ଇଥାନଲ୍ ମିଶ୍ରିତ ପେଟ୍ରୋଲ ସମ୍ପର୍କରେ ସୁପ୍ରିମକୋର୍ଟ ତାଙ୍କର ଆଭିମୁଖ୍ୟ ଜାରି କରିଛନ୍ତି। ସୁପ୍ରିମକୋର୍ଟ ଆବେଦନକାରୀଙ୍କୁ ହାଇକୋର୍ଟଙ୍କର ଦ୍ୱାରସ୍ଥ ହେବାକୁ କହିଛନ୍ତି।
ଇଥାନଲ୍ ମିଶ୍ରିତ ପେଟ୍ରୋଲ ସମ୍ପର୍କରେ ସୁପ୍ରିମକୋର୍ଟ ତାଙ୍କର ଆଭିମୁଖ୍ୟ ଜାରି କରିଛନ୍ତି। ସୁପ୍ରିମକୋର୍ଟ ଆବେଦନକାରୀଙ୍କୁ ହାଇକୋର୍ଟଙ୍କର ଦ୍ୱାରସ୍ଥ ହେବାକୁ କହିଛନ୍ତି। ସୋମବାର, ସୁପ୍ରିମକୋର୍ଟ ଇ-୨୦ ପେଟ୍ରୋଲ ସମ୍ପର୍କରେ ଦାୟର ଏକ ଜନସ୍ୱାର୍ଥ ମାମଲା(ପିଆଇଏଲ) ଶୁଣାଣି କରିବାକୁ ମନା କରିଦେଇଛନ୍ତି।ଆଇନଜୀବୀ ନରେନ୍ଦ୍ର ଗୋସ୍ୱାମୀଙ୍କ ଦ୍ୱାରା ଦାୟର କରାଯାଇଥିବା ଏହି ଆବେଦନରେ ପେଟ୍ରୋଲରେ ଇଥାନଲ୍ ପରିମାଣ ଏବଂ ଯାନବାହାନ ସହିତ ଇଥାନଲ୍ ମିଶ୍ରିତ ଇନ୍ଧନର ଅନୁକୂଳତା ପ୍ରକାଶ କରିବାରେ ଅଧିକ ସ୍ୱଚ୍ଛତା ପାଇଁ ନିର୍ଦ୍ଦେଶନାମା ଦାବି କରାଯାଇଥିଲା।
ବିଚାରପତି ଏମ୍ଏମ୍ ସୁନ୍ଦରେଶ ଏବଂ ପ୍ରସନ୍ନ ବି ଭାରାଲଙ୍କ ଖଣ୍ଡପୀଠ ଏହି ଆବେଦନର ଶୁଣାଣି କରିବାକୁ ମନା କରିଦେଇଛନ୍ତି। ତେବେ ଖଣ୍ଡପୀଠ ତାଙ୍କୁ ତାଙ୍କର ଅଭିଯୋଗ ସହିତ ସମ୍ପୃକ୍ତ ହାଇକୋର୍ଟକୁ ଯିବା ପାଇଁ ଅନୁମତି ପ୍ରଦାନ କରିଛନ୍ତି।
ଆବେଦନରେ ଦାବି କରାଯାଇଥିଲା ଯେ, ପ୍ରତ୍ୟେକ ପେଟ୍ରୋଲ ପମ୍ପ ନୋଜଲ୍ ପେଟ୍ରୋଲରେ ଇଥାନଲର ପ୍ରତିଶତ ସ୍ପଷ୍ଟ ଭାବରେ ସୂଚିତ କରନ୍ତୁ। ପେଟ୍ରୋଲ ରସିଦ/ବିଲ୍ରେ ଇଥାନଲର ପ୍ରତିଶତ ମଧ୍ୟ ତାଲିକାଭୁକ୍ତ ହେବା ଉଚିତ୍ ଯାହା ଦ୍ଵାରା ଗ୍ରାହକମାନେ ଜାଣିପାରିବେ ଯେ, ସେମାନେ କେଉଁ ପ୍ରକାରର ପେଟ୍ରୋଲ କିଣିଛନ୍ତି।
ସରକାର ଏକ ସରକାରୀ ଯାନ ତାଲିକା/ଡାଟାବେସ୍ ପ୍ରସ୍ତୁତ କରନ୍ତୁ ଯାହା ମାଧ୍ୟମରେ କେଉଁ ଯାନଗୁଡ଼ିକ ଇ-୨୦ ପେଟ୍ରୋଲ ପାଇଁ ଯୋଗ୍ୟ ଏବଂ କେଉଁଗୁଡ଼ିକ ନୁହେଁ, ଏଥିରେ ନିର୍ମାଣ, ମଡେଲ୍ ଏବଂ ଉତ୍ପାଦନ ବର୍ଷ ଭଳି ବିବରଣୀ ଅନ୍ତର୍ଭୁକ୍ତ ରହୁ।
ଇ-୨୦ ପାଇଁ ଉପଯୁକ୍ତ ନଥିବା ପୁରୁଣା ଯାନଗୁଡ଼ିକ ପାଇଁ, ସେମାନଙ୍କୁ କମ୍-ଇଥାନଲ୍ ପେଟ୍ରୋଲ ଯୋଗାଇବା ପାଇଁ ଏକ ଧୀରେ ଧୀରେ ପରିବର୍ତ୍ତନ ବ୍ୟବସ୍ଥା ସ୍ଥାପନ କରାଯିବା ଉଚିତ୍ ବୋଲି ମଧ୍ୟ ଆବେଦନରେ ଉଲ୍ଲେଖ କରାଯାଇଥିଲା।
ଆବେଦନକାରୀ ମାମଲା ଉପସ୍ଥାପନ କରିବା ସମୟରେ କହିଥିଲେ ଯେ, ସେ କେନ୍ଦ୍ରର ଇଥାନଲ ମିଶ୍ରଣ ନୀତିକୁ ଚ୍ୟାଲେଞ୍ଜ କରୁନାହାନ୍ତି। କିନ୍ତୁ ଗ୍ରାହକମାନଙ୍କୁ ବିକ୍ରି ହେଉଥିବା ପେଟ୍ରୋଲରେ ଇଥାନଲର ପରିମାଣ ବିଷୟରେ ସୂଚନା ଚାହୁଁଛି। ମୋର ଜାଣିବାର ଅଧିକାର ଅଛି। ଆମେ ଯେତେବେଳେ ବିସ୍କୁଟ ପ୍ୟାକେଟ କିଣୁ, ଆମେ ଜାଣୁ ଯେ ଏଥିରେ କ’ଣ ଅଛି।
ଏହି ମାମଲା ନାଗରିକଙ୍କ ଅଧିକାର ସହିତ ଜଡିତ, ବ୍ୟକ୍ତିଗତ ଲାଭ ପାଇଁ ନୁହେଁ। ସେ ସୁପ୍ରିମକୋର୍ଟଙ୍କୁ କହିଥିଲେ , ଆମେ କ’ଣ କିଣୁଛୁ ତାହା ଜାଣିବାର ଅଧିକାର ଆମର ଅଛି। ବିଚାରପତି ସୁନ୍ଦରେଶଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଶେଷରେ ମାମଲାର ଶୁଣାଣି କରିବାକୁ ମନା କରିଦେଇଥିଲେ। ଖଣ୍ଡପୀଠ ଗୋସ୍ୱାମୀଙ୍କୁ କହିଥିଲେ, ଉଚ୍ଚ ନ୍ୟାୟାଳୟକୁ ଯାଅ ଏବଂ ସେଠାରେ ଏକ ଆବେଦନ ଦାଖଲ କର।
