ଆମେରିକୀୟ ଡଲାର ବିପକ୍ଷରେ ଭାରତୀୟ ଟଙ୍କାର ଶକ୍ତି ବଢ଼ିବାରେ ଲାଗିଛି । ଲଗାତାର ନବମ ସେସନରେ ମୁଦ୍ରା ମଜବୁତ ହୋଇ ଏକ ବର୍ଷର ସବୁଠାରୁ ଲମ୍ବା ବୃଦ୍ଧି ଧାରା ରେକର୍ଡ କରିଛି ।
ଆମେରିକୀୟ ଡଲାର ବିପକ୍ଷରେ ଭାରତୀୟ ଟଙ୍କାର ଶକ୍ତି ବଢ଼ିବାରେ ଲାଗିଛି । ଲଗାତାର ନବମ ସେସନରେ ରୁପିଆ ମଜବୁତ ହୋଇ ଏକ ବର୍ଷର ସବୁଠାରୁ ଲମ୍ବା ବୃଦ୍ଧି ଧାରା ରେକର୍ଡ କରିଛି । ବିଦେଶୀ ମୁଦ୍ରା ବଜାରରେ ଭାରତୀୟ ରୁପିଆକୁ ମିଳୁଛି ନିରନ୍ତର ସମର୍ଥନ । ଡଲାରର ଦୁର୍ବଳତା, ଅଶୋଧିତ ତୈଳ ଦରରେ ହ୍ରାସ ଏବଂ ବିଦେଶୀ ନିବେଶ ପ୍ରବାହ ଯୋଗୁଁ ରୁପିଆ ଉପରେ ସକାରାତ୍ମକ ପ୍ରଭାବ ପଡ଼ିଛି । ବଜାର ବିଶେଷଜ୍ଞଙ୍କ ମତରେ, ଆନ୍ତର୍ଜାତୀୟ ସ୍ତରରେ ଡଲାରର ଚାହିଦା କମିବା ସହ ଭାରତୀୟ ବଜାରରେ ବିଦେଶୀ ପୁଞ୍ଜି ପ୍ରବାହ ରୁପିଆକୁ ଶକ୍ତି ଦେଉଛି । ଏହା ସହିତ ତୈଳ ମୂଲ୍ୟ ହ୍ରାସ ଭାରତ ପାଇଁ ଆମଦାନୀ ଖର୍ଚ୍ଚର ଚାପ କମାଇଛି ।
ରୁପିଆ ମଜବୁତ ହେବାର ପ୍ରଭାବ ସାଧାରଣ ଲୋକଙ୍କ ଉପରେ ମଧ୍ୟ ପଡ଼ିପାରେ । ବିଦେଶରୁ ଆସୁଥିବା ତୈଳ, ଇଲେକ୍ଟ୍ରୋନିକ୍ସ ଓ ଅନ୍ୟାନ୍ୟ ସାମଗ୍ରୀର ଆମଦାନୀ ଖର୍ଚ୍ଚ କମିବାର ସମ୍ଭାବନା ରହିଛି । ଏହା ମୁଦ୍ରାସ୍ଫୀତି ନିୟନ୍ତ୍ରଣରେ ମଧ୍ୟ ସହାୟକ ହୋଇପାରେ । ତେବେ ବିଶ୍ୱ ଅର୍ଥନୀତିର ଅନିଶ୍ଚିତତା, ଆମେରିକାର ଫେଡ୍ ରିଜର୍ଭ ନୀତି ଏବଂ ଭୂ-ରାଜନୈତିକ ପରିସ୍ଥିତି ଉପରେ ରୁପିଆର ଆଗାମୀ ଗତି ନିର୍ଭର କରିବ । ନଅ ଦିନର ଏହି ଲଗାତାର ବୃଦ୍ଧି ଭାରତୀୟ ମୁଦ୍ରା ବଜାରରେ ଏକ ନୂଆ ଆଶା ସୃଷ୍ଟି କରିଛି । ଏବେ ନଜର ରହିଛି, ରୁପିଆ ଏହି ଗତିକୁ କେତେ ଦିନ ପର୍ଯ୍ୟନ୍ତ ବଜାୟ ରଖିପାରୁଛି ।
