ତୃଣମୂଳ କଂଗ୍ରେସ (TMC) ଭିତରେ ବଡ଼ ଧରଣର ବିଦ୍ରୋହ ଦେଖାଦେଇଥିବା ଦାବି ହେଉଛି। କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ୧୯ ଜଣ ସାଂସଦ ସ୍ୱତନ୍ତ୍ର ସଂସଦୀୟ ଗୋଷ୍ଠୀ ଗଠନ ପାଇଁ ଲୋକସଭା ବାଚସ୍ପତିଙ୍କୁ ଚିଠି ଲେଖିଥିବା କଥା ସାମ୍ନାକୁ ଆସିଛି। ଏହି ତାଲିକାରେ ରଚନା ବାନାର୍ଜୀ, ଶତ୍ରୁଘ୍ନ ସିହ୍ନା ଓ ୟୁସୁଫ ପଠାନଙ୍କ ଭଳି ଚର୍ଚ୍ଚିତ ନେତାଙ୍କ ନାମ ଥିବା ଦାବି କରାଯାଇଛି।
ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ (TMC) ପାଇଁ ସଙ୍କଟ ଦିନକୁ ଦିନ ଘନୀଭୂତ ହେବାରେ ଲାଗିଛି । ନିର୍ବାଚନରେ ଶୋଚନୀୟ ପରାଜୟ ପରେ ଦଳ ଭିତରେ ଚାଲିଥିବା ଅନ୍ତର୍ଦ୍ବନ୍ଦ୍ବ ଏବେ ଏକ ବଡ଼ ବିଦ୍ରୋହର ରୂପ ନେଇଛି । ଦଳର ବରିଷ୍ଠ ସାଂସଦ ତଥା ପୂର୍ବତନ ଚିଫ୍ ହ୍ଵିପ୍ କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ପ୍ରାୟ ୧୯ ଜଣ ସାଂସଦ ମମତା ବାନାର୍ଜୀଙ୍କ ନେତୃତ୍ୱ ପ୍ରତି ଅସନ୍ତୋଷ ପ୍ରକାଶ କରି ଏକ ସ୍ୱତନ୍ତ୍ର ସଂସଦୀୟ ଗୋଷ୍ଠୀ ଗଠନ କରିବାକୁ ପ୍ରସ୍ତୁତି ଚଳାଇଛନ୍ତି । ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ବିଦ୍ରୋହୀ ତାଲିକାରେ ବଲିଉଡର ଅଭିନେତାରୁ ନେତା ପାଲଟିଥିବା ଶତ୍ରୁଘ୍ନ ସିହ୍ନା ଏବଂ ପୂର୍ବତନ ତାରକା କ୍ରିକେଟର ୟୁସୁଫ ପଠାନଙ୍କ ଭଳି ହାଇ-ପ୍ରୋଫାଇଲ୍ ତଥା ଜନପ୍ରିୟ ଚେହେରା ସାମିଲ ରହିଛନ୍ତି । ସାଂସଦ ରଚନା ବାନାର୍ଜୀ ବି ଏହି ତାଲିକାରେ ସାମିଲ ଅଛନ୍ତି ।
ସଂସଦରେ ସ୍ୱତନ୍ତ୍ର ଗୋଷ୍ଠୀ ଗଠନ ପାଇଁ ଚିଠି
ସୂଚନା ଅନୁଯାୟୀ, ଦଳର ଦୁଇ-ତୃତୀୟାଂଶ ସାଂସଦଙ୍କ ସମର୍ଥନ ହାସଲ କରି ଏହି ବିଦ୍ରୋହୀ ଗୋଷ୍ଠୀ ଲୋକସଭା ବାଚସ୍ପତିଙ୍କ କାର୍ଯ୍ୟାଳୟକୁ ଏକ ଚିଠି ପଠାଇଛନ୍ତି । ଏହି ଚିଠିରେ ସେମାନଙ୍କୁ ସଂସଦରେ ଏକ ସ୍ୱତନ୍ତ୍ର ରାଜନୈତିକ ଗୋଷ୍ଠୀ ଭାବରେ ସ୍ୱୀକୃତି ପ୍ରଦାନ କରିବାକୁ ଦାବି କରାଯାଇଛି । ବିଦ୍ରୋହର ନେତୃତ୍ୱ ନେଉଥିବା କାକୋଲି ଘୋଷ ସ୍ପଷ୍ଟ କରିଛନ୍ତି ଯେ, ସେମାନେ ବର୍ତ୍ତମାନ ବିଜେପିରେ ସାମିଲ ହେବେ ନାହିଁ, ବରଂ କେନ୍ଦ୍ରର ଶାସକ ଦଳ ଏନଡିଏ (NDA) କୁ ବାହାରୁ ସମର୍ଥନ ଜଣାଇବେ ।
