ଚେନ୍ନାଇରେ ଗଣମାଧ୍ୟମ ସହ ଆଲୋଚନା କରିବା ସମୟରେ କାଶୀ ବିଶ୍ୱନାଥନ କହିଛନ୍ତି ଯେ ଆଇପିଏଲ ୨୦୨୭ରେ ଧୋନୀ ଖେଳିବେ କି ନାହିଁ, ସେ ନିଷ୍ପତ୍ତି ସମ୍ପୂର୍ଣ୍ଣ ଭାବେ ଧୋନୀଙ୍କ ଉପରେ ଛାଡ଼ି ଦିଆଯାଇଛି ।
ମହେନ୍ଦ୍ର ସିଂହ ଧୋନୀଙ୍କ ବୟସ ଯେତେ ବି ହେଉ ନା କାହିଁକି, ତାଙ୍କୁ ପଡ଼ିଆରେ ଖେଳୁଥିବା ଦେଖିବାକୁ ଆଜି ବି ଚାହିଁ ବସିଛନ୍ତି କୋଟି କୋଟି କ୍ରିକେଟ୍ ପ୍ରେମୀ । ଅନ୍ତର୍ଜାତୀୟ କ୍ରିକେଟ୍ରୁ ଅବସର ନେବାର ପାଞ୍ଚ ବର୍ଷରୁ ଅଧିକ ସମୟ ବିତିଗଲାଣି । ତଥାପି ଧୋନୀଙ୍କ ଲୋକପ୍ରିୟତାରେ କୌଣସି କମି ଆସିନାହିଁ । ଏବେ ସମସ୍ତଙ୍କ ମନରେ ଗୋଟିଏ ପ୍ରଶ୍ନ—ଆଇପିଏଲ୍ର ୨୦ତମ ସଂସ୍କରଣ ଅର୍ଥାତ୍ ଆଇପିଏଲ ୨୦୨୭ରେ ଖେଳିବେ କି ମାହି ? ଏହି ପ୍ରଶ୍ନକୁ ନେଇ ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ଆସିଛି ଏକ ବଡ଼ ବୟାନ ।
ସିଏସକେର ସିଇଓ କାଶୀ ବିଶ୍ୱନାଥନଙ୍କ ବୟାନ ଧୋନୀଙ୍କ ପ୍ରଶଂସକଙ୍କ ମନରେ ନୂଆ ଆଶା ସଞ୍ଚାର କରିଛି । ତାଙ୍କ କହିବା ଅନୁଯାୟୀ, ଧୋନୀଙ୍କ ଭିତରେ ଏବେ ବି କ୍ରିକେଟ୍ ବାକି ଅଛି। ସେ ଆଉ ଗୋଟିଏ ସିଜିନ୍ ଖେଳିବାକୁ ଚେଷ୍ଟା କରିବେ ବୋଲି ମଧ୍ୟ ସେ ଆଶା ପ୍ରକାଶ କରିଛନ୍ତି ।
ଚେନ୍ନାଇରେ ଗଣମାଧ୍ୟମ ସହ ଆଲୋଚନା କରିବା ସମୟରେ କାଶୀ ବିଶ୍ୱନାଥନ କହିଛନ୍ତି ଯେ ଆଇପିଏଲ ୨୦୨୭ରେ ଧୋନୀ ଖେଳିବେ କି ନାହିଁ, ସେ ନିଷ୍ପତ୍ତି ସମ୍ପୂର୍ଣ୍ଣ ଭାବେ ଧୋନୀଙ୍କ ଉପରେ ଛାଡ଼ି ଦିଆଯାଇଛି । ତାଙ୍କ କହିବା ଅନୁଯାୟୀ, ଏହି ପ୍ରଶ୍ନର ଉତ୍ତର ଧୋନୀଙ୍କଠାରୁ ହିଁ ପଚାରିବାକୁ ପଡ଼ିବ। ସେ ଚେନ୍ନାଇ ଆସିବା ପରେ ନିଜ ନିଷ୍ପତ୍ତି ବିଷୟରେ ଫ୍ରାଞ୍ଚାଇଜିକୁ ଜଣାଇବେ । ଧୋନୀ ଏବେ ବି ଜଣେ ଖେଳାଳି