ଦେଶର ସବୁଠୁ ପାୱାରଫୁଲ୍ ଲିଡରଙ୍କ ସୁରକ୍ଷା ଜଣେ ମହିଳାଙ୍କ ହାତରେ, ଜାଣନ୍ତୁ ମେଜର ନବ୍ୟା ଶେଖାୱତଙ୍କ କାହାଣୀ

ଆପଣ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠିକ୍ ପାଖରେ ଜଣେ ମହିଳା ସାମରିକ ଅଧିକାରୀଙ୍କୁ ସମ୍ପୂର୍ଣ୍ଣ ସତର୍କତାର ସହ ଠିଆ ହୋଇଥିବାର ଦେଖିଥିବେ । ଚେହେରାରେ ଅଦ୍ଭୁତ ଅନୁଶାସନ, ଚିଲ ଭଳି ତୀକ୍ଷ୍ଣ ନଜର ଏବଂ ଚାଲିରେ ଦେଶର ଗର୍ବ । ଏହି ଅଧିକାରୀ ଜଣକ ହେଉଛନ୍ତି ମେଜର ନବ୍ୟା ଶେଖାୱତ ।

ଯେତେବେଳେ ରାଷ୍ଟ୍ରପତି ଭବନରେ କୌଣସି ବଡ଼ ସରକାରୀ କାର୍ଯ୍ୟକ୍ରମ ଚାଲିଥାଏ, ସେତେବେଳେ ଆପଣ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠିକ୍ ପାଖରେ ଜଣେ ମହିଳା ସାମରିକ ଅଧିକାରୀଙ୍କୁ ସମ୍ପୂର୍ଣ୍ଣ ସତର୍କତାର ସହ ଠିଆ ହୋଇଥିବାର ଦେଖିଥିବେ । ଚେହେରାରେ ଅଦ୍ଭୁତ ଅନୁଶାସନ, ଚିଲ ଭଳି ତୀକ୍ଷ୍ଣ ନଜର ଏବଂ ଚାଲିରେ ଦେଶର ଗର୍ବ । ଏହି ଅଧିକାରୀ ଜଣକ ହେଉଛନ୍ତି ମେଜର ନବ୍ୟା ଶେଖାୱତ । ସେ ଯାହା କରି ଦେଖାଇଛନ୍ତି, ତାହା ଭାରତୀୟ ସେନା ଇତିହାସରେ ସୁବର୍ଣ୍ଣ ଅକ୍ଷରରେ ଲିପିବଦ୍ଧ ହୋଇଯାଇଛି ।

ରାଷ୍ଟ୍ରପତିଙ୍କ ପ୍ରଥମ ମହିଳା ସେନା ADC

ମେଜର ନବ୍ୟା ଶେଖାୱତ ଭାରତୀୟ ସେନାର ପ୍ରଥମ ମହିଳା ଅଧିକାରୀ ହୋଇଛନ୍ତି, ଯିଏକି ଭାରତର ରାଷ୍ଟ୍ରପତିଙ୍କ ‘ଏଡସ୍-ଡି-କ୍ୟାମ୍ପ’ ଭାବରେ ନିଯୁକ୍ତ ହୋଇଛନ୍ତି । ସହଜ ଭାଷାରେ କହିଲେ, ରାଷ୍ଟ୍ରପତିଙ୍କ ସୁରକ୍ଷା ଏବଂ ପ୍ରୋଟୋକଲ୍ ପାଇଁ ଯେଉଁ ସବୁଠାରୁ ବିଶ୍ୱସ୍ତ ଏବଂ ସ୍ୱତନ୍ତ୍ର ଅଧିକାରୀଙ୍କୁ ନିୟୋଜିତ କରାଯାଇଥାଏ, ମେଜର ନବ୍ୟା ଏବେ ସେମାନଙ୍କର ନେତୃତ୍ୱ ନେଉଛନ୍ତି ।

ସାଧାରଣତଃ ରାଷ୍ଟ୍ରପତିଙ୍କ ସହାୟତା ପାଇଁ ପାଞ୍ଚ ଜଣ ADC ଥାଆନ୍ତି – ତିନି ଜଣ ସ୍ଥଳସେନାରୁ, ଜଣେ ନୌସେନାରୁ ଏବଂ ଜଣେ ବାୟୁସେନାରୁ । ଦଶନ୍ଧି ଧରି ଏହି ପଦବୀଗୁଡ଼ିକରେ କେବଳ ପୁରୁଷମାନଙ୍କର ପ୍ରାଧାନ୍ୟ ରହିଥିଲା । କିନ୍ତୁ ସମୟ ବଦଳିଛି , ୨୦୨୫ ମସିହାରେ ନୌସେନାର ଲେଫ୍ଟନାଣ୍ଟ କମାଣ୍ଡର ଯଶସ୍ୱୀ ସୋଲାଙ୍କି ପ୍ରଥମ ମହିଳା ADC ହୋଇଥିଲେ । ଏବେ ସେହି ପରମ୍ପରାକୁ ଆଗକୁ ନେଇ ସ୍ଥଳସେନାରୁ ପ୍ରଥମ ଥର ପାଇଁ ମେଜର ନବ୍ୟା ନିଜର ପାରଦର୍ଶିତା ପ୍ରମାଣ କରିଛନ୍ତି ।

