୁକ୍ତି କ୍ଷେତ୍ରର ସମ୍ପର୍କକୁ ନେଇ ଆଲୋଚନାକୁ ଗୁରୁତ୍ୱ ଦେଇଛି । ଏହା ପୂର୍ବରୁ ରୁବିଓ ମୁମ୍ବାଇ ଗସ୍ତ କରିଥିଲେ। ସେଠାରେ ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କରଙ୍କ ସହ ତାଙ୍କର ସାକ୍ଷାତ ହୋଇଥିଲା । ମୁମ୍ବାଇର ଗେଟ୍ୱେ ଅଫ୍ ଇଣ୍ଡିଆ ନିକଟରେ ଭାରତରେ ନିଯୁକ୍ତ ଆମେରିକୀୟ ରାଷ୍ଟ୍ରଦୂତ ସର୍ଜିଓ ଗୋରଙ୍କ ସହ ମଧ୍ୟ ସେ ଫଟୋ ସେୟାର କରିଥିଲେ ।
ଅକ୍ଟୋବର ୨୧ରେ ରୁବିଓ ଗୁଜରାଟର ଜାମନଗରସ୍ଥିତ ରିଲାଏନ୍ସ କମ୍ପ୍ଲେକ୍ସ ପରିଦର୍ଶନ କରିଥିଲେ। ସେଠାରେ ରିଲାଏନ୍ସର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ମୁକେଶ ଅମ୍ବାନୀ ଏବଂ ଏକ୍ଜିକ୍ୟୁଟିଭ୍ ଡାଇରେକ୍ଟର ଅନନ୍ତ ଅମ୍ବାନୀଙ୍କ ସହ ତାଙ୍କର ସାକ୍ଷାତ ହୋଇଥିଲା । ଜାମନଗର ରିଫାଇନାରୀକୁ ବିଶ୍ୱର ସର୍ବବୃହତ୍ ଏକକ ସ୍ଥାନଭିତ୍ତିକ ତୈଳ ବିଶୋଧନ କମ୍ପ୍ଲେକ୍ସ ଭାବେ ଗଣାଯାଏ। ଏହି ପରିଦର୍ଶନ ସମୟରେ ରୁବିଓଙ୍କୁ ରିଫାଇନାରୀର ବିଶାଳତା, ଆଧୁନିକ ପ୍ରଯୁକ୍ତି ଓ କାର୍ଯ୍ୟପ୍ରଣାଳୀ ସମ୍ପର୍କରେ ବିସ୍ତୃତ ସୂଚନା ଦିଆଯାଇଥିଲା ।
