କକ୍ରୋଚ୍ ଜନତା ପାର୍ଟି (ସିଜେପି) ର ଜୁଲାଇ ୨୦ ”ସଂସଦ ମାର୍ଚ୍ଚ” ସମୟରେ ଛାତ୍ର ଆନ୍ଦୋଳନକାରୀଙ୍କ ଉପରେ ପୋଲିସର କାର୍ଯ୍ୟାନୁଷ୍ଠାନ ଏବଂ ବର୍ବରତା ପ୍ରସଙ୍ଗରେ ସୁପ୍ରିମ୍ କୋର୍ଟ କଡ଼ା ଆଭିମୁଖ୍ୟ ଆପଣାଇବା ସହ ଆଇନକୁ ନିଜ ହାତକୁ ନେଇଥିବା
କକ୍ରୋଚ୍ ଜନତା ପାର୍ଟି (ସିଜେପି) ର ଜୁଲାଇ ୨୦ ”ସଂସଦ ମାର୍ଚ୍ଚ” ସମୟରେ ଛାତ୍ର ଆନ୍ଦୋଳନକାରୀଙ୍କ ଉପରେ ପୋଲିସର କାର୍ଯ୍ୟାନୁଷ୍ଠାନ ଏବଂ ବର୍ବରତା ପ୍ରସଙ୍ଗରେ ସୁପ୍ରିମ୍ କୋର୍ଟ କଡ଼ା ଆଭିମୁଖ୍ୟ ଆପଣାଇବା ସହ ଆଇନକୁ ନିଜ ହାତକୁ ନେଇଥିବା ପ୍ରତ୍ୟେକ ବ୍ୟକ୍ତିଙ୍କୁ ଦଣ୍ଡିତ କରାଯିବା ଆବଶ୍ୟକ ବୋଲି ସ୍ପଷ୍ଟ କରିଛନ୍ତି। ମଙ୍ଗଳବାର ପ୍ରଧାନ ବିଚାରପତି (ସିଜେଆଇ) ସୂର୍ଯ୍ୟ କାନ୍ତଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ଘଟଣାର ଏକ ସମ୍ପୂର୍ଣ୍ଣ ନିରପେକ୍ଷ ଏବଂ ସ୍ୱଚ୍ଛ ତଦନ୍ତ ପାଇଁ ନିର୍ଦ୍ଦେଶ ଦେଇ କହିଛନ୍ତି ଯେ, ଯଦି ଦାୟିତ୍ୱ ନିର୍ଦ୍ଧାରଣ କରାନଯାଏ, ତେବେ ତଦନ୍ତର କୌଣସି ମୂଲ୍ୟ ରହିବ ନାହିଁ।
କେବଳ ଆନ୍ଦୋଳନ ଚାଲିଛି ବୋଲି ପୋଲିସ ଲାଠିଚାର୍ଜ କରିପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିବା ସହ ଉଭୟ ପ୍ରତିବାଦକାରୀ ଏବଂ ପୋଲିସ କର୍ମଚାରୀ ଆହତ ହୋଇଥିବା ଘଟଣାରେ ଚିନ୍ତା ପ୍ରକାଶ କରି ଗଣତନ୍ତ୍ରରେ ଆତ୍ମ-ସଂଯମତାର ଆବଶ୍ୟକତା ଉପରେ ଜୋର୍ ଦେଇଛନ୍ତି। ଶୁଣାଣି ସମୟରେ ଆଇନଜୀବୀମାନେ ଛାତ୍ରଙ୍କ ଉପରେ ”ଇଲେକ୍ଟ୍ରିକ୍ ଝଟକା” ଏବଂ ବିହାରରେ ”ଏକେ-୪୭” ରାଇଫଲ୍ ବ୍ୟବହାର ହୋଇଥିବା ଅଭିଯୋଗ ଆଣିବା ପରେ, ଏହା କେବଳ ଦିଲ୍ଲୀର ଘଟଣା ନୁହେଁ ବରଂ ସାରା ଦେଶର ବିଷୟ ବୋଲି ଦର୍ଶାଇ କୋର୍ଟ ଆନ୍ଦୋଳନ ଓ ପୋଲିସ ନିୟନ୍ତ୍ରଣ ପାଇଁ ସାରା ଦେଶ ପାଇଁ ସ୍ୱତନ୍ତ୍ର ନିୟମାବଳୀ ଆଣିବା ନେଇ ବିଚାର କରୁଥିବା ପ୍ରକାଶ କରିଛନ୍ତି।
