ନଭେମ୍ବରରେ ଆମେରିକାରେ ମଧ୍ୟବର୍ତ୍ତୀକାଳୀନ ନିର୍ବାଚନ ପୂର୍ବରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ମାଷ୍ଟରଷ୍ଟ୍ରୋକ୍ ଖେଳି ନିଜର ଲୋକପ୍ରିୟତା ହ୍ରାସ ପାଉଥିବାବେଳେ ଭୋଟରମାନଙ୍କୁ ହାତେଇବା ପାଇଁ ଉପହାରର ବଡ଼ ଥୋପ ପକାଇଛନ୍ତି
ନଭେମ୍ବରରେ ଆମେରିକାରେ ମଧ୍ୟବର୍ତ୍ତୀକାଳୀନ ନିର୍ବାଚନ ପୂର୍ବରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ମାଷ୍ଟରଷ୍ଟ୍ରୋକ୍ ଖେଳି ନିଜର ଲୋକପ୍ରିୟତା ହ୍ରାସ ପାଉଥିବାବେଳେ ଭୋଟରମାନଙ୍କୁ ହାତେଇବା ପାଇଁ ଉପହାରର ବଡ଼ ଥୋପ ପକାଇଛନ୍ତି । ସେ ଘୋଷଣା କରିଛନ୍ତି ଯେ, ଯଦି ରିପବ୍ଲିକାନ୍ ପାର୍ଟି ଆଗାମୀ ନିର୍ବାଚନରେ ପ୍ରତିନିଧି ସଭା ଏବଂ ସେନେଟ୍ ଉଭୟରେ ବିଜୟୀ ହୁଏ, ତେବେ ପ୍ରତ୍ୟେକ ବୟସ୍କ ଆମେରିକୀୟ ନାଗରିକଙ୍କୁ ପ୍ରାୟ ୫ ହଜାର ଡଲାର ବା ପ୍ରାୟ ୫ ଲକ୍ଷ ଟଙ୍କା ମିଳିବ। ରିପବ୍ଲିକାନ୍ ପାର୍ଟି ଟେକ୍ସାସର ଡାଲାସରେ ଏହାର ପ୍ରଥମ ମଧ୍ୟବର୍ତ୍ତୀକାଳୀନ ନିର୍ବାଚନ ପ୍ରଚାର ଆରମ୍ଭ କରିଥିଲା ।
ଏହି ସମୟରେ, ଟ୍ରମ୍ପ ଆମେରିକୀୟ ନାଗରିକଙ୍କୁ ଏହି ଉପହାର ଦେବାକୁ ପ୍ରତିଶ୍ରୁତି ଦେଇଛନ୍ତି।ଦେଶର ଦୃଢ଼ ଆର୍ଥିକ ଅବସ୍ଥା ଏବଂ ଆର୍ଥିକ ସଫଳତା ଯୋଗୁଁ ଟ୍ରମ୍ପ୍ ଏହି ରାଶି ପ୍ରଦାନ କରିବେ ବୋଲି କହି ଯୋଜନାର ନାମ ଟ୍ରମ୍ପ୍ ଡିଭିଡେଣ୍ଡ ଦେଇଛନ୍ତି। ସେ ଏହି ଲାଭାଂଶ ଉପରେ ଏକ ସର୍ତ୍ତ ମଧ୍ୟ ରଖି କହିଛନ୍ତି, ଏହି ଟଙ୍କା ଆମେରିକା ଭିତରେ ଖର୍ଚ୍ଚ ହେବା ଆବଶ୍ୟକ। ମୁଁ ଚାହୁଁ ନାହିଁ, ଲୋକମାନେ ଏହି ଟଙ୍କା ନେଇ କାନାଡା, ଚୀନ୍ କିମ୍ବା ଜର୍ମାନୀକୁ ଯାଇ ଖର୍ଚ୍ଚ କରନ୍ତୁ। ତେବେ ଏହି ଟଙ୍କା ପାଇବା ପାଇଁ ଲୋକଙ୍କୁ କେଉଁ ସର୍ତ୍ତ ପୂରଣ କରିବାକୁ ପଡିବ ତାହା ନିର୍ଦ୍ଦିଷ୍ଟ କରିନାହାନ୍ତି। ସରକାର ଏହାକୁ ଲୋକଙ୍କୁ କିପରି ବଣ୍ଟନ କରିବେ ତାହା ମଧ୍ୟ ସ୍ପଷ୍ଟ ହୋଇନାହିଁ।
ଆକଳନ ଅନୁଯାୟୀ, ସାରା ବିଶ୍ୱରେ ପ୍ରାୟ ୨୪ କୋଟି ୫୦ ଲକ୍ଷ ବୟସ୍କ ଆମେରିକୀୟ ନାଗରିକ ଅଛନ୍ତି। ଯଦି ସମସ୍ତଙ୍କୁ ୫,୦୦୦ ଡଲାର ଦିଆଯାଏ, ତେବେ ଏହି ଯୋଜନାରେ ପ୍ରାୟ ୧.୨୨ ଟ୍ରିଲିୟନ ଡଲାର (ପ୍ରାୟ ୧୧.୬ ଲକ୍ଷ କୋଟି ଟଙ୍କା) ଖର୍ଚ୍ଚ ହୋଇପାରେ। ଟ୍ରମ୍ପ ଆମେରିକାରେ ରହୁଥିବା ବୟସ୍କ ନାଗରିକଙ୍କ ବିଷୟରେ ଉଲ୍ଲେଖ କରିଥିଲେ। ଫଳସ୍ୱରୂପ, ବିଦେଶରେ ରହୁଥିବା ପ୍ରାୟ ୨୦ ଲକ୍ଷ ଆମେରିକୀୟ ନାଗରିକ ଏହି ଯୋଜନାରୁ ବାଦ୍ ପଡ଼ିପାରନ୍ତି।
ଏହି ପ୍ରସ୍ତାବର ଆଉ କୌଣସି ବିବରଣୀ ବର୍ତ୍ତମାନ ପ୍ରକାଶ କରାଯାଇ ନାହିଁ। ଏହା ମଧ୍ୟ ସ୍ପଷ୍ଟ ହୋଇନାହିଁ, ସରକାର କିପରି ଯାଞ୍ଚ୍ କରିବେ ଯେ, ଲାଭାଂଶ କେବଳ ଆମେରିକାରେ ଖର୍ଚ୍ଚ ହେଉଛି। ଏହା ମଧ୍ୟ ସ୍ପଷ୍ଟ ହୋଇନାହିଁ ଯୋଜନା ପାଇଁ ବୟସ ବ୍ୟତୀତ ଆୟ କିମ୍ବା ଅନ୍ୟାନ୍ୟ ଯୋଗ୍ୟତା ମାନଦଣ୍ଡକୁ ବିଚାର କରାଯିବ କି ନାହିଁ।
