ବଦଳିଲା ପାସପୋର୍ଟ ନିୟମ, ବଢ଼ିଲା ଫି, ଛୁଆଙ୍କ ପାଇଁ ନୂଆ ବ୍ୟବସ୍ଥା

ବିଦେଶ ଯିବା ପୂର୍ବରୁ ପାସପୋର୍ଟ କରାଇବାକୁ ଯୋଜନା କରୁଛନ୍ତି କି? ତେବେ ଜାଣନ୍ତୁ ନୂଆ ନିୟମ ଓ ଫି’ ବିଷୟରେ। ଶିଶୁଙ୍କ ପାସପୋର୍ଟର ବୈଧତା ସହ ସାଧାରଣ ଓ ତତ୍କାଳ ପାସପୋର୍ଟର ଫି’ରେ ପରିବର୍ତ୍ତନ ହୋଇଛି। ଏଥିସହ ନୂଆ ପାସପୋର୍ଟ ପାଇଁ ୮ ବର୍ଷରୁ କମ୍ ପିଲା ଏବଂ ୬୦ ବର୍ଷରୁ ଅଧିକ ବୟସର ନୂଆ ଆବେଦନକାରୀଙ୍କ ପାଇଁ ୧୦% ଫି’ ରିହାତି ବ୍ୟବସ୍ଥା ରହିଛି। ଆବେଦନ ପୂର୍ବରୁ ନୂଆ ଫି’ ଓ ନିୟମ ଯାଞ୍ଚ କରିବା ଜରୁରୀ।

ଯଦି ଆପଣ ବିଦେଶ ଯିବା ପାଇଁ ଚାହୁଁଛନ୍ତି ଆଉ ଏଥିପାଇଁ ପାସପୋର୍ଟ ପ୍ରସ୍ତୁତ କରିବାକୁ ଯୋଜନା କରୁଛନ୍ତି, ତେବେ ଆପଣଙ୍କ ପାଇଁ ଏହା ଏକ ବଡ଼ ଖବର। ପାସପୋର୍ଟ ସମ୍ବନ୍ଧୀୟ ନିୟମରେ କେନ୍ଦ୍ର ସରକାର କିଛିଟା ପରିବର୍ତ୍ତନ ଆଣିଛନ୍ତି। ବିଦେଶ ମନ୍ତ୍ରଣାଳୟ ବା MEA ପକ୍ଷରୁ ଏ ସଂପର୍କିତ ସୂଚନା ଜାରି କରାଯାଇଛି।

ନୂଆ ବ୍ୟବସ୍ଥାରେ ଶିଶୁଙ୍କ ପାସପୋର୍ଟର ବୈଧତା ସହ ବିଭିନ୍ନ ପାସପୋର୍ଟ ସେବା ବାବଦରେ ଥିବା ଶୁଳ୍କରେ ମଧ୍ୟ ପରିବର୍ତ୍ତନ ହୋଇଛି। ନୂଆ ନିୟମ ଅନୁଯାୟୀ, ୧୫ ବର୍ଷରୁ କମ୍ ବୟସର ପିଲାଙ୍କୁ ୩୬ ପୃଷ୍ଠାର ସାଧାରଣ ପାସପୋର୍ଟ ଦିଆଯିବ। ଏହି ପାସପୋର୍ଟର ବୈଧତା, ପାସପୋର୍ଟ ଜାରି ହେବା ଦିନଠାରୁ ୫ ବର୍ଷ କିମ୍ବା ପିଲା ୧୮ ବର୍ଷ ବୟସରେ ପହଞ୍ଚିବା ପର୍ଯ୍ୟନ୍ତ ରହିବ। ଏହି ଦୁଇଟି ବ୍ୟବସ୍ଥା ମଧ୍ୟରୁ ଯେଉଁଟି ପ୍ରଥମେ ଆସିବ, ସେହି ତାରିଖକୁ ପାସପୋର୍ଟର ବୈଧତାର ଶେଷ ତାରିଖ ଭାବେ ଧରାଯିବ। ଅର୍ଥାତ୍‌, ପିଲାଙ୍କ ବୟସ ଅନୁଯାୟୀ ପାସପୋର୍ଟର ବୈଧତା ୫ ବର୍ଷରୁ କମ୍ ମଧ୍ୟ ହୋଇପାରେ।

ବଢ଼ିଲା ପାସପୋର୍ଟ ଫି 
ନୂଆ ବ୍ୟବସ୍ଥାରେ ସାଧାରଣ ପାସପୋର୍ଟ, ତତ୍କାଳ ପାସପୋର୍ଟ ଏବଂ ପାସପୋର୍ଟ ହଜିଯିବା କିମ୍ବା ନଷ୍ଟ ହେବା ପରେ ନୂଆ ପାସପୋର୍ଟ କରାଇବା ଭଳି କିଛି ସେବାର ଫି’ ବୃଦ୍ଧି ପାଇଛି।

ପରିବର୍ତ୍ତିତ ଫି’ ଅନୁଯାୟୀ

• ୩୬ ପୃଷ୍ଠାର ସାଧାରଣ ପାସପୋର୍ଟ: ₹୧,୫୦୦ ବଦଳରେ ₹୨,୫୦୦
• ୬୦ ପୃଷ୍ଠାର ସାଧାରଣ ପାସପୋର୍ଟ: ₹୨,୦୦୦ ବଦଳରେ ₹୩,୫୦୦
• ୩୬ ପୃଷ୍ଠାର ତତ୍କାଳ ପାସପୋର୍ଟ: ₹୩,୫୦୦ ବଦଳରେ ₹୫,୦୦୦
• ୬୦ ପୃଷ୍ଠାର ତତ୍କାଳ ପାସପୋର୍ଟ: ₹୪,୦୦୦ ବଦଳରେ ₹୬,୦୦୦
• ୬୦ ପୃଷ୍ଠାର ପାସପୋର୍ଟ ହଜିଗଲେ କିମ୍ବା ନଷ୍ଟ ହେଲେ: ₹୫,୫୦୦ ବଦଳରେ ₹୮,୫୦୦
• ୩୬ ପୃଷ୍ଠାର ମାଇନର ପାସପୋର୍ଟ: ₹୧,୭୫୦
• ୩୬ ପୃଷ୍ଠାର ମାଇନର ତତ୍କାଳ ପାସପୋର୍ଟ: ₹୩,୦୦୦
  ଏହା ଫଳରେ ବିଶେଷକରି ତତ୍କାଳ ପାସପୋର୍ଟ ଆବଶ୍ୟକ କରୁଥିବା ଆବେଦନକାରୀଙ୍କୁ ପୂର୍ବ ତୁଳନାରେ ଅଧିକ ଫି’ ଦେବାକୁ ପଡ଼ିବ ।

କାହାକୁ ମିଳିବ ୧୦% ରିହାତି ?
ପାସପୋର୍ଟ ପାଇଁ ନୂଆ କରି ଆବେଦନ କରୁଥିବା ୮ ବର୍ଷରୁ କମ୍ ବୟସର ପିଲା ଏବଂ ୬୦ ବର୍ଷରୁ ଅଧିକ ବୟସର ବରିଷ୍ଠ ନାଗରିକଙ୍କୁ ୧୦% ଫି’ ରିହାତି ମିଳିବ। ତେବେ ଏହି ରିହାତି ପାସପୋର୍ଟ ରି-ଇସ୍ୟୁ କରାଇବା ସମୟରେ ଲାଗୁହେବ ନାହିଁ। ତେଣୁ ଆବେଦନକାରୀ ଫ୍ରେଶ୍ ପାସପୋର୍ଟ କରୁଛନ୍ତି ନା ପୁରୁଣା ପାସପୋର୍ଟ ରି-ଇସ୍ୟୁ କରୁଛନ୍ତି, ତାହା ଅନୁଯାୟୀ ଫି’ ଲାଗୁ ହେବ।

ଆବେଦନ ପୂର୍ବରୁ ନିଶ୍ଚୟ ଜାଣନ୍ତୁ ଏହି କଥା
ପାସପୋର୍ଟ ପାଇଁ ଆବେଦନ କରିବା ପୂର୍ବରୁ ନିଜର ବୟସ, ପାସପୋର୍ଟର ପ୍ରକାର, ପୃଷ୍ଠା ସଂଖ୍ୟା ଏବଂ ତତ୍କାଳ ସେବା ଆବଶ୍ୟକ କି ନାହିଁ ଏସବୁ ଯାଞ୍ଚ କରିବା ଜରୁରୀ। ଫି’ରେ ପରିବର୍ତ୍ତନ ହୋଇଥିବାରୁ ପୁରୁଣା ତଥ୍ୟ ଆଧାରରେ ଟଙ୍କା ଜମା ନକରି ଆବେଦନ ସମୟରେ ଅଧିକାରୀଙ୍କ ପାସପୋର୍ଟ ସେବା ପୋର୍ଟାଲରେ ଲାଗୁଥିବା ଫି’ ଯାଞ୍ଚ କରିବା ଉଚିତ। 

ପାସପୋର୍ଟ ସେବା ପାଇଁ ଅନଧିକୃତ ୱେବସାଇଟ୍ କିମ୍ବା ଏଜେଣ୍ଟଙ୍କ ଉପରେ ନିର୍ଭର ନକରି ସରକାରୀ ପୋର୍ଟାଲରୁ ଆବେଦନ ପ୍ରକ୍ରିୟା ଏବଂ ଫି’ ସମ୍ପର୍କିତ ସୂଚନା ନେବା ନିରାପଦ। ନୂଆ ନିୟମ ଲାଗୁ ହେବା ପରେ ଶିଶୁଙ୍କ ପାସପୋର୍ଟର ବୈଧତା ଏବଂ ବିଭିନ୍ନ ପାସପୋର୍ଟ ସେବାର ଖର୍ଚ୍ଚକୁ ନେଇ ଆବେଦନକାରୀଙ୍କୁ ଅଧିକ ସଚେତନ ହୋଇ ଆବେଦନ କରିବାକୁ ପଡ଼ିବ ।