ମହିଳା ଏସିଆ କପ୍ ଟ୍ବେଣ୍ଟି-୨୦ରେ ଶନିବାର ଦେଖିବାକୁ ମିଳିବ ହାଇଭୋଲଟେଜ୍ ମୁକାବିଲା । ଗ୍ରୁପ୍-ଏ’ର ଶେଷ ମ୍ୟାଚ୍ରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ଭେଟିବ ଭାରତ । ପ୍ରଥମ ଦୁଇଟି ମ୍ୟାଚ୍ ଜିତି ଭାରତ ସେମିଫାଇନାଲ୍ ଟିକେଟ୍ ହାସଲ କରିସାରିଛି ।
ମହିଳା ଏସିଆ କପ୍ ଟ୍ବେଣ୍ଟି-୨୦ରେ ଶନିବାର ଦେଖିବାକୁ ମିଳିବ ହାଇଭୋଲଟେଜ୍ ମୁକାବିଲା । ଗ୍ରୁପ୍-ଏ’ର ଶେଷ ମ୍ୟାଚ୍ରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ଭେଟିବ ଭାରତ । ପ୍ରଥମ ଦୁଇଟି ମ୍ୟାଚ୍ ଜିତି ଭାରତ ସେମିଫାଇନାଲ୍ ଟିକେଟ୍ ହାସଲ କରିସାରିଛି । ତେଣୁ ପାକିସ୍ତାନ ବିପକ୍ଷରେ ବିଜୟ ସହ ଲିଗ୍ ପର୍ଯ୍ୟାୟ ଶେଷ କରିବାକୁ ଦଳ ଲକ୍ଷ୍ୟ ରଖିଛି ।
ଦୁବାଇ ଇଣ୍ଟରନ୍ୟାସନାଲ୍ ଷ୍ଟାଡିୟମ୍ରେ ହେବାକୁ ଥିବା ଏହି ମ୍ୟାଚ୍ରେ ଭାରତକୁ ଫେଭରିଟ୍ ଭାବେ ଦେଖାଯାଉଛି । ଉଭୟ ଦଳ ଟ୍ବେଣ୍ଟି-୨୦ରେ ୧୭ ଥର ମୁହାଁମୁହିଁ ହୋଇଥିବା ବେଳେ ଭାରତ ୧୪ଟି ମ୍ୟାଚ୍ ଜିତିଛି । ପାକିସ୍ତାନର ଖାତାରେ ରହିଛି ମାତ୍ର ୩ଟି ବିଜୟ । ଚଳିତ ଏସିଆ କପ୍ରେ ଭାରତର ଅଭିଯାନ ଜବରଦସ୍ତ ରହିଛି। ପ୍ରଥମ ମ୍ୟାଚ୍ରେ ଥାଇଲାଣ୍ଡ ବିପକ୍ଷରେ ବ୍ୟାଟିଂ ସେତେଟା ଭଲ ନଥିଲେ ମଧ୍ୟ ଶେଫାଳି ବର୍ମାଙ୍କ ୬୪ ରନ୍ ଏବଂ ବୋଲରଙ୍କ ଦମ୍ଦାର ପ୍ରଦର୍ଶନ ବଳରେ ଭାରତ ବଡ଼ ବିଜୟ ହାସଲ କରିଥିଲା । ଦ୍ୱିତୀୟ ମ୍ୟାଚ୍ରେ ହଂକଂକୁ ହରାଇଥିଲା ଟିମ୍ ଇଣ୍ଡିଆ। ଏହି ମ୍ୟାଚ୍ରେ ସ୍ମୃତି ମନ୍ଧାନାଙ୍କ ରେକର୍ଡ ଶତକ ଦଳକୁ ସହଜ ବିଜୟ ଦେଇଥିଲା ।