‘ଆର୍ମି ସର୍ଭିସ କର୍ପସ’ର ଜଣେ ସାହସୀ ଅଧିକାରୀ ମେଜର ନବ୍ୟା ଏବେ ରାଷ୍ଟ୍ରପତିଙ୍କ ପ୍ରତ୍ୟେକ ଗୁରୁତ୍ୱପୂର୍ଣ୍ଣ ଗସ୍ତ, ଦେଶ-ବିଦେଶର ଅତିଥିଙ୍କ ସ୍ୱାଗତ ଏବଂ ବଡ଼ ବଡ଼ ସମ୍ମାନ ସମାରୋହରେ ଛାଇ ପରି ସାଙ୍ଗରେ ରହୁଛନ୍ତି । ଆଜିକାଲି ସୋସିଆଲ ମିଡିଆରେ ତାଙ୍କର ଫଟୋ ଏବଂ ଭିଡିଓ ଭାଇରାଲ ହେବାରେ ଲାଗିଛି । ସେନା ପୋଷାକ ପିନ୍ଧିବାର ସ୍ୱପ୍ନ ଦେଖୁଥିବା ଦେଶର ହଜାର ହଜାର ଝିଅଙ୍କ ପାଇଁ ମେଜର ନବ୍ୟା ଏବେ ଏକ ପ୍ରେରଣା ପାଲଟିଛନ୍ତି ।

କିପରି ଥିଲା ମେଜର ନବ୍ୟାଙ୍କ ଯାତ୍ରା?

ଏହି ସଫଳତା ପଛରେ ବହୁ ବର୍ଷର କଠିନ ପରିଶ୍ରମ ଏବଂ ତ୍ୟାଗ ଲୁଚି ରହିଛି । ନବ୍ୟାଙ୍କ ଯାତ୍ରା ଦେଶର ଲକ୍ଷ ଲକ୍ଷ ଯୁବକଙ୍କ ଭଳି ଆରମ୍ଭ ହୋଇଥିଲା । ସେ UPSCର ଅତ୍ୟନ୍ତ କଠିନ CDS ପରୀକ୍ଷା ପାସ୍ କରିଥିଲେ । ଏହା ପରେ ଚେନ୍ନାଇର ପ୍ରସିଦ୍ଧ ଅଫିସର୍ସ ଟ୍ରେନିଂ ଏକାଡେମୀ (OTA) ପାଇଁ ତାଙ୍କର ଚୟନ ହୋଇଥିଲା । OTAର ପ୍ରଶିକ୍ଷଣ ଏତେ କଠିନ ଯେ ସେଠାରେ ଶାରୀରିକ ଶକ୍ତି ଅପେକ୍ଷା ମାନସିକ ଦୃଢ଼ତାକୁ ଅଧିକ ପରୀକ୍ଷା କରାଯାଇଥାଏ । ନବ୍ୟା ଏହି ପରୀକ୍ଷାରେ କେବଳ ଉତ୍ତୀର୍ଣ୍ଣ ହୋଇନାହାଁନ୍ତି, ବରଂ ସେନାର ଗୁରୁତ୍ୱପୂର୍ଣ୍ଣ ‘ଆର୍ମି ସର୍ଭିସ କର୍ପସ’ରେ ନିଜ ପାଇଁ ସ୍ଥାନ ସୃଷ୍ଟି କରିଛନ୍ତି । 

ନବ୍ୟାଙ୍କର ଏହି ସଫଳତା କେବଳ ତାଙ୍କର ନୁହେଁ, ବରଂ ଏହା ଭାରତୀୟ ସେନାରେ ମହିଳାମାନଙ୍କ ସଂଘର୍ଷ ଏବଂ ବିଜୟର କାହାଣୀ । ୧୯୯୨ ମସିହାରେ ପ୍ରଥମ ଥର ପାଇଁ ମହିଳାମାନଙ୍କୁ ସେନାରେ ପ୍ରବେଶ ଅନୁମତି ମିଳିଥିଲା । ଏହା ପରେ ୨୦୨୦ ମସିହାରେ ସୁପ୍ରିମକୋର୍ଟଙ୍କ ଐତିହାସିକ ନିଷ୍ପତ୍ତି ସେନାର ଦ୍ୱାର ମହିଳାମାନଙ୍କ ପାଇଁ ସମ୍ପୂର୍ଣ୍ଣ ରୂପେ ଖୋଲିଦେଲା । ଆଜି ଦେଶର ଝିଅମାନେ କେବଳ ସୀମାରେ ନୁହେଁ, ବରଂ ବଡ଼ ବଡ଼ କମାଣ୍ଡିଂ ଭୂମିକାରେ ମଧ୍ୟ ଦେଶର ଗୌରବ ବଢ଼ାଉଛନ୍ତି । ମେଜର ନବ୍ୟା ପ୍ରମାଣ କରିଛନ୍ତି ଯେ, ଯଦି ପାଖରେ ଦକ୍ଷତା ଏବଂ ଦେଶ ପାଇଁ କିଛି କରିବାର ନିଶା ଅଛି, ତେବେ ସେନାର ଯେକୌଣସି ବିଭାଗରେ ରହି ଇତିହାସ ରଚିପାରିବେ ।