ଲର୍ଡ୍ସ ଟେଷ୍ଟରେ କ୍ରିକେଟ୍ଠାରୁ ବଡ଼ ହେଲା ବିବାଦ । ଇମ୍ରାନ ଖାନଙ୍କ ପୁଅଙ୍କ ସାକ୍ଷାତକାରକୁ ନେଇ ପାକିସ୍ତାନ କ୍ରିକେଟ୍ ବୋର୍ଡ ଓ ସ୍କାଏ ସ୍ପୋର୍ଟସ ମଧ୍ୟରେ ମୁହାଁମୁହିଁ ସ୍ଥିତି । ଏପରିକି ବିରୋଧରେ ମଇଦାନକୁ ନଓହ୍ଲାଇବାକୁ ପାକିସ୍ତାନ ଟିମ୍ ବିଚାର କରିଥିବା ନେଇ ଚର୍ଚ୍ଚା ଜୋର ଧରିଛି ।
ଲର୍ଡ୍ସ ଟେଷ୍ଟରେ କ୍ରିକେଟ୍ଠାରୁ ବଡ଼ ହେଲା ବିବାଦ । ଇମ୍ରାନ ଖାନଙ୍କ ପୁଅଙ୍କ ସାକ୍ଷାତକାରକୁ ନେଇ ପାକିସ୍ତାନ କ୍ରିକେଟ୍ ବୋର୍ଡ ଓ ସ୍କାଏ ସ୍ପୋର୍ଟସ ମଧ୍ୟରେ ମୁହାଁମୁହିଁ ସ୍ଥିତି । ଏପରିକି ବିରୋଧରେ ମଇଦାନକୁ ନଓହ୍ଲାଇବାକୁ ପାକିସ୍ତାନ ଟିମ୍ ବିଚାର କରିଥିବା ନେଇ ଚର୍ଚ୍ଚା ଜୋର ଧରିଛି । ଇଂଲଣ୍ଡ ଓ ପାକିସ୍ତାନ ମଧ୍ୟରେ ଲର୍ଡ୍ସରେ ଚାଲିଥିବା ଦ୍ୱିତୀୟ ଟେଷ୍ଟର ପ୍ରଥମ ଦିନରେ ହିଁ ଦେଖିବାକୁ ମିଳିଛି ଏହି ବଡ଼ ବିବାଦ । ମ୍ୟାଚ୍ର ଲଞ୍ଚ ବ୍ରେକ୍ ସମୟରେ ସ୍କାଏ ସ୍ପୋର୍ଟସରେ ଇମ୍ରାନ ଖାନଙ୍କ ଦୁଇ ପୁଅ କାସିମ ଖାନ ଓ ସୁଲେମାନ ଖାନଙ୍କ ସାକ୍ଷାତକାର ପ୍ରସାରଣ କରାଯାଇଥିଲା । ଏହି ସାକ୍ଷାତକାର ନେଇଥିଲେ ପୂର୍ବତନ ଇଂଲଣ୍ଡ ଅଧିନାୟକ ମାଇକେଲ ଆଥରଟନ୍ । ସାକ୍ଷାତକାରରେ ଇମ୍ରାନ ଖାନଙ୍କ ପୁଅମାନେ ତାଙ୍କ ବାପାଙ୍କ ସ୍ୱାସ୍ଥ୍ୟ ଓ ଜେଲ୍ରେ ତାଙ୍କ ସ୍ଥିତିକୁ ନେଇ ଚିନ୍ତା ପ୍ରକାଶ କରିଥିଲେ । ଏହା ପରେ ପ୍ରସାରଣକୁ ନେଇ ପାକିସ୍ତାନ କ୍ରିକେଟ୍ ବୋର୍ଡ ଆପତ୍ତି ଉଠାଇଥିଲା । ରିପୋର୍ଟ ଅନୁସାରେ, PCB ପକ୍ଷରୁ Sky Sportsକୁ ଔପଚାରିକ ଭାବେ ଅଭିଯୋଗ କରାଯାଇଛି ।
ବୋର୍ଡର ଆପତ୍ତି ସତ୍ତ୍ୱେ ସାକ୍ଷାତକାର ପ୍ରସାରଣ ହେବାରୁ ବିବାଦ ଆହୁରି ତୀବ୍ର ହୋଇଥିଲା । ଏପରିକି ଲଞ୍ଚ ବ୍ରେକ୍ ପରେ ପାକିସ୍ତାନ ଖେଳାଳିମାନେ ମଇଦାନକୁ ଫେରିବେ କି ନାହିଁ, ଏନେଇ PCB ମଧ୍ୟରେ ଆଲୋଚନା ହୋଇଥିବା ରିପୋର୍ଟ ସାମ୍ନାକୁ ଆସିଛି । ତେବେ ଶେଷରେ ପାକିସ୍ତାନ ଦଳ ମଇଦାନକୁ ଫେରି ମ୍ୟାଚ୍ ଜାରି ରଖିଥିଲା । ଏହି ବିବାଦ ମଧ୍ୟରେ ଲର୍ଡ୍ସ ଟେଷ୍ଟର ମଇଦାନୀ ପ୍ରଦର୍ଶନ ମଧ୍ୟ ଚର୍ଚ୍ଚାରେ ରହିଛି । ବର୍ଷା ଓ ଖରାପ ଆଲୋକ ଯୋଗୁଁ ଖେଳ ବାରମ୍ବାର ବାଧାପ୍ରାପ୍ତ ହୋଇଥିବା ବେଳେ ପାକିସ୍ତାନର ବୋଲରମାନେ ଇଂଲଣ୍ଡ ବ୍ୟାଟରଙ୍କ ଉପରେ ଚାପ ସୃଷ୍ଟି କରିଥିଲେ । ତେବେ ଲର୍ଡ୍ସ ମଇଦାନରେ ଚାଲିଥିବା ଟେଷ୍ଟ ମ୍ୟାଚ୍ର ଏହି ବିବାଦ କେବଳ କ୍ରିକେଟ୍ ମଧ୍ୟରେ ସୀମିତ ରହିନାହିଁ । ଇମ୍ରାନ ଖାନଙ୍କ ପୁଅଙ୍କ ସାକ୍ଷାତକାର, PCBର ଆପତ୍ତି ଏବଂ Sky Sportsର ପ୍ରସାରଣକୁ ନେଇ ଏବେ ନୂଆ ରାଜନୈତିକ ଓ କ୍ରିକେଟ୍ ବିବାଦ ଦେଖାଦେଇଛି । ଲର୍ଡ୍ସରେ ବଲ୍ ଓ ବ୍ୟାଟ୍ର ଲଢ଼େଇ ସହ ଏବେ ଚର୍ଚ୍ଚାରେ PCB ବନାମ Sky Sports ବିବାଦ । ଆଉ ଏହି ବିବାଦର କେନ୍ଦ୍ରରେ ରହିଛି ଇମ୍ରାନ ଖାନଙ୍କ ପୁଅଙ୍କ ସାକ୍ଷାତକାର ।