ଏବଂ ସିଏସକେ ପାଇଁ ଖେଳିବା ଜାରି ରଖିବାର ସମ୍ଭାବନା ରହିଛି ବୋଲି ସେ କହିଛନ୍ତି । ତେବେ ସିଇଓଙ୍କ ଏହି ବୟାନ ପରେ ଧୋନୀଙ୍କ ଅବସରକୁ ନେଇ ଚାଲିଥିବା ଚର୍ଚ୍ଚା ମଧ୍ୟରେ ପୁଣି ଥରେ ନୂଆ ଆଲୋଚନା ଆରମ୍ଭ ହୋଇଛି । କିନ୍ତୁ ଆଇପିଏଲ ୨୦୨୭ରେ ତାଙ୍କ ଖେଳିବା ନେଇ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ଘୋଷଣା ହୋଇନାହିଁ ।
ଧୋନୀଙ୍କ ଆଇପିଏଲ ୨୦୨୭ରେ ଖେଳିବାକୁ ନେଇ ପ୍ରଶ୍ନ ଉଠିବାର ଆଉ ଏକ ବଡ଼ କାରଣ ହେଉଛି ଆଇପିଏଲ ୨୦୨୬ରେ ତାଙ୍କର ଅନୁପସ୍ଥିତି । ଗତ ସିଜିନ୍ରେ ସେ ଗୋଟିଏ ବି ମ୍ୟାଚ୍ ଖେଳିନଥିଲେ । ଯଦିଓ ସେ ପ୍ରତ୍ୟେକ ମ୍ୟାଚ୍ରେ ଦଳ ସହ ପଡ଼ିଆକୁ ଆସୁଥିଲେ, ତଥାପି ଫିଟ୍ ନଥିବା କାରଣରୁ ପ୍ଲେଇଂ ଇଲେଭେନ୍ରେ ସ୍ଥାନ ପାଇନଥିଲେ । ଏପରିକି ଇମ୍ପାକ୍ଟ ପ୍ଲେୟାର ଭାବେ ମଧ୍ୟ ସେ ଖେଳିନଥିଲେ । ବର୍ତ୍ତମାନ ଧୋନୀଙ୍କ ବୟସ ୪୫ ବର୍ଷ। ଏହି କାରଣରୁ ପ୍ରତ୍ୟେକ ଆଇପିଏଲ ସିଜିନ୍ ପୂର୍ବରୁ ସେ ଖେଳିବେ କି ନାହିଁ, ତାକୁ ନେଇ ଚର୍ଚ୍ଚା ହୋଇଥାଏ ।
ଅନ୍ୟପକ୍ଷରେ, ଚେପକ୍ ଷ୍ଟାଡିୟମ୍ରେ ଚେନ୍ନାଇ ସୁପର କିଙ୍ଗ୍ସର ପାରମ୍ପରିକ ‘ଲାପ୍ ଅଫ୍ ଅନର୍’ରେ ଧୋନୀ ସାମିଲ ହେବା ପରେ ତାଙ୍କ ପୁରୁଣା ସାଥୀ ତଥା ପୂର୍ବତନ କ୍ରିକେଟର୍ ସୁରେଶ ରୈନା ଏକ ବଡ଼ କଥା କହିଥିଲେ । ସେ ଆଇପିଏଲ ୨୦୨୭ରେ ଖେଳିବା ପାଇଁ ମାହି ଭାଇଙ୍କୁ ଅନୁରୋଧ କରିଥିବା କହିଥିଲେ । ଏବେ ପ୍ରଶ୍ନ ହେଉଛି, ପ୍ରଶଂସକଙ୍କ ଭଲପାଇବା ଏବଂ ସାଥୀ ଖେଳାଳିଙ୍କ ଅନୁରୋଧ ପରେ କ’ଣ ପୁଣି ଥରେ ହଳଦିଆ ଜର୍ସିରେ ପଡ଼ିଆକୁ ଓହ୍ଲାଇବେ ଧୋନୀ ? ଏହାର ଉତ୍ତର ପାଇଁ ଏବେ ସମସ୍ତଙ୍କୁ ମାହିଙ୍କ ନିଷ୍ପତ୍ତିକୁ ଅପେକ୍ଷା କରିବାକୁ ପଡ଼ିବ ।
