ଦିଲ୍ଲୀ ବାୟୁରେ ବିଷାକ୍ତ କାର୍ବନ ମୋନୋକ୍ସାଇଡ୍ର ମାତ୍ରା ବୃଦ୍ଧି: ବିଗତ ୪ ବର୍ଷ ମଧ୍ୟରେ ସର୍ବୋଚ୍ଚ ସ୍ତର ଛୁଇଁଲା ପ୍ରଦୂଷଣ
ଦେଶର ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ସ୍ଥିତି ପୁଣି ଥରେ ସାଂଘାତିକ ରୂପ ଧାରଣ କରିଛି । ଗବେଷଣା ସଂସ୍ଥା ‘ଏନଭାଇରୋକାଟାଲିଷ୍ଟ୍ସ’ର ଆକଳନ ଅନୁଯାୟୀ, ଚଳିତ ବର୍ଷ ଜାନୁଆରୀ ୧ ରୁ ମେ’ ୩୧ ମଧ୍ୟରେ ଦିଲ୍ଲୀରେ ବିଷାକ୍ତ ‘କାର୍ବନ ମୋନୋକ୍ସାଇଡ୍’ର ହାରାହାରି ସାନ୍ଦ୍ରତା ବ୍ୟୁବିକ୍ ମିଟର ପିଛା ୧.୮୯ ମିଲିଗ୍ରାମ୍ ରେକର୍ଡ କରାଯାଇଛି, ଯାହା ୨୦୨୨ ମସିହା ପରଠାରୁ ବିଗତ ଚାରି ବର୍ଷ ମଧ୍ୟରେ ସର୍ବୋଚ୍ଚ ଅଟେ। ପୂର୍ବ ବର୍ଷଗୁଡ଼ିକ ତୁଳନାରେ (୨୦୨୩ରେ ୧.୭୨, ୨୦୨୪ରେ ୧.୬୬ ଏବଂ ୨୦୨୫ରେ ୧.୬୬ ମିଲିଗ୍ରାମ୍) ଏହି ବୃଦ୍ଧି ଅତ୍ୟନ୍ତ ଚିନ୍ତାଜନକ ସ୍ତରରେ ପହଞ୍ଚିଛି, ଯାହା ଭାରତୀୟ ପରମିସିବଲ୍ ଲିମିଟ୍ (୨ ମିଲିଗ୍ରାମ୍) ର ଅତି ନିକଟତର ଅଟେ। ସଂସ୍ଥାର ପ୍ରତିଷ୍ଠାତା ସୁନୀଲ ଦାହିୟା କହିଛନ୍ତି ଯେ, ସହରରେ ଅହେତୁକ ଭାବେ ବଢ଼ୁଥିବା ବେସରକାରୀ ଯାନବାହନ ଓ ବର୍ଜ୍ୟବସ୍ତୁ ଜଳାଯିବା କାରଣରୁ ଏହି ଗ୍ୟାସ୍ ବୃଦ୍ଧି ପାଉଛି, ଯାହାକୁ ରୋକିବା ପାଇଁ ସରକାର ବୈଦ୍ୟୁତିକ ସାଧାରଣ ପରିବହନ ବ୍ୟବସ୍ଥା ଉପରେ ଜୋର ଦେବା ଆବଶ୍ୟକ ।
ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ, କାର୍ବନ ମୋନୋକ୍ସାଇଡ୍ ଏକ ଗନ୍ଧହୀନ ଓ ରଙ୍ଗହୀନ ବିଷାକ୍ତ ଗ୍ୟାସ୍, ଯାହା ଶରୀର ଭିତରକୁ ଗଲେ ରକ୍ତରେ ଥିବା ହେମୋଗ୍ଲୋବିନ୍ ସହ ମିଶି ଅମ୍ଳଜାନ ପରିବହନ କ୍ଷମତାକୁ କମାଇଦିଏ। ଯଶୋଦା ମେଡିସିଟିର ଶ୍ୱାସକ୍ରିୟା ରୋଗ ବିଶେଷଜ୍ଞ ଡାକ୍ତର ରାଜେଶ କୁମାର ଗୁପ୍ତା ସତର୍କ କରାଇଛନ୍ତି ଯେ, ଏହା ଦ୍ୱାରା ମୁଣ୍ଡବିନ୍ଧା, କ୍ଲାନ୍ତି, ମୁଣ୍ଡ ବୁଲାଇବା ଏବଂ କୌଣସି ଜିନିଷରେ ମନୋଯୋଗ ଦେବାରେ ସମସ୍ୟା ଦେଖାଦିଏ। ଏହି ସାଧାରଣ ଲକ୍ଷଣ ଯୋଗୁଁ ଲୋକେ ବାୟୁ ପ୍ରଦୂଷଣର ପ୍ରଭାବକୁ ବୁଝିପାରନ୍ତି ନାହିଁ। ବିଶେଷ କରି ବୃଦ୍ଧବୃଦ୍ଧା, ଯେଉଁମାନେ ପୂର୍ବରୁ ହୃଦରୋଗ କିମ୍ବା ଫୁସଫୁସ ଜନିତ ସମସ୍ୟାରେ ପୀଡ଼ିତ, ସେମାନଙ୍କ ପାଇଁ ଏହି ପ୍ରଦୂଷିତ ବାୟୁ ଶ୍ୱାସକ୍ରିୟାରେ ପ୍ରବଳ କଷ୍ଟ ଦେବା ସହ ହାର୍ଟ ଆଟାକ୍ ଭଳି ମାରାତ୍ମକ ପରିସ୍ଥିତି ସୃଷ୍ଟି କରିବାର ଆଶଙ୍କା ରହିଛି।
