ମୁହଁରେ ହାଲୁକା ହସ, ହାତରେ ଧନୁ ଆଉ ସାମ୍ନାରେ ରାବଣର ପ୍ରତିକୃତି । ଦଶହରା ଉତ୍ସବରେ ପ୍ରିୟଙ୍କା ତୀର ଚଳାଇ ନିଶାନା ଲଗାଇଥିବା ବେଳେ ତାଙ୍କ ଆତ୍ମବିଶ୍ୱାସ ଓ ଉତ୍ସାହ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା ।
ବିଜୟାଦଶମୀ ଅବସରରେ ଦିଲ୍ଲୀର ଲାଲକିଲ୍ଲା ମଇଦାନରେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀଙ୍କ ଏକ ଭିନ୍ନ ଅନ୍ଦାଜ ଦେଖିବାକୁ ମିଳିଛି । ମୁହଁରେ ହାଲୁକା ହସ, ହାତରେ ଧନୁ ଆଉ ସାମ୍ନାରେ ରାବଣର ପ୍ରତିକୃତି । ଦଶହରା ଉତ୍ସବରେ ପ୍ରିୟଙ୍କା ତୀର ଚଳାଇ ନିଶାନା ଲଗାଇଥିବା ବେଳେ ତାଙ୍କ ଆତ୍ମବିଶ୍ୱାସ ଓ ଉତ୍ସାହ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା । କିନ୍ତୁ ଏହି ଉତ୍ସବ ମଧ୍ୟରେ ତାଙ୍କର ଏକ ବୟାନ ରାଜନୈତିକ ଚର୍ଚ୍ଚାକୁ ଆହୁରି ବଢ଼ାଇଛି। ପ୍ରିୟଙ୍କା ବେରୋଜଗାରୀ ଓ ମହଙ୍ଗାକୁ ଆଜିର ସମୟର ରାବଣ ବୋଲି କହିଛନ୍ତି ।
ବେରୋଜଗାରୀ ଓ ମହଙ୍ଗା ଆଜିର ରାବଣ!
ଦିଲ୍ଲୀର ଲାଲକିଲ୍ଲା ମଇଦାନରେ ଆୟୋଜିତ ରାବଣ ଦହନ କାର୍ଯ୍ୟକ୍ରମରେ ଯୋଗଦେଇ ପ୍ରିୟଙ୍କା ଗାନ୍ଧୀ ସାମ୍ବାଦିକଙ୍କ ସହ କଥା ହୋଇଥିଲେ । ଏହି ଅବସରରେ ସେ କହିଥିଲେ, ଆଜି ଦେଶର ସାଧାରଣ ଲୋକ ବେରୋଜଗାରୀ ଓ ମହଙ୍ଗା ଭଳି ସମସ୍ୟା ସହ ଲଢ଼ୁଛନ୍ତି । ଏହି ସମସ୍ୟାଗୁଡ଼ିକ ଆଜିର ସମୟର ରାବଣ ସଦୃଶ । ବିଜୟାଦଶମୀ ଆମକୁ ଅନ୍ୟାୟ ଉପରେ ନ୍ୟାୟ ଏବଂ ଅସତ୍ୟ ଉପରେ ସତ୍ୟର ବିଜୟର ବାର୍ତ୍ତା ଦେଇଥାଏ। କିନ୍ତୁ ଆଜି ମଧ୍ୟ ଦେଶର ଲୋକଙ୍କୁ ଅନେକ ସମସ୍ୟାର ସାମ୍ନା କରିବାକୁ ପଡ଼ୁଛି ବୋଲି ପ୍ରିୟଙ୍କା କହିଥିଲେ ।
ସରକାରଙ୍କୁ କିଛି ବିଶେଷ ବାର୍ତ୍ତା ଦେବାକୁ ଚାହୁଁନାହାନ୍ତି!
ଏହି ଅବସରରେ ପ୍ରିୟଙ୍କା ଗାନ୍ଧୀ କହିଥିଲେ ଯେ, ସେ ଦଶହରା ଭଳି ପବିତ୍ର ପର୍ବକୁ ରାଜନୀତିର ମଞ୍ଚ କରିବାକୁ ଚାହୁଁନାହାନ୍ତି। ସରକାରଙ୍କ ପାଇଁ ମଧ୍ୟ ତାଙ୍କର କୌଣସି ବିଶେଷ ବାର୍ତ୍ତା ନାହିଁ। ତେବେ ବେରୋଜଗାରୀ ଓ ମହଙ୍ଗା ପ୍ରସଙ୍ଗ ଉଠାଇ ସେ ଦେଶର ବର୍ତ୍ତମାନ ସ୍ଥିତି ଉପରେ ନିଜର ମତ ରଖିଥିଲେ ।
ସତ୍ୟ ପାଇଁ ଲଢ଼ୁଛୁ, ଆଗକୁ ମଧ୍ୟ ଲଢ଼ିବୁ!
କଂଗ୍ରେସ ମହାସଚିବ ଆହୁରି କହିଥିଲେ ଯେ, ଦେଶରେ ସତ୍ୟ ଓ ଅସତ୍ୟ ମଧ୍ୟରେ ଲଢ଼େଇ ଜାରି ରହିଛି। ତାଙ୍କ ଦଳ ସତ୍ୟ ପାଇଁ ଲଢ଼ୁଛି ଏବଂ ଆଗକୁ ମଧ୍ୟ ଲଢ଼ି ଚାଲିବ। ଏଥିସହ ସେ ଲୋକଙ୍କୁ ସବୁବେଳେ ସତ୍ୟର ପଥରେ ରହିବାକୁ ଆହ୍ୱାନ ଦେବା ସହ ବିଜୟାଦଶମୀର ଶୁଭେଚ୍ଛା ଜଣାଇଥିଲେ । ରାବଣ ଦହନ କାର୍ଯ୍ୟକ୍ରମରେ ପ୍ରିୟଙ୍କା ଗାନ୍ଧୀଙ୍କ ଧନୁ ଚଳାଇବାର ଦୃଶ୍ୟ ଯେତିକି ଚର୍ଚ୍ଚାରେ ରହିଛି, ବେରୋଜଗାରୀ ଓ ମହଙ୍ଗାକୁ ଆଜିର ରାବଣ କହିବା ମଧ୍ୟ ସେତିକି ଆଲୋଚନାର ବିଷୟ ପାଲଟିଛି ।
