୧୯ ବର୍ଷରୁ କମ୍ ଏସୀୟ ମୁଷ୍ଟିଯୁଦ୍ଧ ପ୍ରତିଯୋଗିତାର ରୌପ୍ୟ ପଦକ ବିଜେତା ଆଦିତ୍ୟ ସେମିଫାଇନାଲ୍ରେ ନିଜର ଦକ୍ଷତା ଓ ଆତ୍ମବିଶ୍ୱାସର ପରିଚୟ ଦେଇଥିଲେ। ପ୍ରତିପକ୍ଷ ଖେଳାଳିଙ୍କୁ ଏକତରଫା ଭାବେ ପରାସ୍ତ କରି ସେ ଭାରତ ପାଇଁ ଆଉ ଏକ ପଦକ ନିଶ୍ଚିତ କରିଛନ୍ତି।
୧୯ ବର୍ଷରୁ କମ୍ ବିଶ୍ୱ ମୁଷ୍ଟିଯୁଦ୍ଧ ପ୍ରତିଯୋଗିତାରେ ଭାରତୀୟ ଖେଳାଳିଙ୍କ ଦମଦାର ପ୍ରଦର୍ଶନ ଜାରି ରହିଛି। ଭାରତର ଯୁବ ମୁଷ୍ଟିଯୋଦ୍ଧା ଆଦିତ୍ୟ ଚମତ୍କାର ପ୍ରଦର୍ଶନ କରି ଫାଇନାଲ୍ରେ ପ୍ରବେଶ କରିଛନ୍ତି। ପୁରୁଷ ୫୫ କେଜି ବର୍ଗର ସେମିଫାଇନାଲ୍ ମୁକାବିଲାରେ ଆଦିତ୍ୟ ଆଜରବୈଜାନର ନିହାତ ଗାସିମୋଭଙ୍କୁ ୫-୦ ବ୍ୟବଧାନରେ ପରାସ୍ତ କରି ସ୍ୱର୍ଣ୍ଣ ପଦକ ଲଢ଼େଇ ପାଇଁ ଯୋଗ୍ୟତା ଅର୍ଜନ କରିଛନ୍ତି। ଏହା ସହିତ ସେ ଚଳିତ ପ୍ରତିଯୋଗିତାରେ ଫାଇନାଲ୍କୁ ଉନ୍ନୀତ ହୋଇଥିବା ଦ୍ୱିତୀୟ ଭାରତୀୟ ଖେଳାଳି ହୋଇଛନ୍ତି।
୧୯ ବର୍ଷରୁ କମ୍ ଏସୀୟ ମୁଷ୍ଟିଯୁଦ୍ଧ ପ୍ରତିଯୋଗିତାର ରୌପ୍ୟ ପଦକ ବିଜେତା ଆଦିତ୍ୟ ସେମିଫାଇନାଲ୍ରେ ନିଜର ଦକ୍ଷତା ଓ ଆତ୍ମବିଶ୍ୱାସର ପରିଚୟ ଦେଇଥିଲେ। ପ୍ରତିପକ୍ଷ ଖେଳାଳିଙ୍କୁ ଏକତରଫା ଭାବେ ପରାସ୍ତ କରି ସେ ଭାରତ ପାଇଁ ଆଉ ଏକ ପଦକ ନିଶ୍ଚିତ କରିଛନ୍ତି। ଏବେ ଫାଇନାଲ୍ରେ ତାଙ୍କର ମୁକାବିଲା ରୁଷିଆର ଇସ୍ଲାମ ମାଗୋମେଦଭଙ୍କ ସହ ହେବ। ଏହି ମୁକାବିଲାରେ ବିଜୟୀ ହୋଇ ସ୍ୱର୍ଣ୍ଣ ପଦକ ହାସଲ କରିବା ଆଦିତ୍ୟଙ୍କ ମୁଖ୍ୟ ଲକ୍ଷ୍ୟ ରହିଛି।
ଅନ୍ୟପଟେ ଭାରତୀୟ ମହିଳା ମୁଷ୍ଟିଯୋଦ୍ଧା ମେଘା ସିଓକାନ୍ଦ ମଧ୍ୟ ଦେଶ ପାଇଁ ପଦକ ନିଶ୍ଚିତ କରିଛନ୍ତି। ମହିଳା ୮୦ କେଜି ବର୍ଗର ସେମିଫାଇନାଲ୍ରେ ସେ କିର୍ଗିଜସ୍ତାନର ମୀରିମ ଜିନିବେକୋଭାଙ୍କୁ ଆର୍ଏସ୍ସି ନିଷ୍ପତ୍ତିରେ ପରାସ୍ତ କରି ଫାଇନାଲ୍ରେ ପହଞ୍ଚିଛନ୍ତି। ଫଳରେ ଭାରତ ପାଇଁ ଦୁଇଟି ସ୍ୱର୍ଣ୍ଣ ପଦକ ଜିତିବାର ସୁଯୋଗ ସୃଷ୍ଟି ହୋଇଛି।
ତେବେ ଅନ୍ୟ ଦୁଇ ଭାରତୀୟ ମହିଳା ମୁଷ୍ଟିଯୋଦ୍ଧାଙ୍କୁ ସେମିଫାଇନାଲ୍ରେ ପରାଜୟର ସମ୍ମୁଖୀନ ହେବାକୁ ପଡ଼ିଛି। ମହିଳା ୬୫ କେଜି ବର୍ଗରେ ହର୍ଷିକା ଏବଂ ୮୦ କେଜି ବର୍ଗରେ ପ୍ରାଚୀ ତୋକାସ ପରାସ୍ତ ହୋଇ କାଂସ୍ୟ ପଦକରେ ସନ୍ତୁଷ୍ଟ ରହିଛନ୍ତି। ଏହା ସତ୍ତ୍ୱେ ପ୍ରତିଯୋଗିତାରେ ଭାରତୀୟ ଯୁବ ମୁଷ୍ଟିଯୋଦ୍ଧାଙ୍କ ପ୍ରଦର୍ଶନ ଉତ୍ସାହଜନକ ରହିଛି। ଏବେ ସମସ୍ତଙ୍କ ନଜର ଆଦିତ୍ୟ ଓ ମେଘାଙ୍କ ଫାଇନାଲ୍ ମୁକାବିଲା ଉପରେ ରହିଛି।
