ଖାଲି କାଚ ଜାର୍କୁ ଫିଙ୍ଗି ଦେଉଛନ୍ତି କି? ତେବେ ଆଜିଠାରୁ ଏହି ଅଭ୍ୟାସ ବଦଳାନ୍ତୁ । ଅଚାର, ଜାମ୍ କିମ୍ବା ସସ୍ ଶେଷ ହୋଇଯିବା ପରେ ଖାଲି ହେଉଥିବା କାଚ ଜାର୍କୁ ଅଳ୍ପ ସଫାସୁତରା ଓ ସୃଜନଶୀଳତାରେ ଘରର ଅନେକ କାମରେ ବ୍ୟବହାର କରିହେବ ।
ଖାଲି କାଚ ଜାର୍କୁ ଫିଙ୍ଗି ଦେଉଛନ୍ତି କି? ତେବେ ଆଜିଠାରୁ ଏହି ଅଭ୍ୟାସ ବଦଳାନ୍ତୁ । ଅଚାର, ଜାମ୍ କିମ୍ବା ସସ୍ ଶେଷ ହୋଇଯିବା ପରେ ଖାଲି ହେଉଥିବା କାଚ ଜାର୍କୁ ଅଳ୍ପ ସଫାସୁତରା ଓ ସୃଜନଶୀଳତାରେ ଘରର ଅନେକ କାମରେ ବ୍ୟବହାର କରିହେବ । ଏଥିପାଇଁ ଅଲଗା ଟଙ୍କା ଖର୍ଚ୍ଚ କରି ନୂଆ ଜିନିଷ କିଣିବାର ମଧ୍ୟ ଆବଶ୍ୟକତା ନାହିଁ । ପ୍ରଥମେ, କିଚେନ୍ରେ କରନ୍ତୁ ବ୍ୟବହାର । ଏହି କାଚ ଜାର୍ରେ ମସଲା, ଚାଉଳ, ଡାଲି, ଚିନି, ଅଟା, ପାସ୍ତା କିମ୍ବା ଚା’ ଭଳି ସାମଗ୍ରୀ ରଖିପାରିବେ । ଜାର୍ ପାରଦର୍ଶୀ ହୋଇଥିବାରୁ ଏହାକୁ ଖୋଲିବା ଆଗରୁ ଭିତରେ କ’ଣ ଅଛି ଓ କେତେ ପରିମାଣ ବାକି ଅଛି, ସହଜରେ ଜଣାପଡ଼ିଯିବ । ଦ୍ୱିତୀୟରେ, ଜାର୍କୁ କରନ୍ତୁ ଛୋଟ ପ୍ଲାଣ୍ଟର। ଘରେ ମିଣ୍ଟ, ଧନିଆ, ତୁଳସୀ କିମ୍ବା ଥାଇମ୍ ଭଳି ଛୋଟ ହର୍ବ୍ସ ଗଛ ଲଗାଇପାରିବେ । ଜାର୍ ତଳେ ଛୋଟ ଛୋଟ ଗୋଡ଼ିର ଏକ ପରସ୍ତ ଦେଇ ତା’ ଉପରେ ମାଟି ଭରି ଗଛ ଲଗାନ୍ତୁ ।
ତେବେ କାଚ ଜାର୍ରେ ପାଣି ବାହାରିବା ପାଇଁ ଛିଦ୍ର ନଥିବାରୁ ଅଧିକ ପାଣି ଦେବା ଉଚିତ୍ ନୁହେଁ । ତୃତୀୟରେ, ତିଆରି କରିପାରିବେ ସେଲ୍ଫ୍-ୱାଟରିଂ ପ୍ଲାଣ୍ଟର। ଯେଉଁମାନେ ଗଛରେ ନିୟମିତ ପାଣି ଦେବା ଭୁଲିଯାଆନ୍ତି, ସେମାନଙ୍କ ପାଇଁ ଏହି ଉପାୟ ଖୁବ୍ ଉପଯୋଗୀ। ଏଥିପାଇଁ ଏକ ମୋଟା ସୂତା ଡୋରି କିମ୍ବା କପଡ଼ାର ପଟି ନେଇ ତା’ର ଗୋଟିଏ ପାଖ ପାଣିରେ ଏବଂ ଅନ୍ୟ ପାଖ ଗଛର ମାଟିରେ ରଖିପାରିବେ। ଏହି ଡୋରି ଧୀରେ ଧୀରେ ପାଣିକୁ ମାଟି ପର୍ଯ୍ୟନ୍ତ ପହଞ୍ଚାଇବ। ଚତୁର୍ଥରେ, ଗଛର ନୂଆ ଚେର ବାହାରିବା ମଧ୍ୟ ଦେଖିପାରିବେ। କୌଣସି ଗଛର ଛୋଟ ଡାଳ କିମ୍ବା କଟିଂକୁ ପାଣି ଭରା କାଚ ଜାର୍ରେ ରଖନ୍ତୁ। କାଚ ପାରଦର୍ଶୀ ହୋଇଥିବାରୁ ନୂଆ ଚେର ବାହାରିବାର ପୂରା ପ୍ରକ୍ରିୟା ଆଖିରେ ଦେଖିପାରିବେ। ଚେର ଭଲ ଭାବେ ବିକଶିତ ହେଲେ ଏହାକୁ ମାଟିରେ ଲଗାଇପାରିବେ। ଆଉ ବାଥରୁମ୍ରେ ମଧ୍ୟ ଏହି ଜାର୍ ଆସିବ କାମରେ । କଟନ୍ ବଲ୍, କଟନ୍ ସ୍ୱାବ୍, ମେକଅପ୍ ବ୍ରଶ୍ ଭଳି ଛୋଟ ଜିନିଷ ଏଥିରେ ରଖି ବାଥରୁମ୍କୁ ଅଧିକ ଅର୍ଗାନାଇଜ୍ଡ୍ କରିପାରିବେ । ଜାର୍ରେ ରଙ୍ଗ, ରିବନ୍ କିମ୍ବା ଜୁଟ୍ ଦଉଡ଼ି ଲଗାଇଲେ ଏହାର ଲୁକ୍ ଆହୁରି ସୁନ୍ଦର ହେବ । ଚାହିଁଲେ ପୁରୁଣା ଜାର୍ରେ ପମ୍ପ ଲଗାଇ ଏହାକୁ ସାବୁନ୍ କିମ୍ବା ଲୋସନ୍ ଡିସ୍ପେନ୍ସର ଭାବେ ମଧ୍ୟ ବ୍ୟବହାର କରିପାରିବେ । ତେଣୁ ପରବର୍ତ୍ତୀ ଥର ଅଚାର କିମ୍ବା ଜାମ୍ ଶେଷ ହେଲେ ଜାର୍କୁ ଫିଙ୍ଗିବା ପୂର୍ବରୁ ଥରେ ଭାବନ୍ତୁ। ଏହି ଛୋଟ ଜିନିଷଟି ଆପଣଙ୍କ କିଚେନ୍, ଗାର୍ଡେନ୍ ଓ ବାଥରୁମ୍କୁ ଅଧିକ ସୁନ୍ଦର ଓ ଅର୍ଗାନାଇଜ୍ଡ୍ କରିବାରେ କାମ ଦେଇପାରେ ।
