ଆତଙ୍କବାଦୀଙ୍କ ହାତରେ ବିନାଶକାରୀ ଅସ୍ତ୍ରଶସ୍ତ୍ର ପଡ଼ିବା ଆଶଙ୍କା ଉପରେ ଗଭୀର ଚିନ୍ତା ପ୍ରକାଶ କରି ଭାରତ ବିଶ୍ୱ ସମୁଦାୟକୁ ସମ୍ବେଦନଶୀଳ ପ୍ରଯୁକ୍ତିବିଦ୍ୟାର ହସ୍ତାନ୍ତର ବିଷୟରେ ସତର୍କ ରହିବାକୁ ଆହ୍ୱାନ କରିଛି।
ଆତଙ୍କବାଦୀଙ୍କ ହାତରେ ବିନାଶକାରୀ ଅସ୍ତ୍ରଶସ୍ତ୍ର ପଡ଼ିବା ଆଶଙ୍କା ଉପରେ ଗଭୀର ଚିନ୍ତା ପ୍ରକାଶ କରି ଭାରତ ବିଶ୍ୱ ସମୁଦାୟକୁ ସମ୍ବେଦନଶୀଳ ପ୍ରଯୁକ୍ତିବିଦ୍ୟାର ହସ୍ତାନ୍ତର ବିଷୟରେ ସତର୍କ ରହିବାକୁ ଆହ୍ୱାନ କରିଛି। ବିଶେଷକରି ଅସ୍ତ୍ରଶସ୍ତ୍ର ପ୍ରସାର ଏବଂ ଆତଙ୍କବାଦ ସହିତ ଦୀର୍ଘକାଳୀନ ସମ୍ପର୍କ ଥିବା ଦେଶଙ୍କ ପ୍ରତି ଭାରତ ନିଜର ଆଭିମୁଖ୍ୟ ଦୋହରାଇଛି। ଭାରତର ବିବୃତି ପରୋକ୍ଷରେ ପାକିସ୍ତାନକୁ ଇଙ୍ଗିତ କରିଥିଲା।
ଜାତିସଂଘ ସାଧାରଣ ସଭାର ନିରସ୍ତ୍ରୀକରଣ ଏବଂ ଅନ୍ତର୍ଜାତୀୟ ସୁରକ୍ଷା ଉପରେ ପ୍ରଥମ କମିଟିରେ ଭାରତର ବିବୃତି ଉପସ୍ଥାପନ କରିବା ସମୟରେ ଲୋକସଭା ସଦସ୍ୟ ଆଲୋକ କୁମାର ସୁମନ କହିଛନ୍ତି, ଆନ୍ତର୍ଜାତୀୟ ସୁରକ୍ଷା ପାଇଁ ଆତଙ୍କବାଦ ଏକ ପ୍ରମୁଖ ଚ୍ୟାଲେଞ୍ଜ ପାଲଟିଛି। ସେ କହିଛନ୍ତି,ଭାରତ ଗଭୀର ଭାବରେ ଚିନ୍ତିତ ଯେ, ବିନାଶକାରୀ ଅସ୍ତ୍ରଶସ୍ତ୍ର ଆତଙ୍କବାଦୀ ଏବଂ ଅସାମାଜିକ ତତ୍ତ୍ୱଙ୍କ ହାତରେ ପଡୁଛି। ଆମେ ସମସ୍ତ ସଦସ୍ୟ ରାଷ୍ଟ୍ରଙ୍କୁ ଦୋହରା ମାନଦଣ୍ଡ ପରିତ୍ୟାଗ କରି ସମ୍ବେଦନଶୀଳ ପ୍ରଯୁକ୍ତିବିଦ୍ୟାର ସ୍ଥାନାନ୍ତର ସମ୍ପର୍କରେ ସତର୍କତା ଅବଲମ୍ବନ କରିବାକୁ ଅନୁରୋଧ କରୁଛୁ ବୋଲି ସେ କହିଛନ୍ତି। ବିଶେଷକରି ଅସ୍ତ୍ରଶସ୍ତ୍ର ପ୍ରସାରର ଇତିହାସ ଥିବା କିମ୍ବା ଆତଙ୍କବାଦ ସହିତ ଜଡିତ ଥିବା ବ୍ୟକ୍ତିମାନଙ୍କ ପାଇଁ ଏହା ବିଶେଷ ଗୁରୁତ୍ବପୂର୍ଣ୍ଣ। ଏହି ମନ୍ତବ୍ୟକୁ ପାକିସ୍ତାନ ଏବଂ ଏ.