୧୯ ଜଣ ବିଦ୍ରୋହୀ ସାଂସଦଙ୍କ ସମ୍ପୂର୍ଣ୍ଣ ତାଲିକା: ସାମ୍ନାକୁ ଆସିଥିବା ଏହି ରୋଚକ ତାଲିକାରେ ପଶ୍ଚିମବଙ୍ଗର ବଡ଼ ବଡ଼ ନେତାଙ୍କ ନାମ ସାମିଲ ଅଛି:
୧. ଶତ୍ରୁଘ୍ନ ସିହ୍ନା (ଆସନସୋଲ)
୨. କାକୋଲି ଘୋଷ ଦସ୍ତିଦାର (ବାରାସାତ)
୩. ୟୁସୁଫ ପଠାନ (ବହରମପୁର)
୪. ସାୟୋନୀ ଘୋଷ (ଯାଦବପୁର)
୫. ମାଲା ରାୟ (କୋଲକାତା ଦକ୍ଷିଣ)
୬. ଜଗଦୀଶ ଚନ୍ଦ୍ର ବର୍ମା ବାସୁନିଆ (କୁଚବେହାର)
୭. ଖଲିଲୁର ରହମାନ (ଜଙ୍ଗୀପୁର)
୮. ଆବୁ ତାହେର ଖାନ (ମୁର୍ଶିଦାବାଦ)
୯. ପାର୍ଥ ଭୌମିକ (ବାରାକପୁର)
୧୦. ବାପି ହାଲଦାର (ମଥୁରାପୁର)
୧୧. ମିତାଲି ବାଗ (ଆରାମବାଗ)
୧୨. ଦୀପକ ଅଧିକାରୀ – ଦେବ୍ (ଘାଟାଲ)
୧୩. କାଳୀପଦ ସୋରେନ (ଝାଡ଼ଗ୍ରାମ)
୧୪. ଜୁନ୍ ମାଲିଆ (ମେଦିନୀପୁର)
୧୫. ଅରୂପ ଚକ୍ରବର୍ତ୍ତୀ (ବାଙ୍କୁଡ଼ା)
୧୬. ଶର୍ମିଲା ସରକାର (ବର୍ଦ୍ଧମାନ ପୂର୍ବ)
୧୭. ଅସିତ କୁମାର ମଲ୍ (ବୋଲପୁର)
୧୮. ଶତାବ୍ଦୀ ରାୟ (ବୀରଭୂମ)
୧୯. ରଚନା ବାନାର୍ଜୀ (ହୁଗୁଳି)
ମହୁଆ ମୈତ୍ରଙ୍କ ପ୍ରତିକ୍ରିୟା ଓ ଆଇନଗତ ବିବାଦ:
ଟିଏମସିର ଏହି ବିଦ୍ରୋହକୁ ନେଇ ସାଂସଦ ମହୁଆ ମୈତ୍ର କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି । ସେ ଏହି ବିଦ୍ରୋହୀମାନଙ୍କୁ ‘ବିଶ୍ୱାସଘାତକ’ ବୋଲି ଆଖ୍ୟା ଦେଇଛନ୍ତି । ସୁପ୍ରିମକୋର୍ଟଙ୍କ ପୂର୍ବ ନିଷ୍ପତ୍ତି (ସୁଭାଷ ଦେଶାଇ ବନାମ ମହାରାଷ୍ଟ୍ର ରାଜ୍ୟପାଳ କେସ୍) ର ଉଦାହରଣ ଦେଇ ମହୁଆ କହିଛନ୍ତି ଯେ, କେବଳ ଦୁଇ-ତୃତୀୟାଂଶ ସାଂସଦ ଅଲଗା ହେଲେ ଏକ ସ୍ୱତନ୍ତ୍ର ଗୋଷ୍ଠୀ ଗଠନ ହୋଇପାରିବ ନାହିଁ, ସେମାନଙ୍କୁ କୌଣସି ନା କୌଣସି ରାଜନୈତିକ ଦଳ ସହ ମିଶ୍ରଣ କରିବାକୁ ପଡ଼ିବ । ବର୍ତ୍ତମାନ ଏହି ବିଦ୍ରୋହ ଯୋଗୁଁ ମମତା ବାନାର୍ଜୀଙ୍କ ଦଳ ୨୮ ବର୍ଷର ଇତିହାସରେ ସବୁଠାରୁ ବଡ଼ ସଙ୍କଟ ଦେଇ ଗତି କରୁଛି ।
