ଆମେରିକା ଏବଂ ଇରାନ ମଧ୍ୟରେ ଜାରି ରହିଥିବା ଯୁଦ୍ଧ ହର୍ମୁଜ୍ ପ୍ରଣାଳୀରେ ଅବରୋଧ ସ୍ଥିତି ସୃଷ୍ଟି କରିଛି । ଫଳରେ ବିଶ୍ୱ ପୁଣି ଥରେ ତୈଳ ସଙ୍କଟ ଆଡ଼କୁ ମୁହାଁଇଛି
ଆମେରିକା ଏବଂ ଇରାନ ମଧ୍ୟରେ ଜାରି ରହିଥିବା ଯୁଦ୍ଧ ହର୍ମୁଜ୍ ପ୍ରଣାଳୀରେ ଅବରୋଧ ସ୍ଥିତି ସୃଷ୍ଟି କରିଛି। ଫଳରେ ବିଶ୍ୱ ପୁଣି ଥରେ ତୈଳ ସଙ୍କଟ ଆଡ଼କୁ ମୁହାଁଇଛି। ଏହି ସମୟରେ, ମଧ୍ୟପ୍ରାଚ୍ୟରେ ଏପରି କିଛି ଘଟିଛି ଯାହା ଏହି ତୈଳ ସଙ୍କଟକୁ ଆହୁରି ତୀବ୍ର କରିପାରେ ବୋଲି କୁହାଯାଉଛି। ୟେମେନରେ ଇରାନ ସମର୍ଥିତ ସଶସ୍ତ୍ର ଗୋଷ୍ଠୀ ହୁତି ଯୁଦ୍ଧକୁ ଡେଇଁଛି।
ହୁତିମାନେ କହିଛନ୍ତି ଯେ, ସେମାନେ ଲାଲ ସାଗର ଅବରୋଧ କରିବେ ଏବଂ ସାଉଦି ଆରବ ଜାହାଜର ଗତିବିଧିକୁ ରୋକିବେ। ଏହି ଧମକ ମଧ୍ୟପ୍ରାଚ୍ୟ ସଂଘର୍ଷରେ ଏକ ନୂତନ ମୋର୍ଚ୍ଚା ଖୋଲିବା ସହ ଅସ୍ଥିର ବିଶ୍ୱ ଶକ୍ତି ବଜାର ଉପରେ ଚାପ ବୃଦ୍ଧି କରିବାର ଆଶଙ୍କା ସୃଷ୍ଟି କରିଛି।ଇରାନ ଏବଂ ଆମେରିକା ପକ୍ଷରୁ ହର୍ମୁଜ୍ ପ୍ରଣାଳୀ ଅବରୋଧ କରାଯିବା ଯୋଗୁଁ ବିଶ୍ୱବ୍ୟାପୀ ଇନ୍ଧନ ଯୋଗାଣ ହ୍ରାସ ପାଇଛି ଏବଂ ମୂଲ୍ୟ ବୃଦ୍ଧି ପାଇଛି।
ଏପରି ପରିସ୍ଥିତିରେ, ଆମେରିକାର ସହଯୋଗୀ ସାଉଦି ଆରବ ଲୋହିତ ସାଗର ଦେଇ ଏହାର କିଛି ରପ୍ତାନି ପଠାଇବାରେ ସଫଳ ହୋଇଛି। ତେବେ ହୁତିମାନେ କହିଛନ୍ତି ଯେ, ସେମାନେ ଲୋହିତ ସାଗରର ଦକ୍ଷିଣ ପ୍ରବେଶ ଅଞ୍ଚଳ ବାବ୍ ଅଲ୍-ମାଣ୍ଡେବ ପ୍ରଣାଳୀ ଦେଇ ସାଉଦି ଜାହାଜଗୁଡ଼ିକୁ ଯିବାକୁ ଦେବେ ନାହିଁ। ଯଦି ହୁତିମାନେ ଏପରି କରନ୍ତି, ତେବେ ଏହା ବିଶ୍ୱବ୍ୟାପୀ ତୈଳ ସଙ୍କଟକୁ ଆହୁରି ବଢ଼ାଇବ।
ନ୍ୟୁୟର୍କ ଟାଇମ୍ସର ଏକ ରିପୋର୍ଟ ଅନୁଯାୟୀ, ହୁତି ସାମରିକ ମୁଖପାତ୍ର ୟାହ୍ୟା ସାରି ଏକ ଟେଲିଭିଜନ ଭାଷଣରେ କହିଛନ୍ତି ଯେ ସାଉଦି ଆରବ ପକ୍ଷରୁ ୟେମେନ ଉପରେ କରାଯାଉଥିବା ଲଗାତାର ଅବରୋଧର ଜବାବରେ ଏହି ପଦକ୍ଷେପ ନିଆଯାଇଛି।