ପ୍ରଥମ ଦୁଇ ମ୍ୟାଚ୍ରେ ସ୍ମୃତି ମନ୍ଧାନା ଓ ଶେଫାଳି ବର୍ମା ହିଁ ବ୍ୟାଟିଂରେ ମୁଖ୍ୟ ଭୂମିକା ନେଇଛନ୍ତି । ଏବେ ପାକିସ୍ତାନ ବିପକ୍ଷରେ ପ୍ରତୀକା ରାୱଲ, ରିଚା ଘୋଷ ଏବଂ ଅଧିନାୟିକା ହର୍ମନ୍ପ୍ରୀତ୍ କୌରଙ୍କଠାରୁ ବଡ଼ ସ୍କୋର୍ ଆଶା କରୁଛି ଦଳ । ବୋଲିଂରେ କ୍ରାନ୍ତି ଗୌଡ଼ଙ୍କୁ ନନ୍ଦନୀ ଶର୍ମା ଭଲ ସହଯୋଗ ଦେଉଛନ୍ତି । ଏହାପରେ ସ୍ପିନରମାନେ ବିପକ୍ଷ ବ୍ୟାଟରଙ୍କୁ ଚାପରେ ରଖୁଛନ୍ତି। ଫଳରେ ଭାରତ ବିପକ୍ଷ ଦଳଗୁଡ଼ିକୁ ବଡ଼ ସ୍କୋର୍ କରିବାର ସୁଯୋଗ ଦେଉନାହିଁ ।
ଅନ୍ୟପକ୍ଷରେ ପାକିସ୍ତାନ ଥାଇଲାଣ୍ଡକୁ ହରାଇଥିଲେ ମଧ୍ୟ ଦଳର ବ୍ୟାଟିଂକୁ ନେଇ ପ୍ରଶ୍ନ ରହିଛି । ପାୱାରପ୍ଲେରେ ୩ଟି ୱିକେଟ୍ ହରାଇ ଚାପରେ ପଡ଼ିଥିଲା ପାକିସ୍ତାନ। ଶେଷରେ ୧୧୯/୯ ରନ୍ରେ ସୀମିତ ରହିଥିଲା । ତେବେ ଥାଇଲାଣ୍ଡ ମଧ୍ୟ ୮୪/୮ ରନ୍ କରି ଲଢ଼ୁଆ ପ୍ରଦର୍ଶନ କରିଥିଲା ।
ସମ୍ଭାବ୍ୟ ଭାରତୀୟ ଏକାଦଶ
ସ୍ମୃତି ମନ୍ଧାନା, ଶେଫାଳି ବର୍ମା, ପ୍ରତୀକା ରାୱଲ, ହର୍ମନ୍ପ୍ରୀତ୍ କୌର (ଅଧିନାୟିକା), ଭାରତୀ ଫୁଲମାଳି, ରିଚା ଘୋଷ (ୱିକେଟ୍କିପର), ଦୀପ୍ତି ଶର୍ମା, ଅରୁନ୍ଧତୀ ରେଡ୍ଡୀ, କ୍ରାନ୍ତି ଗୌଡ଼, ନନ୍ଦନୀ ଶର୍ମା ଓ ଶ୍ରୀ ଚାରଣୀ ।
ସମ୍ଭାବ୍ୟ ପାକିସ୍ତାନ ଏକାଦଶ
ମୁନୀବା ଅଲୀ (ୱିକେଟ୍କିପର), ଗୁଲ ଫିରୋଜା, ଆୟେଶା ଜାଫର, ଶୱାଲ ଜୁଲଫିକର, ଫତିମା ସାନା (ଅଧିନାୟିକା), ସଦାଫ ଶାମାସ, ତୁବା ହାସନ, ଉମ-ଇ-ହାନି, ନିଶ୍ରା ସାନ୍ଧୂ, ସାଦିଆ ଇକ୍ବାଲ ଓ ୱାହିଦା ଅଖ୍ତର । ଶନିବାରର ଏହି ମୁକାବିଲାରେ ଭାରତର ଲକ୍ଷ୍ୟ ରହିବ ବିଜୟ ସହ ସେମିଫାଇନାଲ୍ ପୂର୍ବରୁ ନିଜ ଆତ୍ମବିଶ୍ୱାସ ଆହୁରି ବଢ଼ାଇବା ।
