ଙ୍ଗଲ ନିଆଁର ଧୂଆଁ ଆମେରିକା ପର୍ୟ୍ୟନ୍ତ ପହଞ୍ଚୁଥିବାରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାନାଡାକୁ ସମାଲୋଚନା କରିଛନ୍ତି। ଟ୍ରମ୍ପ ଅଭିଯୋଗ କରିଛନ୍ତି ଯେ ଅନୁପଯୁକ୍ତ ଜଙ୍ଗଲ ରକ୍ଷଣାବେକ୍ଷଣ ଯୋଗୁଁ ଆମେରିକାରେ ପ୍ରଦୂଷଣ ବୃଦ୍ଧି ହେଉଛି।
ଜଙ୍ଗଲ ନିଆଁର ଧୂଆଁ ଆମେରିକା ପର୍ୟ୍ୟନ୍ତ ପହଞ୍ଚୁଥିବାରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାନାଡାକୁ ସମାଲୋଚନା କରିଛନ୍ତି। ଟ୍ରମ୍ପ ଅଭିଯୋଗ କରିଛନ୍ତି ଯେ ଅନୁପଯୁକ୍ତ ଜଙ୍ଗଲ ରକ୍ଷଣାବେକ୍ଷଣ ଯୋଗୁଁ ଆମେରିକାରେ ପ୍ରଦୂଷଣ ବୃଦ୍ଧି ହେଉଛି। ସେ ଚେତାବନୀ ଦେଇଛନ୍ତି, ଏହି କ୍ଷତି ପାଇଁ କାନାଡା ଅତିରିକ୍ତ ଶୁଳ୍କ ଭୋଗିପାରେ। ଟ୍ରମ୍ପ କାନାଡା ଉପରେ ତାଙ୍କ ଶୁଳ୍କ ଅଭିଯାନକୁ ଜଙ୍ଗଲ ଅଗ୍ନିକାଣ୍ଡ ପ୍ରସଙ୍ଗ ସହ ଯୋଡିଛନ୍ତି। ସେ ଅଭିଯୋଗ କରିଛନ୍ତି, କାନାଡା ନିଜର ଜଙ୍ଗଲକୁ ସଠିକ୍ ଭାବରେ ପରିଚାଳନା କରୁନାହିଁ, ଯାହା ଫଳରେ ସେଠାରେ ଅଗ୍ନିକାଣ୍ଡ ଘଟୁଛି। ଜଙ୍ଗଲ ନିଆଁର ଧୂଆଁ ଅନେକ ଆମେରିକାର ରାଜ୍ୟକୁ ପହଞ୍ଚୁଛି। ଏହି ପ୍ରଦୂଷଣ ଦ୍ୱାରା ଆମେରିକାର ହୋଇଥିବା କ୍ଷତି ପାଇଁ କାନାଡାକୁ ଦେୟ ଦେବାକୁ ପଡିବ, ଏବଂ ଏହାକୁ ବିଦ୍ୟମାନ ଶୁଳ୍କରେ ଯୋଡାଯିବ ବୋଲି ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ, ଟ୍ରୁଥ୍ ସୋସିଆଲରେ ଧମକ ଦେଇ ଲେଖିଛନ୍ତି।
ଟ୍ରମ୍ପ କହିଛନ୍ତି ଯେ ସେ ଏହି ପ୍ରସଙ୍ଗରେ କାନାଡା ପ୍ରଧାନମନ୍ତ୍ରୀ ମାର୍କ କାର୍ନିଙ୍କ ସହ କଥା ହେବେ। ସେ ଜାଣିବାକୁ ଚାହାଁନ୍ତି ଯେ କାନାଡା ସରକାର ଜଙ୍ଗଲ ନିଆଁ ରୋକିବା ପାଇଁ କ’ଣ ପଦକ୍ଷେପ ନେଉଛନ୍ତି। ଟ୍ରମ୍ପଙ୍କ ଅନୁଯାୟୀ, ଏହି ଧୂଆଁରୁ ଆମେରିକାର ଆର୍ଥିକ କ୍ଷତି ଅକଳ୍ପନୀୟ। ସେ କାନାଡା ଜାଣିଶୁଣି ଅବହେଳା କରୁଥିବା ସେ ଅଭିଯୋଗ କରିଛନ୍ତି। ଏହି ସମସ୍ୟାର ପୁନରାବୃତ୍ତି ପ୍ରତିବର୍ଷ ହେଉଛି। ଆମେରିକୀୟ ନାଗରିକମାନେ ଏହାର ବୋଝ ବହନ କରିଥାନ୍ତି। ତେଣୁ, ଏହି ପ୍ରଦୂଷଣର ମୂଲ୍ୟ କାନାଡା ସାମଗ୍ରୀ ଉପରେ ପୂର୍ବରୁ ଲାଗୁ ହୋଇଥିବା ଶୁଳ୍କରେ ଯୋଡାଯିବ।
