କଲମ୍ବିଆର କାଲି ସହରରେ ନିର୍ବାଚନ ପରେ ପ୍ରଦର୍ଶନକାରୀମାନେ ଆମେରିକୀୟ ପତାକା ପୋଡ଼ିବା ସହ ପୁଲିସ ସହ ଘଷାଘଷି କରିଛନ୍ତି।ଏହି ହିଂସା ଡୋନାଲ୍ଡ ଟ୍ରମ୍ପ ସମର୍ଥିତ ଦକ୍ଷିଣପନ୍ଥୀ ପ୍ରାର୍ଥୀଙ୍କ ସାନ୍ନିହିକ ଜୟ ପରେ ଆରମ୍ଭ ହୋଇଛି।
କଲମ୍ବିଆର ତୃତୀୟ ବୃହତ୍ତମ ସହର କାଲିରେ ପ୍ରଦର୍ଶନକାରୀମାନେ ଆମେରିକୀୟ ଜାତୀୟ ପତାକା ପୋଡ଼ିବା ସହିତ ପୁଲିସ ସହିତ ମୁହାଁମୁହିଁ ହୋଇଛନ୍ତି। ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ସମର୍ଥିତ ଦକ୍ଷିଣପନ୍ଥୀ ପ୍ରାର୍ଥୀ ଆବେଲାର୍ଡୋ ଡେ ଲା ଏସ୍ପ୍ରିଏଲା କଲମ୍ବିଆର ରାଷ୍ଟ୍ରପତି ନିର୍ବାଚନରେ ଅଳ୍ପ ଭୋଟରେ ବିଜୟୀ ହେବା ପରେ ଏହା ଘଟିଛି। ସମାଚାର ଏଜେନ୍ସି ଅନୁଯାୟୀ, ହଜାର ହଜାର ଲୋକଙ୍କ ଭିଡ଼କୁ ଘଉଡ଼ାଇବା ପାଇଁ ପୁଲିସ ଲୁହବୁହା ଗ୍ୟାସ୍ ବ୍ୟବହାର କରିଥିଲା। ଭିଡ଼ରେ କିଛି ଲୋକ ଆବେଲାର୍ଡୋ ଡେ ଲା ଏସ୍ପ୍ରିଏଲାଙ୍କ ବିଜୟ ନେଇ କ୍ରୋଧିତ ଥିଲେ। ସେମାନେ ହାତରେ ଇଟା ଏବଂ ଲୁହା ରଡ୍ ଧରିଥିଲେ।
ରାଷ୍ଟ୍ରପତି ନିର୍ବାଚନରେ ପ୍ରାୟ ସମସ୍ତ ମତଦାନ କେନ୍ଦ୍ରରୁ ଫଳାଫଳ ସହିତ, ଆବେଲାର୍ଡୋ ଡେ ଲା ଏସ୍ପ୍ରିଏଲା ୪୯.୬୬ ପ୍ରତିଶତ ଭୋଟ୍ ପାଇଛନ୍ତି, ଯେତେବେଳେ ବାମପନ୍ଥୀ ସେନେଟର ଇଭାନ ସେପେଡା ୪୮.୭୦ ପ୍ରତିଶତ ଭୋଟ୍ ପାଇଛନ୍ତି। ୪୭ ବର୍ଷୀୟ ଆବେଲାର୍ଡୋ ଡେ ଲା ଏସ୍ପ୍ରିଏଲାଙ୍କ ବିଜୟ ଆମେରିକା ସହିତ କଲମ୍ବିଆର ସମସ୍ୟାପୂର୍ଣ୍ଣ ସମ୍ପର୍କରେ ଉନ୍ନତି ଆଣିବାର ସମ୍ଭାବନା ରହିଛି। ନିର୍ବାଚନ ଫଳାଫଳ ଲାଟିନ୍ ଆମେରିକାରେ ଦକ୍ଷିଣପନ୍ଥୀ ନେତାମାନଙ୍କର କ୍ଷମତା ଦଖଲକୁ ସହଜ କରିବ ବୋଲି ଚର୍ଚ୍ଚା ହେଉଛି।