କ୍ୟୁ. ଖାନଙ୍କ ନେତୃତ୍ୱରେ ବିଶ୍ୱ ଅସ୍ତ୍ର ପ୍ରସାର ନେଟୱାର୍କକୁ ଏକ କଡ଼ା ଜବାବ ବୋଲି କୁହାଯାଉଛି।
ପାକିସ୍ତାନର ପରମାଣୁ ବୋମାର ଜନକ ଭାବରେ ଜଣାଶୁଣା, ଖାନ ପରମାଣୁ ଉପକରଣ ଏବଂ ପଦ୍ଧତିର ପ୍ରସାର ପାଇଁ ଏକ ବଡ଼ ଅନ୍ତର୍ଜାତୀୟ ନେଟୱାର୍କର ନେତୃତ୍ୱ ନେଇଥିଲେ। ଆମେରିକାର ବୈଦେଶିକ ବିଭାଗ ଏହି ନେଟୱାର୍କକୁ ପରମାଣୁ ଅସ୍ତ୍ରଶସ୍ତ୍ର ବିକଶିତ କରିବାକୁ ଚାହୁଁଥିବା ଦେଶମାନଙ୍କ ପାଇଁ ଏକ ‘ୱାନ୍-ଷ୍ଟପ୍ ସପ୍’ ବୋଲି କହିଛି। ସୁମନ ଉଲ୍ଲେଖ କରିଛନ୍ତି ଯେ ୨୦୦୨ ମସିହାରୁ, ଭାରତ ବିନାଶକାରୀ ଅସ୍ତ୍ରଶସ୍ତ୍ର ହାସଲ କରିବା କ୍ଷେତ୍ରରେ ଆତଙ୍କବାଦୀଙ୍କୁ ରୋକିବା ପାଇଁ ପଦକ୍ଷେପ ନେବା ପାଇଁ ସଂକଳ୍ପ ଆଗତ କରିଆସୁଛି। ଏହା ସହିତ ଭାରତ ରାସାୟନିକ ଏବଂ ଜୈବିକ ଅସ୍ତ୍ର ଚୁକ୍ତିନାମାର ପୂର୍ଣ୍ଣ, ପ୍ରଭାବଶାଳୀ ଏବଂ ଅଣ-ପାକ୍ଷିକ କାର୍ଯ୍ୟାନ୍ୱୟନ ପ୍ରତି ନିଜର ପ୍ରତିବଦ୍ଧତାକୁ ମଧ୍ୟ ଦୋହରାଇଛି।
ସୁମନ ଜାତିସଂଘ ଗସ୍ତରେ ଥିବା ଭାରତୀୟ ସାଂସଦଙ୍କ ଦ୍ୱିତୀୟ ପ୍ରତିନିଧିମଣ୍ଡଳର ଜଣେ ସଦସ୍ୟ। ଗସ୍ତ ସମୟରେ ସାଂସଦମାନେ ଜାତିସଂଘ ମୁଖ୍ୟାଳୟରେ ବିଭିନ୍ନ କାର୍ଯ୍ୟକ୍ରମରେ ଅଂଶଗ୍ରହଣ କରିବେ ଏବଂ ଜାତିସଂଘର ବରିଷ୍ଠ ଅଧିକାରୀ, ରାଷ୍ଟ୍ରଦୂତ ଏବଂ ଭାରତୀୟ ପ୍ରବାସୀମାନଙ୍କ ସହିତ ସାକ୍ଷାତ କରିବେ।
