ପାୱାର ପ୍ଲାଣ୍ଟର ଗୋଟିଏ ୟୁନିଟ୍ ବନ୍ଦ ହେବା ଘଟଣାକୁ ବାଂଲାଦେଶର ଶାସକ ବାଂଲାଦେଶ ନ୍ୟାସନାଲିଷ୍ଟ ପାର୍ଟି ବା ବିଏନ୍ପିର କାର୍ଯ୍ୟକାରୀ ସାଧାରଣ ସମ୍ପାଦକ ରୁହୁଲ କବିର ରିଜଭି ବ୍ରିକ୍ସ ସମ୍ମିଳନୀ ସହ ଯୋଡ଼ିଛନ୍ତି ।
ବାଂଲାଦେଶକୁ ବିଜୁଳି ଯୋଗାଉଥିବା ଝାଡ଼ଖଣ୍ଡର ଗୋଡ୍ଡାସ୍ଥିତ ଆଦାନୀ ପାୱାର ପ୍ଲାଣ୍ଟକୁ ନେଇ ଏବେ ଚର୍ଚ୍ଚା ଜୋର ଧରିଛି । ପାୱାର ପ୍ଲାଣ୍ଟର ଗୋଟିଏ ୟୁନିଟ୍ ବନ୍ଦ ହେବା ଘଟଣାକୁ ବାଂଲାଦେଶର ଶାସକ ବାଂଲାଦେଶ ନ୍ୟାସନାଲିଷ୍ଟ ପାର୍ଟି ବା ବିଏନ୍ପିର କାର୍ଯ୍ୟକାରୀ ସାଧାରଣ ସମ୍ପାଦକ ରୁହୁଲ କବିର ରିଜଭି ବ୍ରିକ୍ସ ସମ୍ମିଳନୀ ସହ ଯୋଡ଼ିଛନ୍ତି । ତାଙ୍କ ଦାବି, ବାଂଲାଦେଶ ପ୍ରଧାନମନ୍ତ୍ରୀ ତାରିକ୍ ରହମାନ ନୂଆଦିଲ୍ଲୀରେ ଆୟୋଜିତ ବ୍ରିକ୍ସ ସମ୍ମିଳନୀରେ ଯୋଗ ନଦେବା ନିଷ୍ପତ୍ତି ନେବା ପରେ ହିଁ ଗୋଡ୍ଡା ପାୱାର ପ୍ଲାଣ୍ଟରେ ସମସ୍ୟା ଦେଖାଦେଇଥିଲା ।
ସୂଚନା ଅନୁସାରେ, ଝାଡ଼ଖଣ୍ଡର ଗୋଡ୍ଡା ପାୱାର ପ୍ଲାଣ୍ଟର ଦୁଇଟି ୟୁନିଟ୍ରୁ ଗୋଟିଏ ୟୁନିଟ୍ ସେପ୍ଟେମ୍ବର ୧୦ ତାରିଖ ରାତିରେ ବଏଲରରେ ତ୍ରୁଟି ଯୋଗୁଁ ବନ୍ଦ ହୋଇଯାଇଥିଲା । ଏହା ଫଳରେ ବାଂଲାଦେଶକୁ ଯାଉଥିବା ବିଦ୍ୟୁତ୍ ଯୋଗାଣ ପ୍ରାୟ ଅଧାକୁ କମିଯାଇଥିଲା। ତେବେ ମରାମତି କାମ ପରେ ସେପ୍ଟେମ୍ବର ୧୩ରେ ୟୁନିଟ୍ଟି ପୁଣି ଗ୍ରିଡ୍ ସହ ଯୋଡ଼ି ହୋଇଥିଲା ।
ଏହି ଘଟଣାକୁ ନେଇ ରିଜଭି ଭାରତ ଉପରେ ଅଭିଯୋଗ ଆଣିଛନ୍ତି । ଢାକାରେ ଏକ ପ୍ରତିବାଦ କାର୍ଯ୍ୟକ୍ରମରେ ସେ କହିଛନ୍ତି ଯେ, ତାରିକ୍ ରହମାନ ବ୍ରିକ୍ସ ସମ୍ମିଳନୀକୁ ଯିବେ ନାହିଁ ବୋଲି ନିଷ୍ପତ୍ତି ନେବା ପରଦିନ ହିଁ ପାୱାର ପ୍ଲାଣ୍ଟର ୟୁନିଟ୍ ବନ୍ଦ ହୋଇଥିଲା । ଏହା ପଛରେ କ’ଣ କାରଣ ରହିଛି, ତାହା ବୁଝିବା ପାଇଁ କୌଣସି ବିଶେଷ ଡିଗ୍ରୀ ଦରକାର ନାହିଁ ବୋଲି ସେ ମନ୍ତବ୍ୟ ଦେଇଛନ୍ତି । ଏପରିକି ପାୱାର ପ୍ଲାଣ୍ଟର ସ୍ୱିଚ୍ ଭାରତରେ ଥିବାରୁ ଏହାକୁ ଇଚ୍ଛା ଅନୁସାରେ ବନ୍ଦ କିମ୍ବା ଚାଲୁ କରାଯାଇପାରେ ବୋଲି ମଧ୍ୟ ସେ ଦାବି କରିଛନ୍ତି ।