ଏକ ସୋସିଆଲ ମିଡିଆ ପୋଷ୍ଟରେ, ନବନିର୍ବାଚିତ କଲମ୍ବିଆ ରାଷ୍ଟ୍ରପତି କହିଛନ୍ତି ଯେ, ଆଜି କଲମ୍ବିଆ ତାର ସବୁଠାରୁ ଗୁରୁତ୍ୱପୂର୍ଣ୍ଣ ନିର୍ବାଚନରେ ବିଜୟୀ ହୋଇଛି। ସେ ଏହା ମଧ୍ୟ କହିଛନ୍ତି, ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ କଥା ହୋଇଛନ୍ତି। ଟ୍ରମ୍ପ ତାଙ୍କୁ ବିଜୟ ପାଇଁ ଅଭିନନ୍ଦନ ଜଣାଇବା ସହ ନିଜର ସମର୍ଥନ ଜଣାଇଥିଲେ।ଆବେଲାର୍ଡୋ ଡେ ଲା ଏସ୍ପ୍ରିଏଲାଙ୍କ ବିଜୟ ସହିତ, କଲମ୍ବିଆରେ ଦକ୍ଷିଣପନ୍ଥୀ ରାଜନୀତି ପୁନର୍ବାର କ୍ଷମତାକୁ ଫେରିଛି। ଗତ ୨୦୦ ବର୍ଷ ଧରି, ଦକ୍ଷିଣପନ୍ଥୀ ଦଳଗୁଡ଼ିକ ଚାରି ବର୍ଷକୁ ଛାଡ଼ିଦେଲେ ଅଧିକାଂଶ ସମୟ ପାଇଁ ଦେଶକୁ ଶାସନ କରିଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ନିର୍ବାଚନରେ ଦୁଇ ପ୍ରାର୍ଥୀଙ୍କ ମଧ୍ୟରେ ପାର୍ଥକ୍ୟ କେବଳ କିଛି ଲକ୍ଷ ଭୋଟ। ନିର୍ବାଚନ ପ୍ରଚାରରେ ବହୁ ବିବାଦ ଏବଂ ସଂଘର୍ଷ ହୋଇଥିଲା।
ବାମପନ୍ଥୀ ସମର୍ଥକମାନେ କଲମ୍ବିଆ ନିର୍ବାଚନରେ ଆମେରିକାର ହସ୍ତକ୍ଷେପ ଯୋଗୁଁ ଏସ୍ପ୍ରିଏଲାଙ୍କ ବିଜୟ ହୋଇଥିବା ଅଭିଯୋଗ କରୁଛନ୍ତି।ଆବେଲାର୍ଡୋ ଡେ ଲା ଏସ୍ପ୍ରିଏଲାଙ୍କର ଆମେରିକା ଏବଂ କଲମ୍ବିଆ ଉଭୟର ନାଗରିକତା ରହିଛି। ସେ ନିଜକୁ ‘ଏଲ୍ ଟାଇଗ୍ରେ’ (ବାଘ) ବୋଲି କହିଥାନ୍ତି। ନିର୍ବାଚନ ପ୍ରଚାର ସମୟରେ, ସେ କହିଥିଲେ, ବିଦ୍ରୋହୀ ଗୋଷ୍ଠୀମାନଙ୍କ ସହିତ ଚାଲିଥିବା ଶାନ୍ତି ଆଲୋଚନା ବନ୍ଦ କରିବେ। ସେ ଏହା ମଧ୍ୟ କହିଥିଲେ ଯେ, ସେ ଆମେରିକା ସମର୍ଥନରେ ଏହି ଗୋଷ୍ଠୀଗୁଡ଼ିକ ବିରୋଧରେ ୯୦ ଦିନିଆ ବିମାନ ଆକ୍ରମଣ ଅଭିଯାନ ଆରମ୍ଭ କରିବେ।ସୂଚନାଯୋଗ୍ୟ,ଡ୍ରଗ୍ସ କାର୍ଟେଲ ଏବଂ ବିଦ୍ରୋହୀ ଗୋଷ୍ଠୀ ଏବେ ବି ଦେଶର କିଛି ଅଞ୍ଚଳକୁ ନିୟନ୍ତ୍ରଣ କରୁଛନ୍ତି। କୋକେନ୍ ରପ୍ତାନି ସର୍ବକାଳୀନ ସର୍ବାଧିକ ସ୍ତରରେ ପହଞ୍ଚିଛି।
