ଡାକ୍ତରଙ୍କ ଦ୍ୱାରା ମୃତ ଘୋଷଣା କରାଯାଇଥିବା ଜଣେ ୧୧ ମାସର ଶିଶୁ ପରେ ଜୀବିତ ଥିବା ଅଭିଯୋଗ ହୋଇଛି । ତେବେ କିଛି ସମୟ ପରେ ଶିଶୁଟିର ପ୍ରକୃତରେ ମୃତ୍ୟୁ ଘଟିଥିବାରୁ ଘଟଣାକୁ ନେଇ ଚାରିଆଡ଼େ ଅସନ୍ତୋଷ ପ୍ରକାଶ ପାଇଛି ।
କଳାହାଣ୍ଡି ଜିଲ୍ଲାରେ ସ୍ୱାସ୍ଥ୍ୟସେବାର ଏକ ସାଙ୍ଘାତିକ ଚିତ୍ର ସାମ୍ନାକୁ ଆସିଛି । ଡାକ୍ତରଙ୍କ ଦ୍ୱାରା ମୃତ ଘୋଷଣା କରାଯାଇଥିବା ଜଣେ ୧୧ ମାସର ଶିଶୁ ପରେ ଜୀବିତ ଥିବା ଅଭିଯୋଗ ହୋଇଛି । ତେବେ କିଛି ସମୟ ପରେ ଶିଶୁଟିର ପ୍ରକୃତରେ ମୃତ୍ୟୁ ଘଟିଥିବାରୁ ଘଟଣାକୁ ନେଇ ଚାରିଆଡ଼େ ଅସନ୍ତୋଷ ପ୍ରକାଶ ପାଇଛି । ଏଭଳି ଘଟଣା କଳାହାଣ୍ଡି ଜିଲ୍ଲା କୋକସରା ବ୍ଲକ୍ର ତୁନଗାଁରେ ଘଟିଛି । ସୂଚନା ଅନୁସାରେ, ଶିଶୁଟି ଅସୁସ୍ଥ ହେବାରୁ ପରିବାର ଲୋକେ ତାକୁ ଚିକିତ୍ସା ପାଇଁ ଭବାନୀପାଟଣା ମେଡିକାଲକୁ ନେଇଥିଲେ । ସେଠାରେ ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ ।
ପରେ ପରିବାର ଲୋକେ ଶିଶୁଟିକୁ ନେଇ ଘରକୁ ଫେରୁଥିବା ବେଳେ, ଶିଶୁଟି ଜୀବିତ ଥିବା ଅନୁଭବ କରିଥିବା ଅଭିଯୋଗ କରିଛନ୍ତି । ତେବେ କିଛି ସମୟ ପରେ ଶିଶୁଟିର ମୃତ୍ୟୁ ଘଟିଥିଲା । ଏହି ଘଟଣାକୁ ନେଇ ପରିବାର ଲୋକେ ଡାକ୍ତରଙ୍କ ବିରୋଧରେ ଚିକିତ୍ସା ଅବହେଳାର ଅଭିଯୋଗ ଆଣିଛନ୍ତି । ଘଟଣାର ନିରପେକ୍ଷ ତଦନ୍ତ କରି ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଏବଂ ନ୍ୟାୟ ଦେବାକୁ ପରିବାର ସଦସ୍ୟ ଓ ସ୍ଥାନୀୟ ଲୋକ ଦାବି କରିଛନ୍ତି ।
