ଲାଞ୍ଚ ମାଗିଲେ ସିଧା ମନା କର : ମୁଖ୍ୟମନ୍ତ୍ରୀଙ୍କ କଡ଼ା ଆଭିମୁଖ୍ୟ

ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ଦୁର୍ନୀତି ବିରୋଧରେ ଏକ ଶକ୍ତ ଆଭିମୁଖ୍ୟ ଗ୍ରହଣ କରିଛନ୍ତି। ରାଜ୍ୟରେ ଦୁର୍ନୀତି, ଲାଞ୍ଚ କାରବାର କିମ୍ବା କ୍ଷମତାର ଅପବ୍ୟବହାର କରୁଥିବା ଜଣେ ହେଲେ ବି ବ୍ୟକ୍ତିଙ୍କୁ ବରଦାସ୍ତ କରାଯିବ ନାହିଁ ବୋଲି ସେ ଚେତାବନୀ ଦେଇଛନ୍ତି

ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ଦୁର୍ନୀତି ବିରୋଧରେ ଏକ ଶକ୍ତ ଆଭିମୁଖ୍ୟ ଗ୍ରହଣ କରିଛନ୍ତି। ରାଜ୍ୟରେ ଦୁର୍ନୀତି, ଲାଞ୍ଚ କାରବାର କିମ୍ବା କ୍ଷମତାର ଅପବ୍ୟବହାର କରୁଥିବା ଜଣେ ହେଲେ ବି ବ୍ୟକ୍ତିଙ୍କୁ ବରଦାସ୍ତ କରାଯିବ ନାହିଁ ବୋଲି ସେ ଚେତାବନୀ ଦେଇଛନ୍ତି। ବୁଧବାର କରୁରଠାରେ ଆୟୋଜିତ ଏକ ବିଶାଳ ସଭାରେ ଜନସାଧାରଣଙ୍କୁ ସମ୍ବୋଧିତ କରି ସେ କହିଛନ୍ତି ଯେ, ଯଦି କେହି ଆପଣଙ୍କୁ ଲାଞ୍ଚ ମାଗେ, ତେବେ ସିଧାସଳଖ ମନା କରନ୍ତୁ ଏବଂ କୁହନ୍ତୁ ଯେ ଏହି ରାଜ୍ୟରେ ଆମର ପୁଅ, ଆମର ଭାଇ ବିଜୟ ଶାସନ କରୁଛି। ମୁଖ୍ୟମନ୍ତ୍ରୀ ଜନସାଧାରଣଙ୍କ ସହ ସର୍ବଦା ଛିଡ଼ା ହୋଇଛନ୍ତି ବୋଲି ପ୍ରତିଶ୍ରୁତି ଦେଇ ଦୁର୍ନୀତିଖୋରଙ୍କ ସାମ୍ନାରେ ଦୃଢ଼ ଭାବେ ‘ନାଁ’ କହିବାକୁ ସେ ଆହ୍ୱାନ କରିଛନ୍ତି।

୨୦୨୫ ନିର୍ବାଚନ ପୂର୍ବ ରାଲିରେ ଘଟିଥିବା ଦଳାଚକଟା ଦୁର୍ଘଟଣାରେ ୪୧ ରୁ ଅଧିକ ଲୋକଙ୍କ ମୃତ୍ୟୁ ପରେ କରୁର ଜିଲ୍ଲାକୁ ଏହା ମୁଖ୍ୟମନ୍ତ୍ରୀଙ୍କ ପ୍ରଥମ ଗସ୍ତ ଥିଲା।
ଏହି ଦଳାଚକଟା ଟ୍ରାଜେଡି ପାଇଁ ବିଜୟ ପୋଲିସ ପ୍ରଶାସନର ଅବହେଳାକୁ ଦାୟୀ କରିବା ସହ ବ୍ୟାପକ ଜନସମାଗମ ସତ୍ତ୍ୱେ ପୋଲିସ ତାଙ୍କୁ କୌଣସି ପୂର୍ବ ସୂଚନା ଦେଇନଥିବା ଅଭିଯୋଗ କରିଛନ୍ତି। ମୃତକଙ୍କ ସ୍ମୃତିରେ କରୁରଠାରେ ଟିଭିକେ ପକ୍ଷରୁ ଏକ ଭବ୍ୟ ସ୍ମାରକୀ ନିର୍ମାଣ କରାଯିବ ଏବଂ ଏହି ଦୁର୍ଘଟଣାରେ ପ୍ରଭାବିତ ୩୧ଟି ପରିବାରର ସଦସ୍ୟଙ୍କୁ ବିଭିନ୍ନ ସରକାରୀ ବିଭାଗରେ ନିଯୁକ୍ତି ପତ୍ର ପ୍ରଦାନ କରାଯାଇଛି। ଅପରପକ୍ଷେ, ଡିଏମକେ ନେତା ଟି.କେ.ଏସ୍. ଇଲାଙ୍ଗୋବନ ମୁଖ୍ୟମନ୍ତ୍ରୀ ବିଜୟଙ୍କ ଏହି ଅଭିଯୋଗକୁ ପ୍ରତ୍ୟାଖ୍ୟାନ କରିବା ସହ ନିଜେ ବିଜୟଙ୍କ ଦଳର ଜଣେ ଓକିଲ ସାଧାରଣ ସମ୍ପାଦକଙ୍କ ବିରୋଧରେ ଲାଞ୍ଚ ନେଇ ଦଳୀୟ ପଦବୀ ବାଣ୍ଟିବା ଅଭିଯୋଗରେ କୋର୍ଟଙ୍କ ଦ୍ୱାରସ୍ଥ ହୋଇଥିବା କଥା କହି ତାଙ୍କୁ ଘେରିଛନ୍ତି।