ହେଲେ ରିଜଭିଙ୍କ ଏହି ଅଭିଯୋଗକୁ ସମର୍ଥନ କରିବା ପାଇଁ କୌଣସି ପ୍ରମାଣ ସାମ୍ନାକୁ ଆସିନାହିଁ । ଅନ୍ୟପକ୍ଷରେ, ପାୱାର ପ୍ଲାଣ୍ଟର ୟୁନିଟ୍ ବନ୍ଦ ହେବାର କାରଣ ଭାବେ ବଏଲର ସମସ୍ୟାକୁ ଦର୍ଶାଯାଇଛି । ମରାମତି ପରେ ଏହା ପୁଣି ଚାଲୁ ହୋଇଥିବାରୁ ଘଟଣାଟିକୁ ଏକ ପ୍ରାଯୁକ୍ତିକ ତ୍ରୁଟି ଭାବେ ଦର୍ଶାଯାଇଛି । ଏହା ପୂର୍ବରୁ ମଧ୍ୟ ବାଂଲାଦେଶର ଶକ୍ତି ଭିତ୍ତିଭୂମିକୁ ନେଇ ରିଜଭି ପ୍ରଶ୍ନ ଉଠାଇଥିଲେ। ମହେଶଖାଲିର LNG ଟର୍ମିନାଲରେ ଅଗ୍ନିକାଣ୍ଡ ପରେ ଗ୍ୟାସ୍ ଯୋଗାଣ ବାଧାପ୍ରାପ୍ତ ହୋଇଥିଲା । ପରେ ପୁଣି ଏକ ପ୍ରାଯୁକ୍ତିକ ସମସ୍ୟା ଯୋଗୁଁ ଟର୍ମିନାଲ୍ ବନ୍ଦ ହୋଇଥିଲା । ଏହି ଘଟଣାଗୁଡ଼ିକୁ ନେଇ ରିଜଭି ସାବୋଟାଜ୍ ବା ଷଡ଼ଯନ୍ତ୍ରର ଆଶଙ୍କା ପ୍ରକାଶ କରିଥିଲେ ।
ସେପଟେ ବ୍ରିକ୍ସ ସମ୍ମିଳନୀକୁ ତାରିକ୍ ରହମାନଙ୍କୁ ନିମନ୍ତ୍ରଣ ପ୍ରସଙ୍ଗରେ ଭାରତ ନିଜର ସ୍ଥିତି ସ୍ପଷ୍ଟ କରିଛି। ବୈଦେଶିକ ମନ୍ତ୍ରଣାଳୟ କହିଛି ଯେ, ରହମାନଙ୍କୁ ଦୁଇଟି ଅଲଗା ନିମନ୍ତ୍ରଣ ଦିଆଯାଇଥିଲା । ଗୋଟିଏ ଦ୍ୱିପାକ୍ଷିକ ସ୍ତରରେ ଏବଂ ଅନ୍ୟଟି ବ୍ରିକ୍ସ ଆଉଟ୍ରିଚ୍ ସେସନ୍ ପାଇଁ । ଏହି ଆମନ୍ତ୍ରଣ ବିମ୍ଷ୍ଟେକ୍ର ବର୍ତ୍ତମାନର ଅଧ୍ୟକ୍ଷ ଭାବେ ବାଂଲାଦେଶର ଭୂମିକାକୁ ଧ୍ୟାନରେ ରଖି ଦିଆଯାଇଥିବା ଭାରତ କହିଛି । ତେଣୁ ଗୋଡ୍ଡା ପାୱାର ପ୍ଲାଣ୍ଟର ତ୍ରୁଟି ଓ ବ୍ରିକ୍ସ ସମ୍ମିଳନୀ ପ୍ରସଙ୍ଗକୁ ନେଇ ବାଂଲାଦେଶରେ ରାଜନୈତିକ ତର୍କ ଜାରି ରହିଛି । ତେବେ ପାୱାର ପ୍ଲାଣ୍ଟ ବନ୍ଦ ହେବା ଘଟଣାକୁ ନେଇ ବର୍ତ୍ତମାନ ସୁଦ୍ଧା ଯେଉଁ ତଥ୍ୟ ସାମ୍ନାକୁ ଆସିଛି, ସେଥିରେ ବଏଲରର ପ୍ରାଯୁକ୍ତିକ ତ୍ରୁଟିକୁ କାରଣ ବୋଲି ଦର୍ଶାଯାଇଛି ।