ଟ୍ରମ୍ପଙ୍କ ଏହି ମନ୍ତବ୍ୟ ଏପରି ଏକ ସମୟରେ ଆସିଛି ଯେତେବେଳେ କାନାଡାରେ ପ୍ରାୟ ୮୫୦ ଜଙ୍ଗଲରେ ନିଆଁ ଲାଗିଛି। ଏଥିମଧ୍ୟରୁ ୧୮୦ରୁ ଅଧିକ ଜଙ୍ଗଲରେ ନିଆଁ କେବଳ ଅଣ୍ଟାରିଓ ପ୍ରଦେଶରେ ଜଳୁଛି। ଆମେରିକୀୟ ମହାକାଶ ସଂସ୍ଥା ନାସା ଅନୁଯାୟୀ, ଏହି ନିଆଁର ଧୂଆଁ ଉତ୍ତର ଆମେରିକାର ଏକ ବଡ଼ ଅଂଶରେ ବ୍ୟାପିଛି। ଏହି ଧୂଆଁ ଯୋଗୁଁ,୨୦ ରୁ ଅଧିକ ଆମେରିକା ରାଜ୍ୟରେ ବାୟୁ ଗୁଣବତ୍ତା ନେଇ ସତର୍କ ସୂଚନା ଜାରି କରାଯାଇଛି। ମଧ୍ୟପଶ୍ଚିମ ଠାରୁ ଉତ୍ତର-ପୂର୍ବ ପର୍ୟ୍ୟନ୍ତ ଅନେକ ଅଞ୍ଚଳରେ, ଲୋକମାନଙ୍କୁ ସେମାନଙ୍କର ବାହ୍ୟ କାର୍ୟ୍ୟକଳାପକୁ ସୀମିତ କରିବାକୁ ଏବଂ ଅତ୍ୟଧିକ ଶାରୀରିକ କାର୍ୟ୍ୟକଳାପରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି। କାରଣ ବାୟୁରେ ଥିବା ସୂକ୍ଷ୍ମ କଣିକା ପରିମାଣ ସ୍ୱାସ୍ଥ୍ୟ ପାଇଁ ଅସୁରକ୍ଷିତ ସ୍ତରରେ ପହଞ୍ଚିଛି। ଜଙ୍ଗଲ ନିଆଁ ସଙ୍କଟ କେବଳ କାନାଡାରେ ସୀମିତ ନାହିଁ। ଆମେରିକାରେ ୧୫୦ ରୁ ଅଧିକ ଜଙ୍ଗଲରେ ମଧ୍ୟ ନିଆଁ ଲାଗିଛି। ସେଥିରେ ମିଶିଗାନରେ ଅନେକ ଜଙ୍ଗଲ ରହିଛି। ବିଶେଷଜ୍ଞମାନଙ୍କ ଅନୁସାରେ ଆମେରିକାର ଅନେକ ସ୍ଥାନରେ ଦୀର୍ଘକାଳୀନ ମରୁଡି ଏବଂ ରେକର୍ଡ ଭାଙ୍ଗିବା ଭଳି ଗରମ ହେଉଛି । ଜଙ୍ଗଲ ନିଆଁର ଦ୍ରୁତ ପ୍ରସାର ଏହାର ମୁଖ୍ୟ କାରଣ।ଯଦିଓ ଟ୍ରମ୍ପ କାନାଡା ଉପରେ ଅତିରିକ୍ତ ଶୁଳ୍କ ଲାଗୁ କରିବାକୁ ଧମକ ଦେଇଛନ୍ତି, କିନ୍ତୁ କେଉଁ ଆଇନ ଅନୁଯାୟୀ ଏହା କରାଯିବ ତାହା ସେ ସ୍ପଷ୍ଟ କରିନାହାନ୍ତି। ସାଧାରଣତଃ ଆମଦାନି ହେଉଥିବା ସାମଗ୍ରୀ ଉପରେ ଶୁଳ୍କ ଲଗାଯାଇଥାଏ। ମାତ୍ର ସୀମା ପାର ହୋଇ ବ୍ୟାପିଥିବା ଧୂଆଁ କିମ୍ବା ବାୟୁ ପ୍ରଦୂଷଣ ଉପରେ ଶୁଳ୍କ ଲଗାଇବା ପାଇଁ କୌଣସି ସ୍ପଷ୍ଟ ଆଇନଗତ ବ୍ୟବସ୍ଥା ନାହିଁ। ତେଣୁ, ଟ୍ରମ୍ପ ତାଙ୍କ ପ୍ରସ୍ତାବକୁ ବାସ୍ତବରେ କିପରି କାର୍ୟ୍ୟକାରୀ କରିବେ ତାହା ସ୍ପଷ୍ଟ ହୋଇ ନାହିଁ।
