ଅଧିନାୟକ ଧ୍ରୁବ ଜୁରେଲଙ୍କ ଧୈର୍ଯ୍ୟପୂର୍ଣ୍ଣ ଶତକ ଏବଂ ଶେଷ ଭାଗରେ ଆକାଶ ଦୀପଙ୍କ ଲଢ଼ୁଆ ଅର୍ଦ୍ଧଶତକ ବଳରେ ଭାରତ ଏକ ସମ୍ମାନଜନକ ସ୍କୋରରେ ପହଞ୍ଚି ପାରିଛି। ତେବେ ଜବାବରେ ଘରୋଇ ନ୍ୟୁଜିଲାଣ୍ଡ ‘ଏ’ ପ୍ରାରମ୍ଭିକ ବିପର୍ଯ୍ୟୟ ସତ୍ତ୍ୱେ ଦ୍ୱିତୀୟ ଦିନ ଖେଳ ଶେଷ ସୁଦ୍ଧା ୩ ୱିକେଟ୍ ହରାଇ ୨୧୮ ରନ୍ କରି ଦୃଢ଼ ସ୍ଥିତିରେ ରହିଛି।
ନ୍ୟୁଜିଲାଣ୍ଡ ‘ଏ’ ବିପକ୍ଷରେ ଚାଲିଥିବା ଦ୍ୱିତୀୟ ଅନୌପଚାରିକ ଟେଷ୍ଟରେ ଭାରତୀୟ ‘ଏ’ ଦଳ ପ୍ରଥମ ଇନିଂସରେ ୩୪୬ ରନ୍ ସଂଗ୍ରହ କରିଛି । ଅଧିନାୟକ ଧ୍ରୁବ ଜୁରେଲଙ୍କ ଧୈର୍ଯ୍ୟପୂର୍ଣ୍ଣ ଶତକ ଏବଂ ଶେଷ ଭାଗରେ ଆକାଶ ଦୀପଙ୍କ ଲଢ଼ୁଆ ଅର୍ଦ୍ଧଶତକ ବଳରେ ଭାରତ ଏକ ସମ୍ମାନଜନକ ସ୍କୋରରେ ପହଞ୍ଚି ପାରିଛି । ତେବେ ଜବାବରେ ଘରୋଇ ନ୍ୟୁଜିଲାଣ୍ଡ ‘ଏ’ ପ୍ରାରମ୍ଭିକ ବିପର୍ଯ୍ୟୟ ସତ୍ତ୍ୱେ ଦ୍ୱିତୀୟ ଦିନ ଖେଳ ଶେଷ ସୁଦ୍ଧା ୩ ୱିକେଟ୍ ହରାଇ ୨୧୮ ରନ୍ କରି ଦୃଢ଼ ସ୍ଥିତିରେ ରହିଛି ।
ଗତକାଲିର ଅସମାପ୍ତ ସ୍କୋର ୨୯୧/୭ରୁ ଦ୍ୱିତୀୟ ଦିନର ଖେଳ ଆରମ୍ଭ କରିଥିଲା ଭାରତ ‘ଏ’ । ତେବେ ଦଳୀୟ ସ୍କୋରରେ ମାତ୍ର ୬ ରନ୍ ଯୋଡ଼ି ହେବା ପରେ ଅଧିନାୟକ ଧ୍ରୁବ ଜୁରେଲ ୧୦୫ ରନ୍ କରି ଆଉଟ୍ ହୋଇଥିଲେ । ଜୁରେଲ ପାଭିଲିୟନ୍ ଫେରିବା ପରେ ତଳ ଭାଗ ବ୍ୟାଟର୍ ଆକାଶ ଦୀପ ଚମତ୍କାର ବ୍ୟାଟିଂ ପ୍ରଦର୍ଶନ କରି ନିଜର ଅର୍ଦ୍ଧଶତକ ପୂରଣ କରିଥିଲେ । ସେ ମହମ୍ମଦ ସିରାଜ (୦)ଙ୍କ ସହ ମିଶି ୩୭ ରନ୍ ଏବଂ ମୁକେଶ କୁମାର (୫*)ଙ୍କ ସହ ମିଶି ୧୨ ରନ୍ର ଗୁରୁତ୍ୱପୂର୍ଣ୍ଣ ଭାଗୀଦାରି ଗଢ଼ି ଭାରତୀୟ ସ୍କୋରକୁ ୩୪୬ରେ ପହଞ୍ଚାଇବାରେ ବଡ଼ ଭୂମିକା ଗ୍ରହଣ କରିଥିଲେ ।
ଜବାବୀ ଇନିଂସ ଆରମ୍ଭ କରିଥିବା ନ୍ୟୁଜିଲାଣ୍ଡ ‘ଏ’ ପ୍ରାରମ୍ଭରୁ ଭାରତୀୟ ପେସ୍ ବୋଲରଙ୍କ ଘାତକ ବୋଲିଂର ସମ୍ମୁଖୀନ ହୋଇଥିଲା । ମାତ୍ର ୧୩ ରନ୍ ମଧ୍ୟରେ ଦଳ ୩ଟି ପ୍ରମୁଖ ୱିକେଟ୍ ହରାଇ ଗମ୍ଭୀର ସଙ୍କଟରେ ପଡ଼ିଥିଲା । ଭାରତ ପକ୍ଷରୁ ମୁକେଶ କୁମାର ୨ଟି ଏବଂ ମହମ୍ମଦ ସିରାଜ ଗୋଟିଏ ୱିକେଟ୍ ନେଇ କିୱି ଶିବିରରେ ପ୍ରାରମ୍ଭିକ ଝଟକା ଦେଇଥିଲେ ।
କିନ୍ତୁ ଏହାପରେ ମାଥ୍ୟୁ ବୋୟଲ ଏବଂ ଡିନ୍ ଫକ୍ସକ୍ରଫ୍ଟ ଭାରତୀୟ ବୋଲରଙ୍କ ବିପକ୍ଷରେ ଦୃଢ଼ ପ୍ରତିରୋଧ ଗଢ଼ି ତୋଳିଥିଲେ । ଉଭୟ ଅବିଭାଜିତ ଚତୁର୍ଥ ୱିକେଟ୍ରେ ୨୦୫ ରନ୍ର ଏକ ମ୍ୟାରାଥନ୍ ଭାଗୀଦାରି ଯୋଡ଼ି ଦଳକୁ ବିପଦମୁକ୍ତ କରିଥିଲେ । ବୋୟଲ ଅପରାଜିତ ୧୦୮ ରନ୍ ସଂଗ୍ରହ କରି ନିଜର ଶତକ ପୂରଣ କରିଥିବା ବେଳେ ଫକ୍ସକ୍ରଫ୍ଟ ୮୦ ରନ୍ କରି ଅପରାଜିତ ରହିଛନ୍ତି । ଦ୍ୱିତୀୟ ଦିନ ଷ୍ଟମ୍ପ୍ସ ଅପସାରଣ ବେଳକୁ ନ୍ୟୁଜିଲାଣ୍ଡ ୩ ୱିକେଟ୍ରେ ୨୧୮ ରନ୍ କରି ଭାରତୀୟ ପ୍ରଥମ ଇନିଂସ ସ୍କୋରଠାରୁ ୧୨୮ ରନ୍ ପଛରେ ରହିଛି ।
