ଧୀରେ ଧୀରେ ଦୁର୍ବଳ ହେଉଛି କି ବିଜେପିର ‘ଡବଲ୍ ଇଞ୍ଜିନ୍’ ଫର୍ମୁଲା? ହିନ୍ଦୀ ହାର୍ଟଲ୍ୟାଣ୍ଡ ସମେତ ବିଜେପିର ପାରମ୍ପରିକ ଗଡ଼ରେ ଦଳର ଆସନ ସଂଖ୍ୟା କମିବା ନେଇ ସଙ୍କେତ ଦେଇଛି ଅଗଷ୍ଟ ୨୦୨୬ର MOTN ସର୍ଭେ ।
ଧୀରେ ଧୀରେ ଦୁର୍ବଳ ହେଉଛି କି ବିଜେପିର ‘ଡବଲ୍ ଇଞ୍ଜିନ୍’ ଫର୍ମୁଲା? ହିନ୍ଦୀ ହାର୍ଟଲ୍ୟାଣ୍ଡ ସମେତ ବିଜେପିର ପାରମ୍ପରିକ ଗଡ଼ରେ ଦଳର ଆସନ ସଂଖ୍ୟା କମିବା ନେଇ ସଙ୍କେତ ଦେଇଛି ଅଗଷ୍ଟ ୨୦୨୬ର MOTN ସର୍ଭେ । ଇଣ୍ଡିଆ ଟୁଡେ ଏବଂ ସି-ଭୋଟରର ଏହି ସର୍ଭେ ଅନୁସାରେ, ଯଦି ଏବେ ଲୋକସଭା ନିର୍ବାଚନ ହୁଏ, ତେବେ ଏନ୍ଡିଏକୁ ୩୨୬ଟି ଆସନ ଏବଂ ୪୫.୧ ପ୍ରତିଶତ ଭୋଟ୍ ମିଳିପାରେ । ସେହିପରି ଇଣ୍ଡିଆ ମେଣ୍ଟକୁ ୧୮୫ଟି ଆସନ ଏବଂ ୩୯.୧ ପ୍ରତିଶତ ଭୋଟ୍ ମିଳିବାର ଆକଳନ କରାଯାଇଛି । ତେବେ ବିଜେପିର ନିଜସ୍ୱ ପ୍ରଦର୍ଶନକୁ ଦେଖିଲେ ଦଳ ୨୬୧ଟି ଆସନରେ ଜିତିପାରେ ବୋଲି ସର୍ଭେ ଆକଳନ କରିଛି। ୨୦୨୪ରେ ବିଜେପି ୨୪୦ଟି ଆସନ ଜିତିଥିଲା । ଅର୍ଥାତ୍ ୨୦୨୪ ତୁଳନାରେ ଏହା ୨୧ଟି ଆସନ ଅଧିକ। କିନ୍ତୁ ଜାନୁଆରୀ ୨୦୨୬ର MOTN ସର୍ଭେ ସହ ତୁଳନା କଲେ ବିଜେପିର ଆସନ ଆକଳନ ୨୮୭ରୁ ଖସି ୨୬୧ରେ ପହଞ୍ଚିଛି । ଅର୍ଥାତ୍ ମାତ୍ର ୬ ମାସରେ ୨୬ଟି ଆସନର ହ୍ରାସ ଆକଳନ କରାଯାଇଛି ।
ସବୁଠାରୁ ବଡ଼ ଚିନ୍ତାର କାରଣ ପାଲଟିଛି ବିଜେପିର ପାରମ୍ପରିକ ଗଡ଼। ମଧ୍ୟପ୍ରଦେଶରେ ୨୦୨୪ରେ ବିଜେପି ସମସ୍ତ ୨୯ଟି ଲୋକସଭା ଆସନ ଜିତିଥିଲା । କିନ୍ତୁ ଏହି ସର୍ଭେରେ ଦଳକୁ ୨୧ଟି ଆସନ ମିଳିପାରେ ବୋଲି ଆକଳନ କରାଯାଇଛି । ଅର୍ଥାତ୍ ୮ଟି ଆସନର କ୍ଷତିର ସଙ୍କେତ ମିଳିଛି । ଓଡ଼ିଶାରେ ମଧ୍ୟ ସମାନ ଚିତ୍ର ଦେଖାଯାଇଛି। ୨୦୨୪ରେ ବିଜେପି ରାଜ୍ୟର ୨୧ଟି ଲୋକସଭା ଆସନରୁ ୨୦ଟି ଜିତିଥିଲା। କିନ୍ତୁ ଅଗଷ୍ଟ MOTN ସର୍ଭେ ଅନୁସାରେ ବିଜେପି ୧୨ଟି ଆସନରେ ସୀମିତ ରହିପାରେ। ଜାନୁଆରୀ ସର୍ଭେର ୧୭ଟି ଆସନ ତୁଳନାରେ ମଧ୍ୟ ଏହା ୫ଟି ଆସନ କମ୍। ଉତ୍ତରପ୍ରଦେଶରେ ମଧ୍ୟ ବିଜେପି ପାଇଁ ଚିନ୍ତା ବଢ଼ାଇଛି ସର୍ଭେ ଆକଳନ। ଜାନୁଆରୀରେ ଦଳକୁ ୪୪ଟି ଆସନ ମିଳିବାର ଆକଳନ ଥିବାବେଳେ ଅଗଷ୍ଟରେ ଏହା ୩୪କୁ ଖସିଛି। ଛତିଶଗଡ଼ରେ ମଧ୍ୟ ୨୦୨୪ର ୧୦ଟି ଆସନ ତୁଳନାରେ ବିଜେପି ୭ଟି ଆସନରେ ରହିପାରେ ବୋଲି ସର୍ଭେ କହୁଛି। ତେବେ ପଶ୍ଚିମବଙ୍ଗ ବିଜେପି ପାଇଁ ଏକ ବଡ଼ ଆଶା ଭାବେ ଉଭା ହୋଇଛି ।
୨୦୨୪ରେ ବିଜେପି ବଙ୍ଗଳାରେ ୧୨ଟି ଆସନ ଜିତିଥିବା ବେଳେ ଏହି ସର୍ଭେରେ ଦଳକୁ ୩୫ଟି ଆସନ ମିଳିପାରେ ବୋଲି ଆକଳନ କରାଯାଇଛି। ଅର୍ଥାତ୍ ୨୩ଟି ଆସନ ବୃଦ୍ଧିର ସଙ୍କେତ ମିଳିଛି। କିନ୍ତୁ ଏହି ବଙ୍ଗଳା ଲାଭ ଅନ୍ୟ ରାଜ୍ୟର ସମ୍ଭାବ୍ୟ କ୍ଷତିକୁ ପୂରଣ କରିପାରିବ କି—ସେନେଇ ରାଜନୈତିକ ବିଶ୍ଳେଷଣ ଆରମ୍ଭ ହୋଇଛି। Aaj Takର ବିଶ୍ଳେଷଣ ଅନୁସାରେ, ମଧ୍ୟପ୍ରଦେଶ, ଓଡ଼ିଶା, ଛତିଶଗଡ଼ ଏବଂ ଉତ୍ତରପ୍ରଦେଶ ଭଳି ରାଜ୍ୟରେ ଆସନ ହ୍ରାସ ବିଜେପି ପାଇଁ ଚିନ୍ତାର ବିଷୟ। ସର୍ଭେରେ ଆଉ ଏକ ଦିଗ ସାମ୍ନାକୁ ଆସିଛି—ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବ୍ୟକ୍ତିଗତ ଲୋକପ୍ରିୟତା ମଜବୁତ ଥିବା ସତ୍ତ୍ୱେ ରାଜ୍ୟ ସ୍ତରରେ ବିଜେପି ସରକାର ଓ ସ୍ଥାନୀୟ ପ୍ରସଙ୍ଗକୁ ନେଇ ଅସନ୍ତୋଷର ପ୍ରଭାବ ଦେଖାଯାଉଥିବା ବିଶ୍ଳେଷଣ କରାଯାଇଛି। ବେରୋଜଗାରୀ, ମହଙ୍ଗାଇ ଏବଂ ପ୍ରଶାସନିକ ପ୍ରସଙ୍ଗ ମଧ୍ୟ ଏହାର କାରଣ ଭାବେ ଉଲ୍ଲେଖ ହୋଇଛି। ତେଣୁ ଅଗଷ୍ଟ ୨୦୨୬ର MOTN ସର୍ଭେ ବିଜେପି ପାଇଁ ଏକ ମିଶ୍ର ସଙ୍କେତ ଦେଉଛି। ଜାତୀୟ ସ୍ତରରେ ଏନ୍ଡିଏ ଏବେବି ଆଗରେ ଥିବା ଆକଳନ ହୋଇଥିବା ବେଳେ, ବିଜେପିର ପାରମ୍ପରିକ ଗଡ଼ରେ ଆସନ ହ୍ରାସ ଦଳର ‘ଡବଲ୍ ଇଞ୍ଜିନ୍’ ରଣନୀତି ପାଇଁ ନୂଆ ଚ୍ୟାଲେଞ୍ଜର ସଙ୍କେତ ଦେଉଛି।
