ଗୋଟିଏ ପଟେ ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଆପଣାଯାଉଥିବା କଥା କହୁଛନ୍ତି ସରକାର, ଅନ୍ୟପଟେ ପାକିସ୍ତାନକୁ ଅନ୍ତର୍ଜାତୀୟ ସମ୍ମିଳନୀ ପାଇଁ ନିମନ୍ତ୍ରଣ କରୁଛନ୍ତି ।
ପାକିସ୍ତାନକୁ ନିମନ୍ତ୍ରଣ କରିବା ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କୁ ଘେରିଛନ୍ତି ଶିବସେନା ନେତ୍ରୀ ପ୍ରିୟଙ୍କା ଚତୁର୍ବେଦୀ । ଗୋଟିଏ ପଟେ ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଆପଣାଯାଉଥିବା କଥା କହୁଛନ୍ତି ସରକାର, ଅନ୍ୟପଟେ ପାକିସ୍ତାନକୁ ଅନ୍ତର୍ଜାତୀୟ ସମ୍ମିଳନୀ ପାଇଁ ନିମନ୍ତ୍ରଣ କରୁଛନ୍ତି । ଏହା କି ପ୍ରକାର କୂଟନୀତି ବୋଲି ପ୍ରଶ୍ନ ଉଠାଇବା ସହ ସରକାରଙ୍କ ଆଭିମୁଖ୍ୟକୁ ସେ କପଟତା ବୋଲି ଅଭିଯୋଗ କରିଛନ୍ତି ।
ନଭେମ୍ବର ୨୦ରୁ ୨୨ ତାରିଖ ପର୍ଯ୍ୟନ୍ତ ନୂଆଦିଲ୍ଲୀରେ ସାଂଘାଇ ସହଯୋଗ ସଂଗଠନ ଶିଖର ସମ୍ମିଳନୀ ଆୟୋଜନ ହେବାକୁ ଯାଉଛି । ଏଥିପାଇଁ ପାକିସ୍ତାନକୁ ନିମନ୍ତ୍ରଣ କରାଯିବା ପରେ ଦେଶର ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି। ଏସ୍ସିଓର ସଦସ୍ୟ ରାଷ୍ଟ୍ର ଭାବେ ପାକିସ୍ତାନକୁ ନିମନ୍ତ୍ରଣ କରିବା ଭାରତର ଦାୟିତ୍ୱ ବୋଲି କିଛି ଅନ୍ତର୍ଜାତୀୟ ବିଶେଷଜ୍ଞ ମତ ଦେଇଛନ୍ତି। ତେବେ ଏହି ନିଷ୍ପତ୍ତିକୁ ନେଇ ବିରୋଧୀ ଦଳ ପ୍ରଶ୍ନ ଉଠାଇଛନ୍ତି ।
ପ୍ରିୟଙ୍କା ଚତୁର୍ବେଦୀ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆତଙ୍କବାଦ ବିରୋଧରେ କଠୋର ଆଭିମୁଖ୍ୟ ଏବଂ ଆତଙ୍କବାଦ ସହ କୌଣସି ଆଲୋଚନା ନକରିବାର ପ୍ରତିଶ୍ରୁତି ଦେଇଥିଲେ । ତେବେ ଏଭଳି ସ୍ଥିତିରେ ପାକିସ୍ତାନକୁ କାହିଁକି ନିମନ୍ତ୍ରଣ କରାଯାଉଛି ବୋଲି ସେ ପ୍ରଶ୍ନ କରିଛନ୍ତି । ଗୋଟିଏ ପଟେ ପାକିସ୍ତାନକୁ ଜଳ ଯୋଗାଣ ବନ୍ଦ କରିବା ଭଳି କଠୋର ପଦକ୍ଷେପର କଥା କୁହାଯାଉଛି, ଅନ୍ୟପଟେ ତାକୁ ଅନ୍ତର୍ଜାତୀୟ ସମ୍ମିଳନୀକୁ ନିମନ୍ତ୍ରଣ କରାଯାଉଛି। ଏହି ଦୁଇ ଆଭିମୁଖ୍ୟ ମଧ୍ୟରେ ସମନ୍ୱୟ କେଉଁଠି ବୋଲି ସେ ପଚାରିଛନ୍ତି ।
ଏହା ସହ ୨୦୧୫ରେ ପ୍ରଧାନମନ୍ତ୍ରୀ ମୋଦୀଙ୍କ ଅଚାନକ ପାକିସ୍ତାନ ଗସ୍ତ କଥା ମଧ୍ୟ ଉଠାଇଛନ୍ତି ପ୍ରିୟଙ୍କା । ସେତେବେଳେ ତତ୍କାଳୀନ ପାକିସ୍ତାନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ପରିବାରର ଏକ ବିବାହ ଉତ୍ସବରେ ଯୋଗଦେବା ପାଇଁ ମୋଦୀ ପାକିସ୍ତାନ ଯାଇଥିଲେ । ଏହାପରେ ଆତଙ୍କବାଦୀ ଘଟଣା ମାଧ୍ୟମରେ ଭାରତକୁ ଜବାବ ମିଳିଥିଲା ବୋଲି ସେ ମତ ଦେଇଛନ୍ତି ।
ପ୍ରିୟଙ୍କା ଆହୁରି କହିଛନ୍ତି ଯେ, ପାକିସ୍ତାନ ସହ ବାରମ୍ବାର ଆଲୋଚନା ପାଇଁ ନିମନ୍ତ୍ରଣ, କ୍ରିକେଟ୍ ଖେଳିବା ଏବଂ ଅନ୍ୟପଟେ ଆତଙ୍କବାଦ ବିରୋଧରେ କଠୋର ପଦକ୍ଷେପ ନେବାର ଦାବି କରିବା ମଧ୍ୟରେ ବିରୋଧାଭାସ ରହିଛି । ଏହା ସରକାରଙ୍କ ଦ୍ୱୈତ ଆଭିମୁଖ୍ୟକୁ ଦର୍ଶାଉଛି ବୋଲି ସେ ଅଭିଯୋଗ କରିଛନ୍ତି । ଅନ୍ୟପକ୍ଷରେ, ଏସ୍ସିଓ ଏକ ଅନ୍ତର୍ଜାତୀୟ ସଂଗଠନ ହୋଇଥିବାରୁ ଏହାର ସମସ୍ତ ସଦସ୍ୟ ରାଷ୍ଟ୍ରଙ୍କୁ ସମ୍ମିଳନୀରେ ନିମନ୍ତ୍ରଣ କରିବା ସଂଗଠନର କାର୍ଯ୍ୟପ୍ରଣାଳୀର ଅଂଶ ବୋଲି ବିଶେଷଜ୍ଞମାନେ ମତ ଦେଇଛନ୍ତି । ଏହି ପ୍ରସଙ୍ଗକୁ ନେଇ ଏବେ କେନ୍ଦ୍ର ସରକାର ଓ ବିରୋଧୀଙ୍କ ମଧ୍ୟରେ ରାଜନୈତିକ ବିତର୍କ ଜୋର୍ ଧରିଛି ।
