ହୋଟେଲ୍ ରୁମ୍ରେ ଶେଷ ହେଲା ପ୍ରେମ ସମ୍ପର୍କ! ବିବାହିତ ପ୍ରେମିକାଙ୍କ ମୃତଦେହ ଉଦ୍ଧାର, ଘଟଣା ପରେ ଯୁବକଙ୍କ ଆତ୍ମହତ୍ୟା ଉଦ୍ୟମ । ହରିୟାଣାର ରୋହତକରୁ ଆସିଛି ଏଭଳି ଚାଞ୍ଚଲ୍ୟକର ଖବର । ରୋହତକର ଦିଲ୍ଲୀ ରୋଡ୍ ସ୍ଥିତ ଏକ ହୋଟେଲରୁ ଜଣେ ବିବାହିତ ମହିଳାଙ୍କ ମୃତଦେହ ମିଳିବା ପରେ ହଇଚଇ ସୃଷ୍ଟି ହୋଇଛି ।
ହୋଟେଲ୍ ରୁମ୍ରେ ଶେଷ ହେଲା ପ୍ରେମ ସମ୍ପର୍କ! ବିବାହିତ ପ୍ରେମିକାଙ୍କ ମୃତଦେହ ଉଦ୍ଧାର, ଘଟଣା ପରେ ଯୁବକଙ୍କ ଆତ୍ମହତ୍ୟା ଉଦ୍ୟମ । ହରିୟାଣାର ରୋହତକରୁ ଆସିଛି ଏଭଳି ଚାଞ୍ଚଲ୍ୟକର ଖବର । ରୋହତକର ଦିଲ୍ଲୀ ରୋଡ୍ ସ୍ଥିତ ଏକ ହୋଟେଲରୁ ଜଣେ ବିବାହିତ ମହିଳାଙ୍କ ମୃତଦେହ ମିଳିବା ପରେ ହଇଚଇ ସୃଷ୍ଟି ହୋଇଛି । ମୃତକାଙ୍କ ପରିଚୟ ରୁବି ବୋଲି ଜଣାପଡ଼ିଛି । ପୁଲିସର ପ୍ରାଥମିକ ତଦନ୍ତ ଅନୁସାରେ, ରୁବିଙ୍କ ସହ ନୀରଜ ନାମକ ଜଣେ ଯୁବକ ହୋଟେଲକୁ ଆସିଥିଲେ । ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିବା ତଦନ୍ତରୁ ସାମ୍ନାକୁ ଆସିଛି । ସୂଚନା ଅନୁସାରେ, ବୁଧବାର ସକାଳେ ଉଭୟ ହୋଟେଲରେ ଏକ ରୁମ୍ ବୁକ୍ କରିଥିଲେ । କିଛି ସମୟ ପରେ ନୀରଜ ରୁମ୍ରୁ ବାହାରି ଯାଇଥିଲେ । ହୋଟେଲ୍ କର୍ମଚାରୀଙ୍କୁ ସେ କିଛି ସମୟ ପରେ ଫେରିବେ ବୋଲି କହିଥିବା ଜଣାପଡ଼ିଛି । କିନ୍ତୁ ଦୀର୍ଘ ସମୟ ପରେ ମଧ୍ୟ ସେ ଫେରିନଥିଲେ ।
ରୁମ୍ରୁ କୌଣସି ଚଳପ୍ରଚଳ ନଥିବାରୁ ହୋଟେଲ୍ କର୍ମଚାରୀଙ୍କ ସନ୍ଦେହ ହୋଇଥିଲା । ପରେ ପୁଲିସକୁ ଖବର ଦିଆଯାଇଥିଲା । ପୁଲିସ ରୁମ୍ ଖୋଲି ଯାଞ୍ଚ କରିବା ପରେ ଭିତରୁ ରୁବିଙ୍କ ମୃତଦେହ ମିଳିଥିଲା । ପ୍ରାଥମିକ ତଦନ୍ତରେ ଗଳା ଚିପି ହତ୍ୟା କରାଯାଇଥିବା ସନ୍ଦେହ କରାଯାଉଛି । ତେବେ ମୃତ୍ୟୁର ପ୍ରକୃତ କାରଣ ପୋଷ୍ଟମର୍ଟମ୍ ରିପୋର୍ଟ ପରେ ସ୍ପଷ୍ଟ ହେବ ବୋଲି ପୁଲିସ କହିଛି । ଘଟଣା ପରେ ନୀରଜ ନିଜ ଘରକୁ ଯାଇଥିବା ବେଳେ ସେଠାରେ ଆତ୍ମହତ୍ୟା ଉଦ୍ୟମ କରିଥିବା ପୁଲିସ କହିଛି । ପରିବାର ଲୋକେ ତାଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲେ । ବର୍ତ୍ତମାନ ତାଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି । ସେପଟେ ପୂରା ଘଟଣାର ରହସ୍ୟ ଖୋଲିବା ପାଇଁ ପୁଲିସ ହୋଟେଲର ରେଜିଷ୍ଟର, CCTV ଫୁଟେଜ୍ ଏବଂ ଅନ୍ୟାନ୍ୟ ପ୍ରମାଣ ଯାଞ୍ଚ କରୁଛି । ଘଟଣାସ୍ଥଳରେ FSL ଟିମ୍ ମଧ୍ୟ ଯାଞ୍ଚ କରି ପ୍ରମାଣ ସଂଗ୍ରହ କରିଛି । ରୁମ୍ ଭିତରେ ଠିକ୍ କ’ଣ ଘଟିଥିଲା, କେଉଁ ପରିସ୍ଥିତିରେ ରୁବିଙ୍କ ମୃତ୍ୟୁ ହେଲା ଏବଂ ଏହା ପଛରେ ପ୍ରକୃତ କାରଣ କ’ଣ—ସେସବୁର ତଦନ୍ତ ଜାରି ରହିଛି । ପ୍ରେମ ସମ୍ପର୍କରୁ ଆରମ୍ଭ ହୋଇଥିବା ଏହି ଘଟଣା ଏବେ ହତ୍ୟା ଓ ଆତ୍ମହତ୍ୟା ଉଦ୍ୟମର ରୂପ ନେଇଛି । ପୁଲିସ ତଦନ୍ତ ଆଗକୁ ବଢ଼ିବା ସହ ଘଟଣା ପଛର ପ୍ରକୃତ ରହସ୍ୟ ସାମ୍ନାକୁ ଆସିବ ବୋଲି ଆଶା କରାଯାଉଛି ।
