ଭାରତ ବିପକ୍ଷ ପଞ୍ଚମ ଓ ଶେଷ ଟେଷ୍ଟ ମ୍ୟାଚ୍ରେ ଇଂଲଣ୍ଡ ଦଳକୁ ବଡ଼ ଝଟ୍କା ଲାଗିଛି। ଦଳର ଅଧିନାୟକ ତଥା ଷ୍ଟାର ଅଲରାଉଣ୍ଡର ବେନ୍ ଷ୍ଟୋକ୍ସ କାନ୍ଧରେ ଗୁରୁତର ଆଘାତ ହେତୁ ଏହି ମ୍ୟାଚ୍ରୁ ବାଦ୍ ପଡ଼ିଛନ୍ତି। ଇଂଲଣ୍ଡ ଓ ୱେଲ୍ସ କ୍ରିକେଟ ବୋର୍ଡ (ଇସିବି) ଏହି ଖବର ନିଶ୍ଚିତ କରିଛି। ଷ୍ଟୋକ୍ସଙ୍କ ଅନୁପସ୍ଥିତିରେ ଓଲି ପୋପ୍ ଦଳର ନେତୃତ୍ୱ ନେବେ। ଏହା ସହିତ ଇଂଲଣ୍ଡ ଦଳ ଚୂଡ଼ାନ୍ତ ଏକାଦଶରେ ୪ଟି ପରିବର୍ତ୍ତନ କରିଛି।
ଷ୍ଟୋକ୍ସଙ୍କ ସହ ସ୍ପିନର ଲିଆମ ଡସନ୍, ଦ୍ରୁତ ବୋଲର ଜୋଫ୍ରା ଆର୍ଚର ଏବଂ ବ୍ରାଇଡନ କାର୍ସ ମଧ୍ୟ ଏହି ମ୍ୟାଚ୍ରେ ଖେଳିବେ ନାହିଁ। ଏମାନଙ୍କ ସ୍ଥାନରେ ଗସ୍ ଆଟକିନ୍ସନ୍, ଜୋଶ୍ ଟଙ୍ଗ୍, ଜେମି ଓଭରଟନ୍ ଏବଂ ଜାକବ ବେଥେଲ ଦଳରେ ସାମିଲ ହୋଇଛନ୍ତି। କ୍ରିସ ୱୋକ୍ସ ଏହି ସିରିଜ୍ରେ ସମସ୍ତ ମ୍ୟାଚ୍ ଖେଳି ଦଳରେ ସ୍ଥାନ ବଜାୟ ରଖିଛନ୍ତି।
ଇଂଲଣ୍ଡ ଦଳ ଏହି ସିରିଜ୍ରେ ୨-୧ରେ ଆଗୁଆ ରହିଛି। ଚତୁର୍ଥ ଟେଷ୍ଟ ଓଲ୍ଡ ଟ୍ରାଫୋର୍ଡରେ ଡ୍ର ହୋଇଥିଲା, ଯେଉଁଠାରେ ଭାରତୀୟ ବ୍ୟାଟ୍ସମ୍ୟାନ ରବୀନ୍ଦ୍ର ଜାଡେଜା, ୱାଶିଂଟନ ସୁନ୍ଦର ଏବଂ ଅଧିନାୟକ ଶୁଭମନ ଗିଲଙ୍କ ଶତକ ଦଳକୁ ପରାଜୟରୁ ରକ୍ଷା କରିଥିଲା। ଷ୍ଟୋକ୍ସଙ୍କ ଅନୁପସ୍ଥିତି ଇଂଲଣ୍ଡ ପାଇଁ ଏକ ବଡ଼ କ୍ଷତି ହେଲେ ମଧ୍ୟ ଅଧିନାୟକ ଓଲି ପୋପ୍ ଏକ ଶକ୍ତିଶାଳୀ ଦଳ ନେଇ ସିରିଜ୍ ଜିତିବା ଲକ୍ଷ୍ୟରେ ଓଭାଲରେ ମଇଦାନକୁ ଓହ୍ଲାଇବେ।
ଇଂଲଣ୍ଡର ଚୂଡ଼ାନ୍ତ ଏକାଦଶ: ଜାକ କ୍ରାଓ୍ଲେ, ବେନ୍ ଡକେଟ୍, ଓଲି ପୋପ୍ (ଅଧିନାୟକ), ଜୋ ରୁଟ୍, ହ୍ୟାରି ବ୍ରୁକ୍, ଜାକବ ବେଥେଲ, ଜେମି ସ୍ମିଥ (ୱିକେଟ୍ କିପର), କ୍ରିସ ୱୋକ୍ସ, ଗସ୍ ଆଟକିନ୍ସନ୍, ଜେମି ଓଭରଟନ୍, ଜଶ୍ ଟଙ୍ଗ୍।
ଏହି ମ୍ୟାଚ୍ ଜୁଲାଇ ୩୧ରୁ ଅଗଷ୍ଟ ୪ ପର୍ଯ୍ୟନ୍ତ ଓଭାଲରେ ଖେଳାଯିବ। ଷ୍ଟୋକ୍ସଙ୍କ ଅନୁପସ୍ଥିତି ଏବଂ ଦଳରେ ଏତେ ପରିବର୍ତ୍ତନ ହେତୁ ଏହା ଏକ ରୋମାଞ୍ଚକର ମୁକାବିଲା ହେବ ବୋଲି ଆଶା କରାଯାଉଛି।
